Filipo 3

Pawulo ohotatila joviroromela ira amukayena Yesu Kiristu

1Yengo yogomiheda abalaga, inafwanela muhagalale muwari mwa Nabwiya. Miyo kannagoma ulrembelani yengo imohive yenna tchoira mwahagalala muwari mwa Nabwiya kamunanyengiwa. 2Polre polre zela anambwa anno oirana jotakala na anamagwada maningo mozela joineliwa. 3Mwasiwa anafwanyeya kagali atu oineliwa mwa ibaribari kahi aliwa, mbwenye gu hiyo nnamutamalela Mulugu muwari mwa Munemba waye eto nnamutitimiha Yesu Kiristu eto nahanyindelaga joira jinerana hiyo na kopolo dehu.

4Akala kohokalawo atu anawanda umbuwela ira kohokana makalelo ofuna nyindela joira jinerana atu, miyo dili vazulu, dahakwaranya atu anno. Kahi ira kadinna makalelo ofuna nyindela joira jaga jinerana miyo na kopolo daga. 5Tchoira miyo dohoineliwa daganna malambo matanu na mararu. Miyo dibaliwe mwa aIzarayeli, nlogo na Benjami. Dili muEberewu mwinnya. Zela harihamo malamulo, miyo dali muFarizewu.#3:5 miyo dali muFarizewu: Muwari mwa aJudewu kohokalawo atu a nikuru na aFarizewu. Aliwa kazuzumela ja Mulugu na makalelo ohiyana-hiyana. Aliwa eto baasogolrelra aJudewu afwiwa zela ja Mulugu. Oindjiva kafwanyeya kagali atu ovitukulela. Yesu ohowonga mazu madjindji muwari moasumulula aFarizewu na mwasa wa joira jiwa. (Matewuji 23:13-29; Lukaji 11:42-43) Muwari mwa aFarizewu, omuroromela Yesu tchali anene. 6Muwari molimbiheda ja Mulugu, dohofiyeda mwezo oaharahara atu omuroromela Yesu. Upama wanna miyo zela harihamo malamulo, kalivo mutu uwandile disumulula zela yengo imohi iviringanihile miyo. 7Mbwenye dohofiyeda mwezo oiziwa ira jatene jinaroromela miyo ji, jinadiweliheda mundulri. Miyo hiya jatene jene ira dikayena yengo imohi unafwanyeya agali Kiristu. 8Miyo eto nnowanda ona ira jatene jaroromela miyo jadiweliheda mundulri bahi. Dohiya jatene ejo ira dikayena yenno isimbwile kana mabasa. Inna mabasa kwaranya jatene ku muiziwa Yesu Kiristu Nabwiya waga. Na mwasa wa Yesu, miyo dihimala tatila jatene, miyo ona nnga lixu ira dimuganyalri Kiristu 9eto dikale muwari mwa liye. Ku wonga kadinna upama ozela harihamo malamulo. Upama unafwayeyana miyo peno unazela muwari momuroromela Kiristu. Upama wenno unakumela wa Mulugu eto unawatcheliwa muwari mwa nroromelo.

10Miyo dihitatila jatene ira diwande muiziwa Kiristu na kopolo dedo divenyilena liye mokwani eto ira diwande kana makatamiho nnga anno anna liye ante disazihe makalelo akwile liye. 11Jatene ejo jili ira venya unafuna miyo venya mokwani ukale venya wa ibaribari.

Pawulo oholimbiheda ja sogolro hiya ja ilambo ya vati

12Venya unawonga miyo, kahi ira venya wewo miyo dihimala wanda. Eto kahi ira eniva dili okwakwanelene, nari. Mbwenye miyo dinnave limbiheda ja sogolro ira dikayena venya unafuna miyo venya, mwasiwa Yesu Kiristu usakanya makalelo ira dikale waye. 13Miyo abalaga, kannaonamo ira venya unafuna miyo venya eniva dihimala fwanya. Mbwenye yengo imohi inera miyo, nnodiwala jatene ja mundulri, miyo limbihedaga ja sogolro. 14Miyo nnadowave sogolro ira diganyalri yotambilra yenno Mulugu udiitanenle liye ira dikayena muwari mwa Yesu Kiristu.#3:13-14 Pawulo ohowonga ira Miyo nnadowave sogolro ira diganyalri yotambilra. Liye aing'anela watchela yotambilra yaye siku nnafuna liye venyihiwa mokwani. Pawulo eto ohowonga ira kannaonamo ira venya unafuna miyo venya eniva dihimala fwanya. Ku wonga Pawulo ohomala iziwa ira Yesu azaga, unozana jotambilra ja kada mutu zela mabasa alabile liye. (Matewuji 16:27; Efezo 6:8; 1 Juwawu 2:28; Jowandeliwa 22:12) Pawulo afuna alabegeve ira aendjede yotambilra yaye siku nnafuna liye venyihiwa.

15Inafwanela hiyo nili olimba muwari mwa nroromelo niumbuwele na makalelo mamohive anno. Akala muwari mwa jowonga jatene jiwongile miyo, ihikalavo yengo imohi yahanawanda nyo rumela pama, unafuna uonelrihedanimo gu Mulugu. 16So ilukuluwa, inafwanela niwendege na ibaribari iwandile hiyo onelramo.

17Abalaga inafwanela nyo mwatene musazihege makalelo anna miyo. Inafwanela eto mwaaing'anege atu owenda na makalelo nnga anawendana hiyo ira mwaasazihege. 18Tchoira nnga mwauwandenleni miyo malambo a mundulrimu, peno nnouwandelani akoka muwari monla ira kohokalawo atu oindjiva anawenda kagali amwidani anaida mabasa alabile Kiristu vamuradini. 19Atu anno anagomela tolotchiwa. Aliwa mulugwiwa ti jofuna ja maningo bahi.#3:19 mulugwiwa ti jofuna ja maningo bahi owu hehi mulugwiwa ti nifu niwa bahi. Anavititimihana jengo ja manyazo jinera atu. Joumbuwela jewa, ti joumbuwela ja ilambo ya vati bahi.

20Hiyo mbwenye wanihu tchi ilambo ya zulu. Eto nnamudediha Nvulusi wehu wenno unafuna za kumela zulu wewule, wenno unafwanyeya agali Nabwiya Yesu Kiristu. 21Liye aza, unotchindja maningo ohokala pama anna hiyo ala ira nikayena maningo nnga maningo okana undimuwa anna liye. Jatene ejo unoirana muwari mwa kopolo dedo nnatongana liye jatene.

Currently Selected:

Filipo 3: iLolo

Highlight

Copy