Jozuwe 21
21
ALevi kohovahiwa sidadi diwa ira kakalegemo
1Mwa enne andimuwa a muibalini mwa aLevi kohodowaga wonga na namakuta Eliyazari vamohi na Jozuwe mwana Numi na andimuwa andimuwa atene a malogo a Ana Izarayeli, 2wali atu sidadi ya Silo muwari mwa ilambo ya Kana, aliwa ira: <<Yehova, muwari mwa mulombwana Mozeji, ohowonga ira hiyo nivahiwe sidadi ira nikalegemo vamohi na mamburo owandamela ira nidjihegemo jifuwo jihu.>>#21:1-2 Yehova, muwari mwa mulombwana Mozeji, ohowonga ira: Muselu wenna unafwanyeya Numero 35:1-8. Tchoira aLevi tchavahiwe ilambo ira ikale yewa nnga jairile aIzarayeli afwiwa. So mbwenye kavahiwe sidadi muwari mwa vilambo da malogo a Izarayeli ira kakalegemo. Ku wonga aliwa kafwanyeya obalaleyene mwatene muwari mwa ilambo ya Kana. 3Mwa enne Ana Izarayeli kohovwelela mazu awongile Yehova, aliwa avaha aLevi ale sidadi na mamburo owandamela odjihamo jifuwo muwari mwa ilambo yavahiwe atu.
4Muwari mwa aLevi atene, kagasakanyile jogu ya ngari, ngari yoroma yaagwenle atu a nlogo na Kowati anno kafwanyeya muibalini mwa namakuta Arawu.#21:4 aLevi… Kowati… Arawu: Levi ambanle Kowati eto Arawu ubaliwe muzizani mwa Kowati. Eto fwanyeya ira anamakuta atene kabaliwe munlogoni mwa Arawu. Ku wonga aKowati amohiwa kafwanyeya kagali anamakuta eto amohiwa tchali anamakuta. Mwa enne ngari yewa yaagwenle ira kavahiwe sidadi kumi na taru dafwanyeya muwari mwa ilambo ya malogo a Juda, Simeyawu na Benjami. 5Noira eno, ahima amohiwa a mulombwana Kowati ngari yewa yaagwenle ira kavahiwe sidadi kumi dafwanyeya muwari mwa ilambo ya malogo a Efarayimi na Dani eto vamohi na ilambo ya metadi ya nlogo na Manasesi.
6Evale aLevi anno kafwanyeya kagali ahima a mulombwana Jeresoni, ngari yewa yaagwenle ira kavahiwe sidadi kumi na taru dafwanyeya muwari mwa ilambo ya muibalini mwa malogo a Isakari, Azeri, Nafitali na metadi ya nlogo na Manasesi yenno yali ilambo ya Bazani.
7Evale aLevi anno kafwanyeya kagali ahima a Merari nnga mwemo mwaindjivele maziza ewa kohovahiwa sidadi kumi na mbinli dafwanyeya muwari mwa malogo a Rubeni, Gadi na Zebuloni.#21:5-7 Kowati… Jeresoni… Merari: Atu araru ala kafwanyeya kagali ana Levi. (Jenesesi 46:11)
8Mwa enne mulogo watene wa Ana Izarayeli kohavaha aLevi sidadi vamohi na mamburo owandamela odjihamo jifuwo jiwa muwari mosakanya jogu ya ngari nnga mwemo Yehova mwamurumele liye Mozeji.
Sidadi davahiwe akuda Arawu, ziza na Kowati, nlogo na Levi
9-10Muwari mwa ilambo ya atu a nlogo na Juda vamohi na nlogo na Simeyawu, aliwa kohavaha sidadi ana Arawu anno kali muzizani mwa Kowati, wenno afwanyeya agali mwana Levi mwasiwa muwari mwa aLevi atene, ana Arawu ba arandji gweliwa ngari. Sidadi davahiwe atu ti dedi nnafuna wongiwaga mpedi mu. 11Kohovahiwa sidadi ya Kiriyati-Araba, yenno inaitaniwa Eboroni, inafwanyeya ilambo ya mwango didjindji ya Juda. Eto kohovahiwa mamburo owandamela odjihamo jifuwo jiwa. Fwanyeya muwari mwa nzina na Kiriyati-Araba, Araba unawongiwa ali Anaki babaye. 12Mbwenye minda da sidadi, vamohi na tatamo dowandamana na sidadile, dali da mulombwana Kalebi, mwana Jefoni dedo damanle liye vahiwa wanle.
