Anamasogolrelra 21
21
Tolotchiwa wa akuda Jabeji-Jileyadi
1Fwanyeya ira alombwana a Izarayeli koholumbela Mizipa ira: <<Muwari mwa hiyo kaza akalavo mutu unafuna za nvaha nkuda Benjami mwanaye wa muhiyana ira amutele.>> 2Mwa enne kondo ile yagavirile, mulogo watene kohodowaga Beteli, aliwa garati vamentoni va Mulugu ante tchiguwo eto kohotomolaga kuto, aliwa roma nla na makalelo ohokala a masika, 3keraga: <<Nihikwa hiyo! Yehova Mulugu wa Izarayeli, peno muwari mwa Izarayeli nihidimelamo nlogo nimohi. Kodi mwasiwa gwa nni ireya jokala ha jeji?>> 4Mwa enne mmetcheloni muwa mulogo watene wohovenyaga na mabebehene, aliwa sakanya ibuwa ya mukuto, aliwa velela mikuto dotumeya vamohi na jovelela ja murendele. 5Mwa enne Ana Izarayeli kohowongaga keraga: <<Kodi muwari mwa malogo matene a Izarayeli, atu bavi kahadowile gumana na aIzarayeli atene vamentoni va Yehova?>> Tchoira aliwa kohosakanya yolumbela ilukulu zela atu anno kahafune dowa gumana vamohi na afwiwa vamentoni va Yehova ilambo ya Mizipa, aliwa ira mutu wenno ahanaze na ibaribari unagomela kwa. 6Eto Ana Izarayeli ale kohokagana kumbanya zela abaliwa akuda Benjami, aliwa ira: <<Peno nihigwadiwa nlogo nimohi na Izarayeli. 7Kodi hiyo nnafuna niire avi zela alombwana amohiwa kahanle ale ira kakayena ahiyaniwa? Tchoira hiyo noholumbela vamentoni va Yehova ira: <Muwari mwa hiyo kaza akalavo mutu unafuna za nvaha nkuda Benjami mwanaye wa muhiyana ira amutele.>?>>
8Evale kohowongaga, aliwa ira: <<Kodi muwari mwa malogo a Izarayeli ukala nlogo nahadowile wa Yehova ilambo ya Mizipa siku nenne?>> Mwa enne funa sakasaka, kohofwanyaga ira kalivo nkuda Jabeji-Jileyadi nne mmohi azilege vamisasani vale vevo vagumannege atu. 9Tchoira kagamanle sokana ira kawane, kaaligivo nkuda Jabeji-Jileyadi afwanyeya evale, nne mmohi. 10Mwa enne anamwindji ale koharumaga alombwana 12.000 a kopolo ira kadowe wewule, aliwa ira: <<Mudowe Jabeji-Jileyadi, mwaape atu atene na masupada masiki kala ahiyana vamohi na ahimiwene. 11So mbwenye yengo imohi inafuna hiyo uwandelani ira muirena, tchi ila: Mwanfwanya mulombwana uli watene nari muhiyana omuiziwa mulombwana, atene anno mwaatolotche. So munamuhiya namwali uli watene aharomile gona na mulombwana.>> 12Mwa enne aliwa kagadowile, muwari mwa atu atene a Jabeji-Jileyadi, kohafwanyamo anamwali 400 anno kali kahanagone na mulombwana uli watene. Evale kohatukula, aliwa adowana vamisasani sidadi ya Silo mwilamboni mwa Kana.
Akuda Benjami kohovahiwa ahiyana ira kaatele
13Noira eno, atu atene koharuma atu ira kadowe nibweni wa Rimoni wewo wafwanyeya alombwana a Benjami ohala ale, aliwa ira: <<Mudowe mwaawandele ira kawelewo mwa murendele.>> 14Evale mwa tempu imohive akuda Benjami ale kohowelawo. Kagawenlewo, aIzarayeli ale kohavaha ahiyana a Jabeji-Jileyadi anno kahapiwile ira kakale ahiyaniwa. Mbwenye ahiyanale tchaakwakwanne. 15Mwa enne mulogo watene kohokagana akumbanya akuda Benjami ale, voira muwari mwa malogo a aIzarayeli, Yehova ohapiha adjindji a nlogo nimohi, halaga vang'ono ira nidimele wene.
16Evale andimuwa a mulogo watene wa Izarayeli kohowongaga keraga: <<Kodi nnafuna niire avi para apata ahiyana amohiwa ira naavahe alombwana a Benjami ohala kahanna ahiyana? Tchoira ahiyana atene a nlogo na Benjami kohomala piwa.>> 17Mwa enne kohowongaga aliwa ira: <<Kavikale wandeya ira nlogo nimohi na Izarayeli nifiyede dimela wene. Inafwanela nivendeni makalelo oira nlogo na Benjami nahadimele. 18So mbwenye kavinakala jowandeya ira hiyo nnoavaha ahimihu ira kaatele.>> Kawongela eno mwasiwa Ana Izarayeli koholumbela ira: <<Mutu wenne unamutukule mwanaye wa muhiyana amuteliha na nkuda Benjami, unagomela tembelrelreya.>> 19Evale kohowongagave keraga: <<Kaing'anani, ihiwandamela tempu inagumanetcha atu va kada yaka ira kadje pwando vamentoni va Yehova sidadi ya Silo, pandi ya norti wa Beteli, pandi ya suli wa sidadi ya Lebona eto makumelo wa nzuwa wa ndila inakuma Beteli idowaga Sikemu.>> 20Mwa enne koharumaga akuda Benjami ale, aliwa ira: <<Muvenye, mudowe wewule, mwavitale mmindani mwa uva. 21Mwaaona anamwali a sidadi ya Silo ule kadowaga ira karome ina, na nyenne mukume mmindani mwa uva mule, mudowe mwarome ahinda kada mutu muhiyana waye waye, mwaatukule mwaadowegena ilambo ya Benjami. 22Era eno ababiwa owu hehi arongoliwa kaza, karekalamari wa hiyo zela jejo, hiyo nnoawandela niire: <Pepani, nnauvepani ira mwaawendele tangaranga, tchoira tempu yawana hiyo kaniwandile apata ahiyana okwakwana ira kada mutu akayena muhiyanaye. Mwa eno, voira nyo kamwire avaha mofuna mwenyu, nyo mbwenye kamunnavo mulandu.> >>
23Evale akuda Benjami ale kohoirana nnga mwemo mwawandeliwele atu. Mwa enne kohodowaga, kada mutu liye muhinda muhiyana muwari mwa ahiyana anno kainaga, aliwa azana, aliwa kala ahiyaniwa. Noira eno, kohowelelaga mwilamboni mwiwa kavahiwe atu. Eto kohomangaga sidadi dile akoka, aliwa kalaga mwemule. 24Eto Ana Izarayeli na aliwene kohomaruwaga, kada mutu liye welelaga nlogoni waye vamohi na atu a muibalini mwaye eto noira eno kada mutu ohodowaga mwilamboni mwaye muvahiwe liye.
25Muwari mwa malambo anne, mwilamboni mwa Izarayeli kamwali mwene. Kada mutu airana yenno yaona liye kala yofwanelela vamentoni vaye.
Kukala mazu a livuru na Anamasogolrelra.
Currently Selected:
Anamasogolrelra 21: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
