Anamasogolrelra 9
9
Abimeleki ohapa abalaye, liye kala mwene
1Mulombwana Jerubaali wenno aitaniwa eto Jideyawu agakwile, mwanaye Abimeleki ohodowaga wa mmaye arongoliye sidadi ya Sikemu, liye wonga na atu atene a vande va mmaye babaye, eraga: 2<<Nnauvepani ira mudowe mwaafuke atu atene a Sikemu muire: <Kodi para nyo yapamiwa tchivi? Kodi yapamiwa para nyo tchoira ana Jerubaali atene 70 kautongegeni owu hehi yapamiwa tchoira mwana mmohi wa Jerubaali autongegeni? Inafwanela eto muumbuwele ira miyo dili nikuva nimohive eto dili munoku mmohive na nyo.> >> 3Evale mmaye arongoliye ale kohodowaga wonga mazu matene anne na atu atene a Sikemu. Eto kagavwile mazu anne, kohorumela na mmirimani mwewa mwatene ira kamuhare Abimeleki, aliwa ira: <<Inafwanela anitongege liyene mwasiwa gu mbalihu.>> 4Noira enne kohodowa munyumbani mwa mulugu wewa Baali-Berite, aliwa kumihamo kobiri 70 da parata, aliwa nvaha Abimeleki. Evale na kobiri davahiwe liye dile, ohodowaga aalugari alombwana ohokana mabasa a makalelo abure, aliwa roma muhara. 5Evale liye ohodowaga vande va babaye sidadi ya Ofara, liye ahinda abalaye 70 anno kafwanyeya kagali ahima a babaye Jerubaali. Evale ohapa atene vazulu va nibwe nimohive. Mbwenye mwana wa ng'onong'ono wa Jerubaali aitaniwa Jotawu, ohalaga, kakwile, mwasiwa erege dowa vitala. 6Mwa enne kohogumanelaga atu atene a Sikemu na a Bete-Milu, aliwa venyihana dowa muhambiha Abimeleki umwene wandamelana vamutengoni mulukulu wa karvaliyo,#9:6 vamutengoni mulukulu wa karvaliyo: MaBibiliya amohiwa anawonga ira: vamutengoni wa karvaliyo wenno unateteliwa. Kalaga nnga ali mutengo wadowa atu ira kaatamalelege amilugu ewa. wenno unafwanyeya Sikemu.
Mulombwana Jotawu ohawongela yofwalrafwaniha akuda Sikemu
7Evale mulombwana Jotawu agavwile jeji, ohovenyihanaga, liye dowa vazulu va mwango Jerizimi, liye roma akuwela alombwana atene a Sikemu ale eraga: <<Kadivuruwaneni nyo akuda Sikemu ira na nyenne Mulugu auvuruwaneni. 8Tempu imohi eni mitengo dohovenyaga ira didowe damuhambihe mwene ira aatongege. Noira enne mitengo dile dohowongaga na mutengo wa azeti diiraga: <Nnafuna ukale mwene wehu.> 9Mbwenye mutengo wa azeti ule ohokondaga eraga: <Kavili jowandeya ira miyo nnohiya vaha azeti waga wenno atu anaavaha atu amilugu na atu afwiwa muwari moariheda, era eno, didowe datongege mitengo da vaheno vene.> 10Noira enne mitengo dile dohowongaga na mutengo wa mufigera diiraga: <Uze ukale mwene wehu.> 11Mbwenye mufigera ule ohokondaga eraga: <Kavili jowandeya ira miyo nnohiya tapilra waga vamohi na jovaha jaga japama, era eno, didowe datongege mitengo da vaheno vene.