13Ahima a namakuta Arawu kohovahiwa sidadi ya Eboroni na mamburo owandamela odjihamo jifuwo jiwa. Sidadi yenna yali sidadi imohi muwari mwa sidadi dotawelamo zela mutu unampe nfwaye mohofuna. Kohovahiwa eto sidadi dimohi diwa di: Libina, 14Jatiri, Estemowa, 15Holomi, Debiri, 16Ayimi, Juta na Bete-Semeji. Kohovahiwa eto mamburo odjihamo jifuwo jiwa owandamela na kada sidadi. Sidadi datene davahiwe akuda Arawu okumela nlogo na Juda na nlogo na Simeyawu dali tanu na nnayi.
17Eto muwari mwa nlogo na Benjami ahima a namakuta Arawu kohovahiwamo eto sidadi di: Jibeyawu, Jeba, 18Anatoti na sidadi ya Alimomi. Ku wonga sidadi nnayi. Kada sidadi kovahiwa vamohi na mamburo owandamela odjihamo jifuwo jiwa. 19Sidadi datene davahiwe anamakuta anno kafwanyeya kagali ana Arawu, dali kumi na taru vamohi na mamburo owandamela odjihamo jifuwo jiwa.
Sidadi davahiwe atu amohiwa a ziza na Kowati, nlogo na Levi
20Zela atu amohiwa a ziza na Kowati mwana Levi,#21:20 atu amohiwa a ziza na Kowati: Ku wonga aKowati kahabaliwe munlogoni mwa Arawu eto tchali anamakuta. Tchoira muwari mwa aKowati atene, ale kabaliwe muzizani mwa Arawu kafwanyeya kagali anamakuta eto ale kabaliwe muwari mwa maziza amohiwa tchali anamakuta. ngari yewa yaagwenle ira kavahiwe sidadi dali muwari mwa ilambo ya atu a nlogo na Efarayimi. 21Aliwa kohovahiwa ilambo ya Sikemu vamohi na mamburo owandamela odjihamo jifuwo jiwa. Sidadi yenna yafwanyeya pandi ya mwango didjindji ya Efarayimi eto yali sidadi imohi muwari mwa sidadi dotawelamo zela mutu unampe nfwaye mohofuna. Eto kohovahiwa Jezeri, 22Kibizayimi na Bete-Horoni. Ku wonga sidadi nnayi. Kada sidadi kovahiwa vamohi na mamburo owandamela odjihamo jifuwo jiwa.
23Eto muwari mwa ilambo ya atu a nlogo na Dani, atu amohiwa a ziza na Kowati ale kohovahiwamo sidadi di: Eliteki, Jibetomi, 24Ayijaloni na Gate-Rimomi. Kada sidadi kovahiwa vamohi na mamburo owandamela odjihamo jifuwo jiwa. Ku wonga sidadi nnayi. 25Eto muwari mwa ilambo ya metadi ya nlogo na Manasesi, atu amohiwa a ziza na Kowati ale kohovahiwamo sidadi mbinli di: Tanaki na Gate-Rimomi. Kada sidadi kovahiwa vamohi na mamburo owandamela odjihamo jifuwo jiwa. 26Atu amohiwa a ziza na Kowati, gumaniha sidadi datene davahiwe atu, dali kumi. Kada sidadi kovahiwa vamohi na mamburo owandamela odjihamo jifuwo jiwa.
