Malakiya 3
3
Zela za wa Yehova
1Yehova wa Makuru Matene unawonga ira: <<Kaing'anani, miyo nnoza dimurume maliba milanyo waga vasogolro vaga ira asakanyede ndila inafuna miyo vira. Liye agazile, morurumutcha Nabwiya unoza aze muwari mwa Nyumba yaye.#3:1 maliba milanyo… ira asakanyede ndila: Mutu awongiwa ali Juwawu Mbatizi. (Lukaji 7:24-27) Yehova ohowonga ira maliba milanyo unaza vasogolro vaga. Eto mazu oira Nabwiya wenno unafuna zana yopangana anamuwonga Yesu wenno ukungile yopangana ixa muwari mwa sangiri naye. (Lukaji 22:20) Ku wonga Yesu Kiristu gu Nabwiya mwakoka mwene. Liye gu Nabwiya wenno unafuna zana yopangana eto wenno munamuing'anela nyo eto munanfuna nyo. 2Nnga naza nifiya siku na Yehova, kodi bani unawanda vilela? Bani unafuna kala oimelene liye afiyaga? Mwasiwa liye azaga, unaza nnga munlo ohinda wa maliba nyungulrutcha oru. Eto unaza nnga sabawu ya maliba fulra nguwo. 3Unoza agarati aatchenihe eto aasakanyede aLevi nnga maliba nyungulrutcha unatcheniha liye eto unasakanyeda liye oru na parata.#3:3 Fwanyeya ira mutu ira ahuwe oru, unopiya ira jotakala jikumemo nnga mutu apiyaga mutovi. Sawasawa Yesu aza, unoza agarati aatchenihe eto aasakanyede aLevi nnga maliba nyungulrutcha. Ku wonga za wa Yesu wanembinli unakala para atonga atu. Yesu unaapiya atu atene ira atwaye katchenihiwe, atu abure katongiwe. (Malakiya 3:18; 2 Korinto 5:10; 2 Tesalonika 1:6-7; Judaji 1:14-15) Evale aliwa anoza kavelele wa Yehova mikuto na makalelo apama. 4Evale mikuto da aJuda na mikuto da akuda Jeruzalemu nnoza dikale domuziveliwiha Yehova nnga mwakalele atu yaka da mundulri.>>
5Yehova wa Makuru Matene unawonga ira: <<Nnoza difiye vakwikwi vene wa nyo ira ditonge. Mobaranya nnozana umboni oagwihana mulandu aliba lowa, aliba raruwa, aliba hidedela umboni onama, aliba adjelra anamalaba ewa, ale anaaoniha goyi amakwele a ahiyana na anapawi, nari wenno ahanamuirela upama mutu oza nari atene kahanadiova miyo. 6Jatene ejo nnoirana, tchoira miyo dili Yehova ohotchindjeya. Nona nyo ana Jako mwahatolowa.#3:6 dili Yehova ohotchindjeya. Nona nyo… mwahatolowa: Ahakale nnga Mulugu akala Mulugu otchindjeya, liye ogoatolotcha akuda Jako eto ogoatatilela olapela wene na liye kala no kala na mwasa wa joira jiwa. Mbwenye Mulugu kanairana eno mwasiwa liye oholumbela ira akale na aIzarayeli kala no kala. (Jeremiya 30:11; Roma 11:25-29)
Mangiwa mulandu zela yanekumi
7<<Nyo roma malambo a makolo enyu mwazave muviringanihaga malamulo aga, kamwaharile. Kawelani, muze wa miyo. Mwaira eno, na miyene nnowela, dikale na nyo. Unawonga gu Yehova wa Makuru Matene. Amala nyo munofuka iraga: <Hiyo nnawele moira avi?> 8Miyo eto nnoufukani ira: <Kodi inofwanela mutu mbela Mulugu? Nyo mbwenye munodibela.> Amala nyo munodifuka iraga: <Hiyo nnaubelani avi?> Miyo nnouwakulani ira: <Munadibela muwari mwa janekumi na jovelela jimohi jiwa.> 9Muli otembelrelreya nlogo natene nene na mwasa odibela. 10Muzena kada mutu yanekumi yatenene nyumba yaga yokoyamo jengo ira munyumbani mwaga mukale jodja.