> 12Noira enne mitengo dile dohowongaga na muratchi wa uva diiraga: <Uze ukale mwene wehu.> 13Mbwenye muratchi wa uva ule ohokondaga eraga: <Kavili jowandeya ira miyo nnohiya kumiha vinyu wenno unamuhagalaliha Mulugu vamohi na atu, era eno, didowe datongege mitengo da vaheno vene.> 14Noira enne mitengo datene edile dohowongaga na mutengo wa mulrambe diiraga: <Uze ukale mwene wehu!> 15Evale mutengo wa mulrambe ule ohowongaga na mitengo dile ira: <Akala na ibaribari munofuna jodihambiha ira dikale mwene wenyu, muze mutawele vati va nfulri waga. Mbwenye mwahafune ira dikale mwene wenyu, miyo nnokumiha munlo ditolotche mitengo datene da seduru nnafwanyeya Libano.> >> 16Evale Jotawu ohowongaga eraga: <<Nona miyo nnoufukani ira kodi nyo mmusakulraga mulombwana Abimeleki ira akale mwene wenyu muirilena mwa ibaribari na mmirimani mwenyu mwatene? Kodi nyo muhumuirela upama Jerubaali vamohi na atu a vande vaye eto kodi nyo muhunvaha yengo yofwanelela zela mabasaye matene alabile liye? 17Tchoira miyo babaga ohowana vamalroni venyu, liye wanda lramwisa ingumi yaye, liye uwombolani mmandani mwa akuda Midiyani. 18Mbwenye nyo peno munaida vande va babaga eto muhapa ahimaye 70 vazulu va nibwe nimohive eto muhumutukula Abimeleki wenno unafwanyeya agali mwana wa namalabaye, nyo muhambiha ira akale mwene wa Sikemu voira liye gu mbalinyu. 19Akala na ibaribari muirilena na mmirimani mwenyu mwatene na makalelo ofwanelela zela Jerubaali vamohi na atu a vande vaye, era eno, hagalalani zela mulombwana Abimeleki eto na liyene ahagalale zela nyo. 20Mbwenye akala kahi mwemo, munlo akume wa Abimeleki aatolotche akuda Sikemu na akuda Bete-Milu eto munlo akume wa akuda Sikemu na akuda Bete-Milu aze amutolotche mulombwana Abimeleki.>> 21Noira enne mulombwana Jotawu ohomaruwaga atawaga, liye dowa sidadi ya Beri, liye kalaga wewule na mwasa omuova mbalaye Abimeleki.
Mulugu ohoziha idana muwari mwa akuda Sikemu na Abimeleki
22Mwene Abimeleki agamanle yaka taru aatongaga aIzarayeli, 23Mulugu ohomuruma munemba wabure za roma aidaniha akuda Sikemu na Abimeleki. Mwa enne akuda Sikemu kohomurungunuwela Abimeleki. 24Jatene ejile ali ira iwelihiwe kunyakunya zela ubure watene waireliwe ahima 70 a Jerubaali, sangiri newa nimugwele mbaliwa Abimeleki wenno aapile vamohi na akuda Sikemu anno kamulimbihile ira liye adowe aape abalaye. 25Evale akuda Sikemu koharuma alombwana angasi angasi ira kadowe kanvitalele Abimeleki pandi ya vazulu va mwango da wewule. Mwa enne mutu uli watene avira mwangoni ule, alombwanale kombela jengo jaye. Evale Abimeleki ohowandeliwa zela jejile.
