Jozuwe 16
16
Ilambo yagaweliwe atu a muibalini mwa Joze
1Ilambo ya atu a muibalini mwa Joze, ngari yewa yagwenle ilambo yaromile muhindje Jordawu, wandamelana sidadi ya Jeriko makumelo wa nzuwa wa visime da Jeriko ante dowa gomela muisalesaleni. Eto kuma Jeriko ule, ilambo yewa yodowave pandi ya mwango didjindji fiyeda Beteli. 2Kuma sidadi ya Beteli, madilriwa kodowave ante sidadi ya Luji, ante dowa fiya sidadi ya Ataroti, wewo wakala akuda Ariki. 3Kuma evale madilriwa kovira kaharaga pandi ya mavirelo wa nzuwa, dowa fiya wandamelana ilambo ya akuda Jafiya, madilriwa kodowave ante pandi ya Bete-Horoni mpedi muwa, dowagave Jezeri, ante dowa gomela bara Mediteraniyo. 4Di ti vilambo davahiwe nlogo na mulombwana Manasesi na nlogo na Efarayimi anno kafwanyeya kagali ahima a mulombwana Joze.
Ilambo yagaweliwe metadi ya nlogo na Efarayimi
5Ila tchi ilambo ivahiwe maziza a nlogo na Efarayimi nnga mwemo mwaindjivele maziza ewa. Madilre ewa karomile makumelo wa nzuwa wa sidadi ya Ataroti-Adari, dowagave Bete-Horoni wa Nkumani. 6Madilre ewa kodowave ante bara Mediteraniyo, ante ilambo ya Mikimetate. Kuma pandi ya norti wa ilambo ya Mikimetate ile kotitikuwa, aliwa dowaga makumelo wa nzuwa, ante Tanati-Silo. Kuma evale madilriwa kodowave makumelo wa nzuwa ante Janowa. 7Noira enne, kotita kuma Janowa ule dowaga sidadi ya Ataroti, dowagave sidadi ya Narate, dowa vira Jeriko, ante dowa gomela muhindje Jordawu.
8Kuma evo, madilre ewa karomile sidadi ya Tapuwa dowa mavirelo wa nzuwa muwari mwa mwana muhindje wa Kana ante dowa gomela bara Mediteraniyo. Di ti vilambo davahiwe nlogo na Efarayimi nnga mwemo mwaindjivele maziza ewa.
9Nlogo nimohive na Efarayimi nne nohovahiwa eto sidadi dimohi diwa na tatamo dimohi diwa dafwanyeya muwari mwa ilambo yavahiwe nlogo na Manasesi. 10Mbwenye akuda Efarayimi tchaatamangihilemo akuda Kana kakala ilambo ya Jezeri. Fiyeda peno aliwa anakala vamohi na atu a nlogo na Efarayimi. Mbwenye akuda Kana ale anaalabela atu a nlogo na Efarayimi mabasa okanyihediwa.
Currently Selected:
Jozuwe 16: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