#3:10 Muzena kada mutu yanekumi yatenene nyumba yaga yokoyamo jengo: AIzarayeli kohotongiwa na Mulugu ira kakayena yanekumi yaavaha atu aLevi zela mabasa kalaba atu Nyumba ya Yehova. (Numero 18:21,24,26) Mulugu eto aatongile aIzarayeli ira kakayena yanekumi imohiwa yadja annyiwene Jeruzalemu muwari momutamalela Mulugu. Ku wonga kada mutu okumiha yanekumi fendo mbinli. Fendo yoroma yali ira aakamihede aLevi. Fendo yowelela yali ira asakanyena pwando liye na atu a vande vaye vamohi na atu osimela na aLevi kafwanyeya vakwikwive. (Detoronomiyo 12:17-19, 14:22-29) - Fwanyeya ira tempu ili hiyo ila Nyumba ya Yehova kiliwo eto aLevi olaba Nyumba ya Yehova kiliwo. Eto fwanyeya ira kilivo yokokomeza muwari mwa Nipangano Nixa yowonga ira inafwanela atu omuroromela Yesu kavelele yanekumi. Mbwenye jihikalawo jokokomeza pwi ira inafwanela atu omuroromela Yesu kaakamihede atu osimela (Joira ja Anamarumiwa 20:33-35; 1 Juwawu 3:16-18; Eberewu 13:16; Tiyagu 1:27) eto kaakamihede aansiyawu anasogolrelra ja Mulugu. (1 Timoteyo 5:17-18; 1 Korinto 9:4-12) Unawonga gu Yehova wa Makuru Matene. Mudixixe, mudione akala miyo kannahula majanela a zulu ira dumorihedeni mareliho madjindji fiyeda nyo mwahakayena vohela. 11Miyo nnoza dibarele ira anantumbwa kahadje mbewu denyu. Uva wenyu kaza ahiya vaha. Unawonga gu Yehova wa Makuru Matene. 12Ilambo yenyu inafuna ikale ilambo yohagalaliha. Nona atu a unde anerege wonga ira muli atu orelihiwa. Unawonga gu miyo Yehova wa Makuru Matene.>>
13Yehova unawonga ira: <<Muhuwonga mazu odipudja.>> Amala nyo munofuka iraga: <<Mpudja uwa niirile avi?>> 14<<Dipudja uwa, munadipudja muwari mowonga ira: <Mulaba Mulugu kunna mabasa. Kuli mpindu hara makalelo anafuna Mulugu. Kuli mpindu wenda mokumbanya vamentoni va Yehova wa Makuru Matene. 15Hiyo nnaona ira atu ovitukulela banakana upama. Atu oirana jotakala banakala orelihiwa. Masiki kamuxixe Mulugu, kinaireliwa yabure.> >>
16Evale ale kamuova Yehova kohoroma tapanya mmohi na nfwaye. Yehova ohoroma vuruwana pama jowonga jewa. Mwa eno, vamentoni vaye vohokala livuru nalrembiwe nowumbutcheda zela ale anamuova Yehova no riheda nzina naye. 17Yehova wa Makuru Matene unawonga ira: <<Atu anno anadiova miyo anoza kakale aga. Siku neno nafiya, nnoza daasakanye ira kakale atu aga a ibaribari anaaziveliwa miyo. Nnoza daawendele tangaranga nnga mutu amuwendelaga tangaranga mwanaye wenno unamulabetcha. 18Evale munoza muone hiyana wa atu apama na atu abure. Eto munoza muone hiyana wa atu omulaba Mulugu na atu ohomulaba Mulugu.>>#3:17-18 Voira kohokalawo atu kawonga ira: Mulaba Mulugu kunna mabasa. Kuli mpindu hara makalelo anafuna Mulugu. (Malakiya 3:14), Mulugu ohowonga ira: Siku nenne nafiya… munoza muone hiyana wa atu apama na atu abure. Nona tempu ili hiyo kannakukumuwa zela atu anno anairana jabure karayelaga eto kannakukumuwa zela atu omuroromela Yesu kasimenle. Mwasiwa hiyana watene unoza uoneye. Nione Matewuji 13:47-50.
Currently Selected:
Malakiya 3: iLolo
Highlight
Share
Copy
Want to have your highlights saved across all your devices? Sign up or sign in
© 2018 Visão Integral