Anamasogolrelra 14
14
Tela wa Samisawu
1Siku nimohi Samisawu ohodowaga sidadi ya Timina.#14:1 sidadi ya Timina yali sidadi imohi ya aFilistewu. Agadowile wewule, ohomuona muhiyana mmohi mwana wa aFilistewu. 2Agamuonne muhiyanole, liye dowa muwandela babaye na mmaye, kwi: <<Dihimuona muhiyana mmohi muwari mwa aFilistewu, sidadi ya Timina. Nnafuna mudowe mwanitelihe, akale muhiyanaga.>> 3Mbwenye babaye vamohi na mmaye kohonfuka, aliwa ira: <<Mwasiwa gwa nni we funaga dowa mutela muhiyana muwari mwa aFilistewu, atu ohoineliwa nnga anne? Kodi muwari mwa nlogo nehu owu hehi muwari mwa aIzarayeli atene kalimo muhiyana ofwanela ira umutele?>> Evale Samisawu ohomuwandelaga babaye eraga: <<Miyo difunne mwaditelihe na liyene, mwasiwa liye uhudiriyela.>> 4Mbwenye jaireya atu enne, babaye vamohi na mmaye tchaiziwile ira jejile jazela wa Yehova. Tchoira Yehova gwairihile ira awande airela ubure aFilistewu, mwasiwa tempu yenne aFilistewu baatonga aIzarayeli.
5Noira enne Samisawu ohomaruwaga na babaye vamohi na mmaye, aliwa dowa sidadi ya Timina. Evale kagafiyile minda da uva da Timina ule, ohokalawo mwana podogoma mmohi amukumelenle Samisawu, roma muombelaga turumba. 6Mwa enne Munemba wa Yehova ohomuzela mulombwana Samisawu. Masiki ahannave yengo mmandani mwaye, ohomuhinda mwana podogoma ule na manda, liye nvarula, kalaga nnga mutu avarulaga mwana mbuzi. Mbwenye liye kamuwandenle babaye nne mmaye zela jejo jairile liye. 7Noira eno, Samisawu ohodowaga tapanya na muhiyanole eto muhiyanole ohomuriyela. 8Noira eno, vagamanle malambo, ohowelaga, liye dowa ira amutele. Adowaga mundila, agaperuwile ira adowe amuone podogoma ampilege liye ule, afwanyilege mirimani wa podogoma ule wagali nuwi dohokala da masika vamohi na mahindjiwene. 9Evale liye ohokumihamo makanda a nuwi na mandaye, liye djaga na ndila adowaga. Eto agaafwanyile babaye na mmaye, ohoavahagamo, na aliwene aliwa dja. Mbwenye kaawandenlege ira nuwi dile akumihilege mirimani wa podogoma. #14:9 kaawandenlege ira nuwi dile akumihilege mirimani wa podogoma. Samisawu ohoirana yengo yotakala muwari mokwivela mwanainyama okwa, liye kumihamo nuwi na mandaye. Tchoira aIzarayeli wanle kokamelihiwa hinda maningo a mwanainyama yokwa. Nione Levitiku 5:2, 11:27. Eto nuwi dile dohotakalihiwa na mwasa okala muwari mwa mwanainyama okwa. Nione Levitiku 11:35.
10Noira eno, babaye agamaruwile, agadowile wa muhiyanole waniwa, Samisawu ohosakanyaga pwando wewule nnga jairetcha azombwe tempu yenno. 11Mwa enne aFilistewu vamuonne atu Samisawu ule, kohaitana azombwe 30 ira kaze vapwandoni vale, kamukalihevo.
