Ruti 4
4
Bowazi ohomuhamba nyumba Ruti
1Nokuma evale mulombwana Bowazi ohodowaga, liye garati va mulango ovolowela sidadile. Mwa tempu yagaratile liye evale, paviraga mutu mulukulu owanda muhamba Ruti nyumba amuwonga Bowazi. Mwa enne aviraga, mulombwana Bowazi ohomuwandelaga eraga: <<Andimuwa nnoufunani. Kazani mugarati va!>> Evale liye ohoza, liye garati. 2Noira enne, mulombwana Bowazi ule ohodowaga atukula andimuwa a musidadi mule kumi, liye azana evale. Liye awandela ira: <<Na nyenne mugarati veva, ikala yengo inafuna miyo uwandelani!>> Evale na aliwene kohogaratigi. 3Evale mulombwana Bowazi ohomuwandelaga wenno awanda muhamba Ruti nyumba ule, liye ira: <<Nowemi wenno uwenle kuma ilambo ya Mowabe unaguliha tereno ya marafula mamunaye, mbalihu Elimeleki. 4Mwa eno, miyo dohoumbuwela ira ili yapama duwandeleni ira mugule vamentoni va atu atene na andimuwihu kagaratile eva. Mwafuna gula, kagulani. Eto akala kamunafuna gula, mudiwandele ira miyo diiziwe ira digule. Mwasiwa kaliwo mutu mmohiwa unafuna gula tereno yenne ahali miyo na nyo. Eto murandji gu nyo.>> Evale mundimuwole ohowakulaga, liye kwi: <<Miyo nnogula, kavali makani.>> 5Mbwenye mulombwana Bowazi ohomuwandelaga eraga: <<Siku nnafuna nyo gula tereno mmandani mwa Nowemi, munomutukula eto Ruti nkuda Mowabe wenno ali muhiyana wa marafula ira akale muhiyaninyu, mumbale mwana ira nzina na marafula nidowege sogolro muwari mwa tereno yayele.>> 6Evale maliba hamba nyumba ule ohowakulaga kwi: <<Akala eno, miyo kannawanda gula tereno ile, mwasiwa dagula tereno ile, nnatawa nnaze dipuzeye ilambo ivahiwe miyo. Mbwenye weyo ukale vamalroni vaga, umuhambe nyumba muhiyanoyo, mwasiwa kavinawandeya ira miyo nnokwakwaniha!>>
7Fwanyeya ira wanle mwilamboni mwa Izarayeli ira kawande gula nari tchindjana yengo, mutu mmohi onvaheda nfwayele nnyalo nimohi na xineli daye. Ayo ali makalelo ohidedela umboni mwilamboni mwa Izarayeli. 8Evale maliba hamba nyumba ule agawongile ira: <<Ugule weyo tereno!>>, ohowungulaga nnyalo naye nimohi na xineli, liye nvaha. 9Evale mulombwana Bowazi ohowongaga na andimuwale, vamohi na atu atene eraga: <<Nyo peno muli amboni ira miyo nnagula mmandani mwa Nowemi tereno na jengo jatene jali ja mulombwana Elimeleki na Kiliyomi na Malomi. 10Eto muwari mogula mule, miyo nnomutela Ruti nkuda Mowabe, wenno ali mwadi marafula Malomi ira jorayela jile jikalegeve na abali a marafula. Mwa eno, nzina naye nneregeve dowa vari va abalaye eto vari va atu a sidadi yenno yabaliwe liye. Nyo peno munafwanyeya mwagali amboni zela jejo.>> 11Evale atu atene kafwanyeya va mulango vale, vamohi na andimuwale kohowakulaga keraga: <<He, na ibaribari hiyo nili amboni! Eto Yehova asakanye ira muhiyana wenno unamutela we awande akana ahima adjindji nnga jairile Rakeli na Leya anno kaabanle atu a muibalini mwa aIzarayeli! Eto nyo mukale orayela mwilamboni mwa Efarata eto mukale ovweya sidadi ya Beleme. 12Eto ahimawo a musogolro anno Yehova unafuna liye uvaha na namwali uyo kakale nnga ahima a mulombwana Pereji, mwana Juda wenno ambanle liye na Tamari.>>#4:11-12 Rakeli na Leya kafwanyeya kagali amma a aIzarayeli atene. Tamari ali mma wa Pereji, nlogo nindimuwa muwari mwa akuda Juda.
Ruti ohombala Obedi, Davi mbwiyaye
13Mwa enne mulombwana Bowazi ohomutukulaga Ruti, liye kala muhiyanaye. Evale kohogona vamohi. Eto Yehova ohomurumeliha Ruti ira abale, liye kana vambani, liye mbala mwanapongwe. 14Mwanole agabaliwe, ahiyana a wewule kohoroma muwongana Nowemi keraga: <<Otamaleliwa akale Yehova, mwasiwa liye kauhiyile eno ahauvaha maliba hamba nyumba. Nzina na mwanola nivweye muwari mwa Izarayeli mwatene! 15Mwanola unerege udidiliha murima eto unerege uing'anela ulula wawo watene. Mwasiwa liye gu mwana wa nijaliyo Ruti wenno unauziveliwa. Ruti wenno uli ofuneyetchetcha kwaranya anapongwe atanu na ambinli!>>#4:15 wenno uli ofuneyetchetcha kwaranya anapongwe atanu na ambinli: Va unawongiwa gu Ruti hiya mwana wenno ambanle liye. Ahiyanale kamutetela Ruti ira gu mutu wapama eto Ruti gofuneyetchetcha kwaranya ahima atanu na ambinli a anapongwe. 16Evale Nowemi ohomutukulaga mwanole, liye muhela mmandani, liye kala makayaya. 17Evale ahiyana aawandamannena liye, kagaonne jejile, kohowongaga keraga: <<Nowemi uhubaleliwa mwanapongwe!>> Evale kohonvaha mwanole nzina na Obedi. Obedi gumbanle mulombwana Jese, Davi babaye.
18Ala ba atu a nlogo na mulombwana Pereji: Mulombwana Pereji ambanle Ezironi, 19Ezironi mbala Ramu, Ramu mbala Aminadabe, 20Aminadabe mbala Nasoni, Nasoni mbala Salimomi, 21Salimomi mbala Bowazi, Bowazi mbala Obedi, 22Obedi mbala Jese, Jese gumbanle Davi.#4:22 Davi unawongiwa gwenno ali mwene oteteliwa kwaranya amwene atene a aIzarayeli. Navwa ira Ruti nkuda Mowabe ali Davi mbwiyaye, tapulela ira Mulugu unowanda laba mabasaye muwari mwa mutu okumela nlogo nili natene.
Kukala mazu a livuru na Ruti.
Currently Selected:
Ruti 4: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral