Anamasogolrelra 20
20
AIzarayeli kohaweliheda kunyakunya aBenjami
1Noira enne Ana Izarayeli kohomaruwaga eto anamwindji atene kohogumanelaga nnga mutu mmohive, kuma Dani ante Beriseba vamohi na ilambo ya Jileyadi, aliwa dowa vamentoni va Yehova ilambo ya Mizipa. 2Eto asogolrelri a atu atene vamohi na malogo matene a Izarayeli kohogumanelaga nimburo nimohive muwari mokana gumana wa atu a Mulugu. Fwanyeya ira kaligi alombwana 400.000 owenda na mendo, atene kagali alombwana katukunle masupadiwa. 3Fwanyeya akuda Benjami tchadowilewo, mbwenye aliwa kohovwa ira malogo matene amohiwa a aIzarayeli kohogumanela ilambo ya Mizipa. Evale aIzarayeli ale kagafiyile Mizipa ule, kohowongaga keraga: <<Hiyo nazela nifukede, kodi makalelo bavi kaireyile zela yotakala yenno ivwile hiyo?>> 4Evale muLevi wenno ali muhiyana apiwe ule mamunaye, ohowakulaga, liye ira: <<Miyo dafiyile na mwendaga ilambo ya Jibeya sidadi ya Benjami ira nihaye wewule siku nenne. 5Mwa enne akuda Jibeya ale kohovenyaga ira kaze kadiirele ubure, aliwa za na mahiyu, irindja nyumba yafwanyeya miyo, aliwa funaga jodipa. Eto kohomutukula mwendaga ule, roma mugoniha momuhindela ante liye fiyeda kwa. 6Evale mwendagole agakwile, dohomutukula, miyo nvarula yano yano, noira eno miyo arumiheda malogo matene a aIzarayeli, mwasiwa akuda Jibeya ale kohoirana yengo ya manyazo, yengo yotakaletchetcha muwari mwa Izarayeli. 7Nyo aIzarayeli atene munafwanyeya eva peno, inafwanela mutchokotchele inafuna nyo iranavo zela jokala ha jejo.>> 8Mwa enne atu atene kohovenyaga muwari movwanana nnga mutu mmohive, aliwa wonga keraga: <<Muwari mwa hiyo kalivo nne mutu mmohi unafuna welela musasani waye eto nne kalivo unafuna dowa vande vaye. 9So mbwenye hiyo nnafuna niire eni. Nnafuna nivenye ira nawane na akuda Jibeya. Nnoasakulra anafuna dowa wana muwari mwa ngari. 10Eto muwari mwa malogo matene a Izarayeli hiyo nnafuna naatukule alombwana 10 va kada atu 100, eto va kada atu 1.000 nnoatukulamo alombwana 100, eto va kada atu 10.000 nnoatukulamo alombwana 1.000. Atene anno nnafuna hiyo asakulramo aliwa banafuna hala ira kaavendelege jodja afwiwa anno anafuna dowa kondoni. Mbwenye atu atene amohiwa, aliwa anodowa kondoni ira kaawelihede akuda Benjami a sidadi ya Jibeya mokwakwanela na jotakaletchetcha jatene jiirilena atu muwari mwa Izarayeli.>> 11Mwa enne aIzarayeli atene anne kohogumanelaga muwari movwanana nnga mutu mmohi ira kadowe kawane na sidadi ya Jibeya.
