Jozuwe 6
6
AIzarayeli kohogudjula sidadi ya Jeriko
1Atu a sidadi ya Jeriko kagaonne ira Ana Izarayeli ali vakwikwive na hiyo, kohofungaga pama milango dovolowela da sidadile. Kalivo avolowa, nne kalivo akuma. 2Mwa enne Yehova ohowongaga na Jozuwe ira: <<Eni miyo dihimala uvahani mmandani mwenyu sidadi ya Jeriko vamohi na mwene wewa vamohi na anyakondo ewa a kopolo owanda wana kondo. 3-4Ira mugudjule sidadile, muire eni. Kakalewo anamakuta atanu na ambinli anno anafuna tukula palraza tanu na mbinli dosakanyiwa na manyanga a mabila, kakale sogolro wa afwiwa anatukula Kaxa ya Yopangana. Weyo na anyakondo atene mwaaharege mundulri muwa. Muwerewerege sidadi malambo matanu na nimohi, kada siku fendo imohi. Siku nanetanu na mbinli, nyo muwerewere sidadile fendo tanu na mbinli. Eto siku nanetanu na mbinli nne, anamakuta kaimbege palraza diwa dile. 5Mwamala werewera fendo yogomiheda, aliba palraza ale kaimbe palraza diwa modibeliwa. Mwavwa enne, atu atene kakuwe na mazu olimbiha. Evale muru mulukulu owerewera sidadile unogwa ekave. Evale anyakondo a aIzarayeli anafwanyeya kagawerewerile Jeriko kavolowe musidadi mule kada mutu vili liye.>>
6Evale Jozuwe mwana Numi ohaitanaga anamakuta liye awandela ira: <<Mutukule Kaxa ya Yopangana eto kakalewo anamakuta amohiwa atanu na ambinli anno anafuna kala sogolro wa Kaxa ya Yehova kaganna palraza tanu na mbinli dosakanyiwa na manyanga a mabila.>> 7Noira enne, ohawandelaga atu atene eraga: <<Muvenyihane, muwerewere sidadi yatene yenna. Eto anyakondo katukunle jowanana jiwa, kavire kakale vasogolro va anamakutale katukunle Kaxa ya Yopangana ya Yehova ile.>> 8Evale kohoiragana jatene nnga mwemo mwaarumele Jozuwe. Anamakuta atanu na ambinli ale kohotukulaga palraza diwa tanu na mbinli mosogolrelriwa na Yehova, aliwa roma imbaga. Eto aliba tukula Kaxa ya Yopangana ya Yehova ile koaharaga mundulri muwa. 9Anyakondo katukunle jowanana jiwa ale kohodowa, aliwa roma wenda vasogolro va anamakuta kaimba palraza ale. Eto mundulri mwa Kaxa ya Yopangana ile, mozaga anyakondo amohiwa eto anamakutale vari vale kerave imba palraza diwa. 10Fwanyeya ira mulombwana Jozuwe ohawandelaga atwale mazu oira: <<Mwawendaga, kamukuwege nne kamutapanyege na afwinyu, nne kamuwongege yengo ili yatene, fiyeda siku nnafuna miyo uwandelani ira: <Kakuwani!>. Daira eno mbwenye, nyo murome kuwa!>> 11Kaxa ya Yehova ile Jozuwe aiwerewerihile sidadile fendo imohi siku nenne. Noira enne, kohowelela vamisasani viwa, aliwa gona.
12Mmetcheloni muwa na mabebehene mulombwana Jozuwe ohovenyaga eto anamakuta ale kohotukulaga akoka Kaxa ya Yehova ile. 13Anamakuta atanu na ambinli anne kanna palraza tanu na mbinli da manyanga a mabila ale, kohodowaga vasogolro va Kaxa ya Yehova kawendaga kaimbagave palraza diwa eto anyakondo katukunle jowanana jiwa ale kohodowave vasogolro viwa. Eto mundulri mwa Kaxa ya Yehova ile mozaga anyakondo amohiwa eto anamakuta vari vale kerave imba palraza diwa. 14Siku nanembinli nne kohodowaga werewera sidadile fendo imohi, noira eno kohowelelaga vamisasani viwa akoka. Evale kohoiraga enne va kada siku fiyeda malambo matanu na nimohi.