26Mwa tempu yenne mulombwana Gala mwana Ebedi ohotamela sidadi ya Sikemu vamohi na abalayene. Mwa enne akuda Sikemu kagamuonne, kohoroma munyindela. 27Siku nimohi akuda Sikemu kohomaruwa, aliwa dowa mmindani mwiwa mwa uva, aliwa hatcha uviwa, aliwa finya. Noira eno, kohodowaga munyumbani mwa mulugu wewa, aliwa roma dja pwando, aliwa ng'waga eto aliwa mutembelrelraga Abimeleki. 28Eto mulombwana Gala mwana Ebedi ohowongaga eraga: <<Kodi Abimeleki bani? Eto nnga hiyo akuda Sikemu nili ani ira nimulabe liye?! Kodi Abimeleki kahi mwana Jerubaali bahi? Eto mutu umuhenle liye ira asogolrelrege kahi mulombwana Zebuli? Inafwanela mwaaharege akuda Sikemu na abalaye anno kakumile mwa mulombwana Amori. Nnga mwasiwa gwa nni hiyo nnamuharege hiyo mulombwana Abimeleki?! 29Aa, ahakanlege miyo dikala musogolrelri wa atwala, vano dohomala mutamangiha Abimeleki. Dogomuwandela ira: <Kaawendjede anyakondo awo ira muze muwane na miyo.> >>
30Evale mulombwana Zebuli, musogolrelri wa Abimeleki wa sidadile, agavwile mazu awonga mulombwana Gala mwana Ebedi, ohotakaleliwaga na makalelo ohokala a masika. 31Mwa enne oharuma atu na milanyo ira kadowe mozemba, kamuwandele Abimeleki mazu oira: <<Kaing'anani, Gala mwana Ebedi vamohi na abalaye kohoza Sikemu, aliwa roma atujaga atu a musidadi ira karome tatamula wana na nyo. 32Inafwanela nyo vamohi na atwinyu munafwanyeyana nyo muvenye na mahiyu mozemba, mudowe mwavitale mmindani. 33Era eno muvenye na mabebehene nzuwa nakumaga, muze muwane na sidadi. Mwa enne tempu inafuna venya Gala vamohi na alombwanaye ira kawane na nyo, nyo mmuirena yengo ili yatene inawande nyo.>>
Abimeleki ohomugondjiha Gala vamohi na akuda Sikemu atene
34Evale mulombwana Abimeleki ohovenyaga na mahiyu vamohi na atu atene kafwanyeya vamohi na liye, aliwa dowa ivitalela sidadi ya Sikemu muwari mogaweya makuru mannayi. 35Noira eno, Gala ohokumaga musidadi mule, liye dowa imela vovolowela va mulango wa sidadile. Evale Abimeleki vamohi na atu atene kafwanyeya na liye kohokumaga mwemo mwavitanlege atu. 36Evale mulombwana Gala agaaonne atwale, ohomuwandela mulombwana Zebuli, liye ira: <<Kaing'ana, kohokalawo atu anatita mmwangoni mule.>> Mbwenye mulombwana Zebuli mofutukula ohowakulaga eraga: <<Nari, kahi atu. Nyo so munaona mifulri da mitengo dile nnga ba atu.>> 37Mbwenye mulombwana Gala ohowongaga akoka eraga: <<Kaing'ana, kohokala atu anatita sogolro wehu ule eto ukala nikuru na anyakondo nnaza ndila ya mutengo wa karvaliyo wa aliba makanga.>>#9:37 aliba makanga: Owu hehi Meyonenimi. Tchoira Meyonenimi ku tapulela aliba makanga. 38Mwa enne mulombwana Zebuli ohowongaga eraga: <<Nnga ugomenle uvi na jowonga jawonga we jile uiraga: <Kodi Abimeleki bani ira hiyo nimuharege?> Kodi atu waalramwisa we kahi anne? Kavenya eto, uwane na aliwa!>> 39Mwa enne mulombwana Gala ohovenyaga aasogolrelraga akuda Sikemu atene, liye dowa wana na mulombwana Abimeleki. 40Evale mulombwana Gala ohoromaga tawa eto Abimeleki ohomutamangiha. Eto kohoporeyaga alombwana adjindji fiyeda vovolowela va mulango wa sidadile. 41Noira eno, Abimeleki ohowelela sidadi ya Aruma. Eto mulombwana Zebuli ohomutamangihaga mulombwana Gala vamohi na abalaye atene ira kahakalege sidadi ya Sikemu.