12Evale malogo a Izarayeli koharuma alombwana angasi angasi ira kadowe ilambo yatene ya Benjami na milanyo doira: <<Kodi ubure wenno usakanyiwe muwari mwa nyo ubure nni? 13Hiyo nnafuna munivahe alombwana a makalelo abure anafwanyeya Jibeya, anno kasakanyile ubure wenno, naape ira niwande kumihamo ubure muwari mwa Izarayeli.>> Mbwenye akuda Benjami ale tchafunne vwa mazu anno kawongile abaliwa Ana Izarayeli. 14Eto mofutukula, akuda Benjami ale kagavwile mazu anne, kohokumaga muwari mwa sidadi diwa, aliwa gumanela Jibeya ira kadowe kawane na Ana Izarayeli. 15Siku nenne anyakondo kakala muwari mwa sidadi da akuda Benjami ale kohosokana, aliwa gumana. Mwa enne kafwanyeyaga kagali alombwana okwakwana 26.000 owana na supada, hiya anyakondo amohiwa 700 a Jibeya oiziwa wana pama. 16Muwari mwa atu atene anne, mwafwanyeya alombwana 700 oiziwa wana pama olabana muwono oromana, anno kawanda voka nibwe na yovokana kawandaga vanda nsisi, fendo imohive bahi kahavonyile. 17Eto aIzarayeli kafuna dowa wana na akuda Benjami kagasokanne, kafwanyeya ira kali alombwana okwakwana 400.000 owana na supada, atene kagali alombwana owanda wana pama. 18Mwa enne aIzarayeli ale kohomaruwaga, aliwa dowa Beteli. Eto kohonfukaga Mulugu aliwa ira: <<Kodi muwari mwa hiyo bani unafuna kala murandji ira awane na akuda Benjami?>> Evale Yehova ohawakula, liye ira: <<AJuda banafuna kala arandji dowa wana.>>
19Noira enne aIzarayeli kohovenyaga na mabebehene, aliwa dowa kunga misasa diwa wandamelana Jibeya ira kawane. 20Evale alombwana a aIzarayeli ale kohovenyihanaga ira kadowe kawane na akuda Benjami, aliwa tandana wandamelana sidadi ya Jibeya. 21Mwa enne akuda Benjami kohokumaga Jibeya, aliwa apa siku nenne alombwana a aIzarayeli okwakwana 22.000. 22Mbwenye aIzarayeli ale kohovilimbihedagave, mmetcheloni muwa aliwa tandana akoka nimburo nimohive neno vawana atu siku noroma. 23Evale aIzarayeli kohodowaga, aliwa roma nla vamentoni va Yehova roma mabebehi ante tchiguwo keraga: <<Yehova, kodi hiyo podi welela ira nawane akoka na abalihu akuda Benjami?>> Evale Yehova ohawakula ira: <<Kadowani mwawane na aliwa.>>
24Mwa enne mmetcheloni muwa aIzarayeli kohodowaga ira kawane na akuda Benjami fendo yanembinli. 25Eto akuda Benjami na aliwene mmetcheloni muwa kohokumaga muwari mwa sidadi ya Jibeya ira kadowe kagumane na afwiwa ale ira kawane. Eto na fendo yenne kohapagave alombwana amohiwa a aIzarayeli owana na supada okwakwana 18.000. 26Noira enne alombwana atene owana kondo vamohi na aIzarayeli atene kohodowaga Beteli, aliwa roma nla eto kohogarati vati vamentoni va Yehova, aliwa jejuwari siku natene ante tchiguwo eto kohovelelaga mikuto dotumeya vamohi na jovelela ja murendele vamentoni va Yehova. 27Evale aIzarayeli kohonfukaga Yehova, (tchoira malambo anne Kaxa ya Yopangana ya Mulugu yafwanyeya Beteli wewule. 28Eto malambo anne mulombwana Fineyasi mwana Eliyazari, muzula wa Arawu, gwalabetchana Kaxa ya Yopangana ile.) Evale aliwa kohonfuka Yehova keraga: <<Kodi nyo munofuna ira nidowe akoka nawane na abalihu akuda Benjami owu hehi kaniyewo?>> Evale Yehova ohawakula ira: <<Kadowani, tchoira metchelo miyo nnouvahedani aliwa mmandani mwenyu.>>
