Jenesesi 45

Joze ohoviiziweyiha wa abalaye

1Mwa enne Joze kawandile vilimbiheda vari va atu atene kafwanyeya na liye. Evale ohawandelaga ira: <<Nyo atu amohiwa atene kakumanivo.>> Evale atu atene kagavenyilevo, Joze ohoroma vioneyiha wa abalaye. 2Ohoroma nla mokuwa fiyeda aIjipitu vamohi na atu atene a vande va Farawu aliwa vwa. 3Joze ohowonga na abalaye ira: <<Miyo dili Joze! Nnga baba ukalawove?>> Mbwenye abalaye ale kagavwile enne, kohorendjeyaga kaovaga. Mwa enne tchawandilege muwakula.

4Evale Joze ohowongagave eraga: <<Kadisusedeni.>> Aliwa kohosusaga, muwandamela. Evale liye ohowongaga eraga: <<Miyo dili mbalinyu Joze wenne mwamugulihile nyo na aJomayili kazaga Ijipitu uno. 5Mbwenye kamuove nne kamuvivahe mulandu na mwasa odiguliha fiyeda miyo za uno. Tchoira adizihile uno ali Mulugu ira miyo disogolre, dize muno nyo mwahanaze ira atu kawombowe mwa miyo. 6Eni vimanle yaka mbinli da ndala izile mwilamboni muno. Dihala yaka dimohi diwa tanu, wahali lima, wahali handa. 7Mulugu gwadisogolrihile ira diwande uwombolani nyo na makalelo mandimuwa ira ahiminyu kawande kalawo. 8Nona, kahi nyo udizihile uno, nari. Mbwenye gu Mulugu udisogolrelre ira dikale nnga babi wa Farawu eto dikale musogolrelri wa vande vaye vatene eto dikale mundimuwa osogolrelra ilambo yatene ya Ijipitu.>>

9Noira enne, Joze ohawandelaga abalaye ale eraga: <<Mubaranye mudowe mwamuwandele baba, mwaire: <Mwaninyu Joze ukalawo. Mulugu unvaheda utongi wa ilambo yatene ya Ijipitu. Liye unafuna mudowe wa liye mobaranya. 10Munodowa mwakale ilambo ya Gozeni, wandamelana unakala Joze, romela nyo na ahiminyu na azulinyu na mabila enyu na ng'ombe dinyu na jatene jinna nyo. 11Mwasiwa dihalawo yaka tanu da ndala. Miyo nnerege uvahani jodja nyo na ahiminyu na jatene jinna nyo ira mwahasimele.> >>

12Noira enne, Joze ohowongagave eraga: <<Nyo atene muli eva eni vamohi na mbalaga Benjami munodiona na meso enyu ira na ibaribari unawonga gu miyene Joze. 13Venyani mudowe mwamuwandele baba zela titimihiwa dinna miyo ilambo ya Ijipitu ila eto mwamuwandele jatene jejo jionne nyo. Mudowe mobaranya, mwamuzena baba tchineneva.>> 14Evale Joze ohodowaga liye nkumbarela mbalaye Benjami anlaga eto na Benjami wenne ohonlaga agali omukumbarelene mbalaye Joze. 15Noira eno, Joze ohabejarigi abalaye atene anne, aakumbarelaga, anlaga. Nomala eno, abalaye ale mirima diwa dohokurumuwaga, aliwa roma wonga na Joze.

Mwene Farawu ohawandela abali a Joze ira katamele Ijipitu

16Za wa Joze abalaye wohovweyaga fiyeda vande va Farawu. Farawu na anamalabaye kagavwile na aliwene kohoziveliwaga. 17Farawu ohomuwandela Joze, eraga: <<Waarume abalawo kagwelihe mitolro vazulu va vinyama diwa, kawelele mundulri ilambo ya Kana. 18Kadowe kamutukule babinyu vamohi na ahimiwa atene ira kaze kakalege mwilamboni mwaga mwa Ijipitu muno. Miyo nnoavaha ilambo yoriya muIjipitu eto aliwa anerege dja jovaha japama ja ilambo yenna. 19Eto miyo nnouruma ira waawandele abalawo ira katukule aaterelado a Ijipitu uno ira kawande azana ahimiwa, ahiyaniwa vamohi na babinyu. 20Eto aliwa kiumbuwele jengo jinafuna atu hiya mundulri, ineriha kaza uno, japama jatene ja muIjipitu muno jinakala jewa.>>

21Evale Ana Izarayeli kohovenyihana ira kawelele mundulri. Eto Joze ohavaha aaterelado nnga mwemo mwawongele mwene Farawu. Eto ohavahaga poso ira kadjege mundila. 22Eto Joze ohavaha abalaye atene jowara jixa. Mbwenye ohonvahaga Benjami jowara jomodari fendo tanu. Eto ohonvahaga kobiri 300 da parata. 23Joze ohatukula aburu kumi, gwelihavo jengo johiyana hiyana japama japama jafwanyeya muIjipitu mule, liye murumiheda babaye Jako. Ohomurumiheda eto aburu amohiwa kumi a ahiyana, agagwelihilevo jodja na pawu na poso ira babaye adjege azaga mundila.

24Noira enne, ohalanyaga abalaye ale, aliwa gundeya dowaga. Eto Joze ohawandelaga eraga: <<Mwadowaga mundila munawanege.>> 25Aliwa kohovenya Ijipitu, aliwa fiya wa babiwa Jako ilambo ya Kana. 26Kagafiyile, kohomuwandela ira: <<Joze ukalawove. Liye eni unafwanyeya agali mundimuwa wa ilambo yatene ya Ijipitu.>> Jako agavwile enne, ohokalaga lohulo mwasiwa karoromelaga jejo jawongaga ahimaye ale. 27Mbwenye kagamanle muwandelamo jatene jawongile Joze, Jako aing'anaga waza atu, ohoonaga aaterelado arumile Joze kazaga. Mwa enne pawandilege liye roromela, liye limba kopolo. 28Evale Izarayeli ohoiraga: <<Mwa ibaribari mwanaga Joze ukalawo. Ili yapama didowe damuone mwanaga, dahanakwe!>>

Currently Selected:

Jenesesi 45: iLolo

Highlight

Copy

Compare