Tchilrape wa Samisawu
12Evale aliwa kagali muwari mwa pwando, Samisawu ohowongaga na azombwe ale liye ira: <<Miyo nnafuna diwonge tchilrape eni ira mupele. Eto mwawanda pela muwari mwa malambo matanu na menli a pwando ila, miyo nnouvahani kamiza 30 vamohi na jowara jotchindja fendo 30. 13Eto nyo mwahawande pela, nyo gunafuna divaha miyo kamiza 30 vamohi na jowara jotchindja fendo 30.>> Evale aliwa kohomuwakula, aliwa ira: <<Kawonga tchilrape wawo, hiyo nnafuna nivwe.>> 14Evale liye ohawandela, liye ira: <<Muwari mwa namadja afwaye, muhukuma yengo yodja eto muwari mwa yengo ya kopolo, muhukuma yengo yotapilra.>> Evale liye agawongile, aliwa kohomala malambo mararu kahawandaga pela tchilrape ule.
15Noira eno, nagafiyile siku nanennayi,#14:15 nagafiyile siku nanennayi: MaBibiliya amohiwa anawonga ira: nagafiyile siku nanetanu na mbinli. kohomuwongana mwadi Samisawu, aliwa ira: <<Umusembeselre mamunawo ira auwandele yotapulela ya tchilrape awongile liye, amala uniwandele. Mbwenye wahairena, hiyo nnoutumeya na munlo weyo vamohi na abali atene a vande va babawo. Kodi muniitanele vano ira munibele?>> 16Evale mwadi Samisawu ohodowaga nla vamentoni va mamunaye, liye ira: <<Weyo eni unadiida. Kunadiziveliwa. Tchoira uhuwonga tchilrape na atu a nlogo naga ira aliwa kawande pela eto nne na miyene da muhiyanawo kufunne diwandela yopeliwa.>> Evale Samisawu ohomuwakulaga, liye ira: <<Uing'ane, miyo nne babaga nne mmanga kadimuwandenle yopeliwa, kodi vogokala jowandeya ira duwandele weyo?>> 17Evale muhiyanole ohonla vamentoni va Samisawu fiyeda mala wa pwando ile. Mbwenye nagafiyile siku nanetanu na mbinli, Samisawu ohomuwandelaga muhiyanaye ule, na mwasa oira osimbwa musanya. Mwa enne muhiyanole ohodowaga awandela atu a nlogo naye ale yopela ya tchilrape awongile Samisawu. 18Mwa enne siku nanetanu na mbinli, tempu ya tchiguwoni nzuwa nahanavire, alombwana a sidadile kohomuwandelaga mulombwana Samisawu aliwa ira: <<Kodi ihikalawo yengo yotapilretchetcha kwaranya mahindje a nuwi? Eto kodi ihikalawo yengo ya kopolo kwaranya podogoma?>> Evale mulombwana Samisawu ohowongaga liye ira: <<Ahakala mulimiha mwana ng'ombe yaga, kamwawanda pela tchilrape dawongile miyo.>>#14:18 <<Ahakala mulimiha mwana ng'ombe yaga, kamwawanda pela tchilrape dawongile miyo.>>: Ku wonga ira: <<Ahakala mutapanya na muhiyanaga, kamwawanda pela tchilrape dawongile miyo.>> 19Noira enne Munemba wa Yehova ohomuzelaga, liye venyihana mobaranya, dowa sidadi ya Ajikelomi, liye apa alombwana 30,#14:19 dowa sidadi ya Ajikelomi, liye apa alombwana 30: Atu kapiwe na Samisawu ale kafwanyeya kagali aFilistewu. Eto atu Samisawu aavahile liye jowara jile, na aliwene kafwanyeya kagali aFilistewu. liye aungula jowara jiwa, dowa avaha alombwana anno kapenle tchilrape awongile liye ule. Agairilena enne, liye venyihana, dowaga vande va babaye agalive otakaleliwene na makalelo ohokala a masika. 20Eto mwada Samisawu vahanle liye, kohonvahaga nfwaye wenno ali mboziye tempu ya matelo, liye kala muhiyanaye.
Currently Selected:
Anamasogolrelra 14: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