29Mwa enne aIzarayeli kohoiwereweraga sidadi ya Jibeya, aliwa ihela vari, aliwa mala vitala. 30Siku naneraru aIzarayeli kohomaruwaga, aliwa dowa ira kawane na akuda Benjami, evale kohotatamulaga kondo, aliwa roma wana wandamelana sidadi ya Jibeya nnga jaira atu fendo dimohi diwa dile. 31Evale akuda Benjami na aliwene kohomaruwaga ira kadowe kawane na aIzarayeli ale, aliwa roma kumagamo musidadi mule, dowaga olapela wene nnga mwafunele aIzarayeli. Evale nnga jaira atu fendo doroma dile, aBenjami kohoroma aporotcha aIzarayeli a vang'ono, aliwa fiyeda apa alombwana okwakwana 30 muwari mwa rampa nlukulu na Beteli na rampa nlukulu na Jibeya vamohi na mmundani molimiwa. 32Mwa enne akuda Benjami ale kohowongaga keraga: <<Ante va eni nihimala agondjiha nnga fendo dimohi diwa dile.>> Mbwenye Ana Izarayeli kohowongaga keraga: <<Ndoweni nitaweni, ira naarambelihe sidadila, naadowena mmandila olapela wene na sidadila.>> 33Mwa enne alombwana atene a Izarayeli kohovenyaga mwafwanyeya atu, aliwa tawela Baali-Tamari, aliwa tandana wewule ira kawane. Eto mwa tempu yaira atu enne, aIzarayeli amohiwa anno kavitanle unde wa sidadile kohovituwaga mwemo mwavitanlege atu wandamelana Jeba. 34Mwa enne alombwana 10.000 oiziwa wana pama a aIzarayeli kohotatamulaga kondo na akuda Jibeya. Evale kondo yohokahaga eto akuda Benjami ale tchaaiziwile ubure watene wafuna afwanya. 35Evale siku nenne Yehova ohosakanya ira aIzarayeli kawande agondjiha akuda Benjami, aliwa apa aBenjami okwakwana 25.100, atene okana masupada. 36Mwa enne akuda Benjami kohoonaga ira: <<Nihimala gondjihiwa.>>
Alombwana a Izarayeli karomile tawa vamentoni va akuda Benjami muwari moaroromela afwiwa amohiwa anno kamanle ivitalela sidadi ya Jibeya ile. 37Evale akuda Benjami kagamanle dowa olapela wene na sidadi, aliba vitala ale kohovenyaga, aliwa volowa muwari mwa sidadi ya Jibeya mule mobaranya, aliwa mala mwadeyela mwatene, aliwa apa atu atene kafwanyeya musidadi mule na masupadiwa. 38Eto fwanyeya ira alombwana a Izarayeli ale kohovahana ionihedo na aliba vitala ale. Ionihedo yavahanne atu yali yoira: <<Mwavolowa musidadi mule, muvenyihe mirambo da utchi ohokala wa masika digwelege zulu, 39mwaira eno hiyo nnowela ira nize nirome wana na aliwa.>> Tchoira akuda Benjami ale vaonne atu ira kohapa aIzarayeli okwakwana 30, kaumbuwela ira: <<Eni hiyo nihimala agondjiha nnga fendo dimohi diwa dile.>> 40Mbwenye utchi agaromile gwela zulu musidadi mule, akuda Benjami ale kagarungunuwile, funa ing'ana mundulri, anaona sidadi inaja, utchi ohokala wa masika unagwela zulu. 41Eto alombwana a Izarayeli kohorungunuwaga, aliwa roma wela aharaga aBenjami ale. Mwa enne alombwana a Benjami ale kohosanyeyaga, mwasiwa kohofiyeda onelramo ira jehu jihimala nirutcha. 42Evale kohorungunuwaga kaatawaga alombwana a Izarayeli, aliwa tawelaga ndila ya muisalesaleni. Mbwenye kondo ile yohasanyaga eto kohopiwaga na alombwana kakumelaga sidadi dowandamela na wewule. 43Mwa enne koharindja akuda Benjami, aliwa roma apaga na ndila fiyeda sogolro wa Jibeya pandi ya makumelo wa nzuwa. 44Mwa enne kohokwaga alombwana a Benjami okwakwana 18.000, atene kagali anyakondo a kopolo. 45Amohiwa ohala kohorungunuwaga, aliwa tawela muisalesaleni, dowa vitala nibweni wa Rimoni. Eto aIzarayeli kohapaga amohiwa okwakwana 5.000 mundila kaatamangihaga. Evale aIzarayeli kohokalelagave ahara ante Jidomi, aliwa fiyeda apa amohiwa okwakwana 2.000. 46Agumaniha akuda Benjami atene kakwilege siku nenne, kaligi okwakwana 25.000 okana masupada eto atene anno kagali anyakondo a kopolo.
47Mbwenye alombwana 600 a Benjami kohorungunuwaga, aliwa tawela muisalesaleni, dowa nibweni wa Rimoni, aliwa kala nibweni wewule fiyeda medi minnayi. 48Eto alombwana a Izarayeli kohowelelaga sidadi da akuda Benjami, aliwa dowa mala apa atene na masupadiwa romela alombwana atene na anavinyama ewa atene vamohi na jatene janna atu eto sidadi datene dafwanyile atu mundila, kohotumeya na munlo.
Currently Selected:
Anamasogolrelra 20: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