15Nagakwakwanne siku nanetanu na mbinli, unde utchaga aIzarayeli kohovenya, aliwa roma werewera sidadi ya Jeriko nnga jaira atu fendo dimohi diwa dile. Mbwenye siku neno aliwa kawerewerile fendo tanu na mbinli. Siku neno nali noroma eto nogomiheda kawerewerile atu sidadile fendo tanu na mbinli. 16Kakwakwanihaga fendo yanetanu na mbinli, anamakuta kakuwihaga palraza diwa, mulombwana Jozuwe ohowonga na atu atene eraga: <<Kakuwani! Mwasiwa Yehova uhuvahedani sidadi ya Jeriko ila. 17Sidadila vamohi na jatene jinafwanyeyamo inafwanela jiveleliwe wa Yehova muwari motolotchiwa. So mbwenye unafuna kana ingumi gu puta Rahabi vamohi na atu anafuna fwanyeya mmba mwaye. Mwasiwa liye gwaakoyile anamawendelela naarumile hiyo. 18Eto muviing'anele pama tawiha ira munaze mutukule yengo ili yatene yenno inafuna veleliwa wa Yehova muwari motolotchiwa. Tchoira, nyo mwatukula yengo ili yatene muwari mwa jengo jejo jinafuna veleliwa wa Yehova muwari motolotchiwa, munozana wa aIzarayeli tolotchiwa no bwanyuliwa. 19So mbwenye jengo jatene ja parata, oru, jatene josakanyiwa na mukuwa na momba mubalre nnga jengo jotchena ja Yehova. Nona jatene jejo jidowiwena nimburo nokoyamo ja Yehova.>>
20Evale anamakuta kohokuwiha palraza diwa. Atu atene kagavwile kuwa wa palraza da anamakuta ale, na aliwene kohoroma kuwa no kuwa ulukulu. Kagaromile kuwa, muru mulukulu awerewerile sidadile ohogwa! Agagwile, aIzarayeli kohovolowa muwari mwa sidadile. Kada mutu avolowela vali liye, kaagondjihaga atu kali musidadi mule. 21Evale aIzarayeli kohotolotcha jatene jafwanyeya musidadi mule na masupada. Romela alombwana na ahiyana, ahima na andimuwa, ng'ombe, mabila vamohi na aburu, jatene jene aIzarayeli kohomala pa.#6:21 aIzarayeli kohotolotcha jatene jafwanyeya musidadi mule: Koapa atu atene nari ahiyana nari ahima molingana na mazu Mulugu awongile liye. Tchoira Mulugu aarumile ira kampe mutu uli watene unavuma. Nione Detoronomiyo 20:16; Jozuwe 10:40.
Vulumuwa wa Rahabi
22Mulombwana Jozuwe oharuma alombwana ambinli, anno kawendelenle sidadi ya Jeriko ale eraga: <<Dowani vande va puta wenno aukoyileni, mwankumihemo liye vamohi na atu atene kali vande vaye nnga mwemo mwalumbenle nyo na liye.>> 23Evale alombwana kadowile wendelela ale kohodowa nkumihamo Rahabi na babaye, mmaye, arongoliye vamohi na atu atenene a muibalini mwaye anno kafwanyeya mmba mwemule, aliwa adowana unde wa misasa da aIzarayeli.
24Evale kohotukulaga munlo, aliwa tumeya sidadi yenne vamohi na jatene jafwanyeya emule. So mbwenye katukunlegemo parata, oru vamohi na jengo josakanyiwa na mukuwa na ja momba aliwa dowa hela nimburo nokoyamo ja Yehova. 25Mwa enne mulombwana Jozuwe kampile puta Rahabi vamohi na atene kafwanyeya muibalini mwaye. Kuma siku nenne ante peno, Rahabi unafwanyeya vamohi na aIzarayeli mwasiwa liye ohakoya anamawendelela anne karumiwe na mulombwana Jozuwe ira kadowe kawendelele sidadi ya Jeriko.
26Evale mulombwana Jozuwe ohowonga na aIzarayeli mazu otembelrelra eraga: <<Mutu wenne unafuna venya aimanga akoka sidadi ya Jeriko ila, wenno atembelrelriwe na Yehova. Aromaga mabasaye, ahelamo aliserisi sidadi yenna, unokweliwa mwanaye oroma. Eto amarihaga mabasaye, ahelamo misuwo sidadila, unokweliwa mwanaye wa mwanapongwe ogomiheda baliwa.>>#1 Amwene 16:34
27Mwa enne Yehova alive na mulombwana Jozuwe, evale liye ohovweya ilambo yatene yenne.
Currently Selected:
Jozuwe 6: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