42Fwanyeya ira mmetcheloni muwa akuda Sikemu atene kohodowaga mmindani. Mwa enne mulombwana Abimeleki ohowandeliwaga zela jejile. 43Evale Abimeleki ohatukulaga atwaye, liye agawa makuru mararu. Kohomaruwaga aliwa dowa vitala mmindani mule. Evale aliwa kagamanle vitala, kagaing'anne, kohaonaga atu kakumaga musidadi mule. Mwa enne aliwa kohovenyaga mwemo mwavitanlege atu mule, aliwa mala apa atwale. 44Tchoira mulombwana Abimeleki vamohi na anyakondo kafwanyeya na liye kohotamanga, aliwa dowa kala va mulango va sidadile. Mbwenye makuru menli amohiwa ale katamangele wa atu anne kafwanyeya mmundani mule, aliwa mala apa atene. 45Eto Abimeleki ohowanaga na atu a musidadi mule siku natene nenne, liye fiyeda itukula sidadile. Eto ohapaga atu kafwanyeya musidadi mule, liye mala ibwanyula sidadile, nomala eno ohovokedamo mwinnyu sidadi yatenene.#9:45 Afwase para Abimeleki vokedamo mwinnyu sidadi yatenene ali muwari motembelrelra sidadi yenno.
46Mwa enne akuda Sikemu amohiwa kagavwile zela jejo jaaireyele afwiwa, kohovolowaga nimburo nolimba nofwanela tawelamo, nyumba yomutamalelamo mulugu wewa Baali-Berite. 47Mwa enne Abimeleki ohowandeliwaga ira atu atene a Sikemu kohogumana wewule. 48Mulombwana Abimeleki agavwile enne, ohodowa gwela mwango wa Zalimomi vamohi na atwaye atene kafwanyeya na liye. Evale liye ohotukulaga mbazo, liye gwadana tambi imohi eni ya kuni, liye venyiha, kapatcha vafudi vaye. Noira eno, ohowongaga na atu atene kafwanyeya vamohi na liye, kwi: <<Na nyenne muirena tchineneva mobaranya yenno mudionnena nyo miyo diiragana.>> 49Mwa enne kada mutu ohogwadaga tambi yaye ya kuni, kapatcha, aliwa muharaga Abimeleki. Kohodowaga aliwa gudela tambi datene edile nimburo nolimba nofwanela tawelamo nne, aliwa hindiha nimburo nne na munlo. Mwa enne nimburo nolimba nofwanela tawelamo nne nohojaga vamohi na atu atene a Sikemu kafwanyeyaga emule. Evale kohokwaga wandamelana atu 1.000 alombwana vamohi na ahiyana.
Kwa wa Abimeleki
50Noira eno, mulombwana Abimeleki ohodowaga sidadi ya Tebeji, liye irindja sidadile, liye igondjiha. 51Mbwenye vari va sidadile vohokala nyumba yolapa yolimba ya gwarda. Mwa enne alombwana atene na ahiyana atene vamohi na atu atene a sidadile kohodowaga, aliwa tawela emule, aliwa mala funga milango datene, aliwa kala muwari. Noira eno, kohogwelaga, aliwa dowa kala nyumba ya muzulu. 52Evale Abimeleki ohodowaga ante liye fiya nyumba yolapa ile, liye vendaga makalelo obwanyula nyumbele. Noira enne liye ohofiyaga wandamelaga va mulango va nyumba yolapa ile ira ahindihe nyumbele na munlo. 53Mbwenye ohokalawo muhiyana mmohi eni anvokilege Abimeleki na mwanapelo, liye mbubudana vamuru. Evale muru wa Abimeleki ohofiyedaga tweya. 54Mwa enne mulombwana Abimeleki ohomuitanaga mobaranya muzombwe wenno atukuletcha jowanana jaye, liye ira: <<Kapulula supada nawo udipena, tawiha ira anadiwongege kerege: <Abimeleki upiwe na muhiyana!> >> Evale muzombwaye ule ohomulataga na supada naye, liye kwa. 55Mwa enne alombwana a Izarayeli kamuharetcha Abimeleki kagaonne ira uhukwa, kada mutu ohodowaga vande vaye.
56Mwa eno, Mulugu ohomuweliheda mulombwana Abimeleki ubure wamuirele liye babaye, aapaga abalaye 70. 57Eto Mulugu ohaweliheda akuda Sikemu ubure watene wairile atu vamuru vewa. Mwa enne matembelrelro matene awongile mulombwana Jotawu mwana Jerubaali, kohoza afwanya aliwa nnga mwemo mwawongele liye.
Currently Selected:
Anamasogolrelra 9: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