Sidadi davahiwe atu a ziza na Jeresoni, nlogo na Levi
27Zela atu a ziza na Jeresoni mwana Levi, kavahiwe sidadi mbinli dafwanyeya pandi ya ilambo yavahiwe metadi ya nlogo na Manasesi. Yoroma ali Golani mwilamboni mwa Bazani, yenno yafwanyeya yagali sidadi imohi muwari mwa sidadi dotawelamo zela mutu unampe nfwaye mohofuna. Yowelela ali sidadi ya Bestera. Kada sidadi kovahiwa vamohi na mamburo owandamela odjihamo jifuwo jiwa. 28Eto muwari mwa ilambo ya atu a nlogo na Isakari, akuda Jeresoni kohovahiwamo eto sidadi di: Kisiyawu, Daberati, 29Jarimute na Eni-Ganimi. Ku wonga sidadi nnayi. Kada sidadi kovahiwa vamohi na mamburo owandamela odjihamo jifuwo jiwa. 30Eto muwari mwa ilambo ya atu a nlogo na Azeri, kohovahiwamo eto sidadi di: Misali, Abidoni, 31Elikati na Reyobi. Ku wonga sidadi nnayi. Kada sidadi kovahiwa vamohi na mamburo owandamela odjihamo jifuwo jiwa. 32Eto muwari mwa ilambo ya atu a nlogo na Nafitali, atu a ziza na Jeresoni kohovahiwamo sidadi di: Yoroma ali Kedeji yafwanyeya Galileya. Sidadi yenna yali sidadi imohi muwari mwa sidadi dotawelamo zela mutu unampe nfwaye mohofuna. Yowelela ali Hamoti-Dori eto yogomiheda ali Karita. Ku wonga sidadi taru. Kada sidadi kovahiwa vamohi na mamburo owandamela odjihamo jifuwo jiwa. 33Atu amohiwa a ziza na Jeresoni, gumaniha sidadi datene davahiwe atu, dali kumi na taru. Kada sidadi kovahiwa vamohi na mamburo owandamela odjihamo jifuwo jiwa.
Sidadi davahiwe atu a ziza na Merari, nlogo na Levi
34Zela aLevi anno kahanle, ku wonga atu a ziza na Merari, kavahiwe sidadi dafwanyeya muwari mwa ilambo ya atu a nlogo na Zebuloni. Sidadi diwa ti di: Jokineyawu, Karita, 35Dimina na Nalali. Ku wonga sidadi nnayi. Kada sidadi kovahiwa vamohi na mamburo owandamela odjihamo jifuwo jiwa. 36Eto muwari mwa ilambo ya atu a nlogo na Rubeni, akuda Merari kohovahiwa sidadi di: Bezeri, Jaza, 37Kedemoti na Mefwati. Ku wonga sidadi nnayi. Kada sidadi kovahiwa vamohi na mamburo owandamela odjihamo jifuwo jiwa. 38Eto muwari mwa ilambo ya atu a nlogo na Gadi, akuda Merari kohovahiwamo sidadi di: Yoroma ali Ramote mwilamboni mwa Jileyadi yenno yafwanyeya yagali sidadi imohi muwari mwa sidadi dotawelamo zela mutu unampe nfwaye mohofuna. Dowelela dali Mahanayimi, 39Ejiboni na Jazeri. Ku wonga sidadi nnayi. Kada sidadi kovahiwa vamohi na mamburo owandamela odjihamo jifuwo jiwa. 40Atu a nlogo na Merari mwana Levi nnga mwemo mwaindjivele maziza ewa, ngari yewa kavahiwile sidadi kumi na mbinli.
41Gumaniha sidadi datene davahiwe atu a nlogo na Levi muwari mwa ilambo ya Ana Izarayeli dali 48. Kada sidadi kovahiwa vamohi na mamburo owandamela odjihamo jifuwo jiwa. 42Muwari mwa vilambo datene dene dagawiwe, kada sidadi yohokana mamburo owandamela odjihamo jifuwo.
Yehova ohokwakwaneliheda japanganne liye na makolo a aIzarayeli
43Ala ali makalelo Yehova aavahile liye aIzarayeli ilambo yatene yalumbenle liye na makolo ewa. Evale aliwa kohotukula ilambwiwa, aliwa kalagamo. 44Evale Yehova ohavaha aIzarayeli vuma mwilamboni mwatene nnga mwemo mwalumbenle liye na makolo ewa. Kalivo nne mwidani mmohi awanda agondjiha, mwasiwa Yehova ohavaheda amwidaniwa atene mmandani mwewa. 45Mwa enne Yehova ohokwakwaneliheda jopangana jatene japama jasakanyile liye na aIzarayeli atene. Eto ohoirana jatene jalumbenle liye.
Currently Selected:
Jozuwe 21: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
