Anamasogolrelra 2
2
Yehova ohasumulula aIzarayeli
1Noira eno, Mungelro wa Yehova ohokumaga Jiligali dowa Bokimi, liye wonga na aIzarayeli eraga: <<Miyo duhukumihani ilambo ya Ijipitu, miyo uzanani ilambo yenno yalumbenle miyo na ababinyu ira: <Miyo kadiza ditwa yopangana yaga na nyo. 2Nyo mbwenye kamusakanye yopangana yowandana na atu anakala mwilamboni muno. Mofutukula mubwanyule vibuwa dewa da mukuto.> Nyo mbwenye kamufunne vwelela nizu naga. Kodi muirele nni jokala ha jejo? 3Nona miyo peno nnouwandelani ira kannaatamangihavo akuda Kana vari venyu. Aliwa anokala nnga minga doulatani mbaru dinyu eto amilugu ewa anokala ratuwero unafuna umangani.>> 4Mungelro wa Yehova ule agawongile mazu matene anne na aIzarayeli atene, aliwa kohotomola kuto, aliwa nlaga. 5Na mwasa wenne, kohovaha nimburo nenne nzina na Bokimi [ku wonga nla] eto kohovelela mikuto da Yehova evale.
Jozuwe na andimuwa a aIzarayeli kagakwile, aIzarayeli kohomuhiya Mulugu
6Fwanyeya wanle viwa vo, Jozuwe agamanle agawela aIzarayeli ilambwiwa, liye ohagunya, kada nlogo nohodowa ira natukule ilambo yagaweliwe atu. 7AIzarayeli kohomuhara Yehova malambo matene aliwo mulombwana Jozuwe vamohi na malambo matene a andimuwa atene anno kaliwove Jozuwe agakwile, anno kaonne mabasa matene mandimuwa alabile Yehova muwari mwa aIzarayeli. 8Evale mulombwana Jozuwe mwana Numi, namalaba wa Yehova, ohokwa aganna yaka 110. 9Evale kohomukoya muwari mwa ilambo yagaweliwe liye sidadi ya Timinati-Hereji pandi ya mwango didjindji da Efarayimi, norti wa mwango Gaji.
10Noira enne atu atene a tempu yenne kohomala kwa, aliwa dowa gumana na makolo ewa. Evale kahanlewo ali ahimiwene. Ahimiwa anno kazilewo makolo ewa kagakwile kali atu ohomuiziwa Yehova eto tchaiziwile jatene Yehova jaairele liye aIzarayeli. 11Mwa enne Ana Izarayeli kohosakanya jabure vamentoni va Yehova. Aliwa kohoroma atamalela amilugu kaitaniwa aBaali.#2:11 amilugu kaitaniwa aBaali koindjiva tchoira muwari mwa akuda Kana, kada sidadi yohara Baali yokana mulugu wewa wa Baali wenno aitaniwa na nzina na sidadi yenno. Nione Numero 25:3; Anamasogolrelra 8:33; 2 Amwene 1:2. 12Eto kohomuhiya Yehova Mulugu wa makolo ewa wenno aakumihile ilambo ya Ijipitu, aliwa dowa roma ahara amilugu amohiwa anno kaahara atu a vilambo dawandamannena atu. Evale kohoroma akokorela, aliwa tatamulaga uwali wa Yehova. 13Tchoira aliwa komuhiya Yehova, aliwa roma aharaga amilugu kaitaniwa aBaali na aAxitaroti. 14Na mwasa wenne, Yehova ohotakaleliwa na makalelo ohokala a masika zela aIzarayeli, evale ohavaheda mmandani mwa amadjuba, aliwa za roma abelaga jengo jiwa. Yehova eto ohavaheda mmandani mwa amwidaniwa kafwanyeya vilambo dowandamelana. Mwa enne aIzarayeli tchawanda wana na amwidaniwa. 15Fendo datene aIzarayeli kadowa atu kondoni, Yehova ovenyiha ndanda naye na kopolo, liye roma aoniha ubure nnga mwemo mwawongele liye eto nnga mwemo Yehova mwalumbenle liye. Mwa enne kohokala mmakatamihoni mohokala mwa masika.
16Noira eno, Yehova ohavenyiha anamasogolrelra, aliwa za avunela aIzarayeli mmandani mwa atu anne kaabela jengo jiwa. 17Mbwenye aliwa tchafunne avwelela anamasogolrelra ale. Mofutukula kohoroma muhiya Yehova, aliwa aharaga amilugu amohiwa, aliwa roma akokorelaga. Agali ababiwa kali atu ovwelela malamulo a Yehova, aliwa mbwenye mohodibeliwa kohiya ndila yenno. 18Eto fendo datene Yehova anvenyiha liye namasogolrelra, Yehova okala na namasogolrelra ule eto oavunela aIzarayeli muwari mwa amwidaniwa malambo matene akalawo namasogolrelra ule. Mwasiwa Yehova oawendela tangaranga na mwasa onla wewa zela atu anne kaazuzumiha kaaonihaga goyi. 19So mbwenye namasogolrelra ule akwa, aliwa kowelela viringana akoka akwaranya ababiwa makalelo kaviringanile atu, aliwa roma aharaga amilugu amohiwa, kaalabaga eto kaakokorelaga aliwene. Aliwa tchawanda hiya mabasiwa matene nne ndila diwa da uvuruvuru dile. 20Na mwasa wenne, Yehova ohotakaleliwa na makalelo ohokala a masika zela aIzarayeli, liye wonga eraga: <<Atwala kohoviringaniha yopangana yaga yenno yaawandenle miyo ababiwa. Aliwa kifunile vwa nizu naga. 21Nona miyo kadiza daatamangiha malogo anafwanyeya vari vewa, malogo anno Jozuwe aahiyile liye akwaga. 22Nnafuna diirena eno ira daawombeze aIzarayeli ira dione akala aliwa anokala oharihamo ndila ya miyo Yehova na makalelo nnga kaharihamo ababiwa.>> 23Mwasiwa ali wenno Yehova ahiyaga malogo ale, ahabaranyedaga atamangihamo eto ahaavahedaga mmandani mwa Jozuwe ira aagondjihe.
Currently Selected:
Anamasogolrelra 2: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
