Jenesesi 39

Joze agali vande va Potifare

1AJomayili kagamugunle Joze, kohomudowana Ijipitu, aliwa muguliheda musogolrelri wa agwarda atene a mwene Farawu, aitaniwa Potifare. 2Potifare agamugunle Joze, ohomudowana vande vaye, kala muzari waye. Yehova omusogolrelra Joze. Mwa enne jatene jene jomuwendela pama, liye kalagave vande va muIjipitu ule.

3Potifare ohoona ira Yehova ali na Joze eto Yehova omureliha zela mabasa matene alaba liye. 4Na mwasa wenne, Potifare ohomufwewela murima Joze. Mwa enne ohomutikela Joze ira akale mundimuwa osogolrelra jatene ja vande vaye. 5Roma vevale Joze vahambihiwe liye kala mundimuwa osogolrelra vande va Potifare vale, Yehova ohoreliha jatene ja vande va muIjipitu ule na mwasa wa Joze. Yehova ohoreliha jatene roma jengo ja vande vamohi na ja mmundani mwaye. 6Mwa enne mulombwana Potifare omuhiyeda Joze johinda jatene ja vande vale ira asogolrelrege. Potifare kabalra yengo yali yatene ya vande vale, so yaye ali yodja yadja liye bahi. 7Jatene eji jagaireyile, vagamanle malambo, mwadi Potifare ohoroma musilrilra Joze, liye kwi: <<Kaza ugone na miyo.>> 8Mbwenye Joze ohokonda eraga: <<Miyo ejo nari. Muing'ane, patarawu udivaheda jatene jene ja vande vano. Kanabalra yengo ili yatene. 9Eto vande vano kalivo odikwaranya miyo. Zela nyo mbwenye, miyo kadihiyediwe ira digone na nyo, mwasiwa nyo muli muhiyanaye. Eto kavili jowandeya ira miyo dimutegele Mulugu waga moirana yengo yotakala nnga yenno.>>

10Mwa enne malambo matene mwadi Potifare omukanyihedetchave Joze ira kagone vamohi. Mbwenye Joze ohokalelave konda mugonana nne ira amuwandame kakale vamohi. 11Mbwenye siku nimohi Joze ohovolowaga mmba ira adowe ahinde mabasaye. Tempu yenne mmba mule kamwafwanyeyaga nne namalaba mmohi. Alimo ali Joze ekave. 12Mwa enne mwadi Potifare ohinda yowara ya Joze, liye ira: <<Miyo nnafuna ugone na miyo.>> Mbwenye Joze ohomuhiyedaga mwadi Potifare yowara yaye mmandani, liye kuma mmba mule, tawela unde. 13Evale mwadi Potifare agaonne ira: <<Joze utawa eto udihiyeda yowara yaye>>, 14ohoromaga kuwa, aaitanaga anamalaba kali vande vale eraga: <<Kaing'anani nyo! MuEberewu wenno mamunaga umuzilena liye vande vano ira adilabege miyo, peno eto uroma nipudja. Uza wa miyo mofunafuna ira adigonena. Miyo roma kuwa na makalelo ohokala a masika eni. 15Agaonne ira miyo dihiroma kuwa, liye uhufiyeda dihiyeda yowara yaye ila, liye tawela unde.>>

16Mwa enne mwadi Potifare ohokoyaga yowara ile, fiyeda mamunaye twanyuwa. 17Potifare agazile, muhiyanaye ule ohomuwandela mmohive emule, liye wonga eraga: <<Muzari muEberewu wenno mmuzilena nyo ira anilabege mabasa a vande vano, uhuza wa miyo ira adipudje, agone na miyo. 18Mbwenye miyo dagaromile kuwa, liye udihiyeda yowara yaye ila, liye tawela unde.>>

19Mwa enne Joze patarawaye ule agavwile mazu a muhiyanaye, ira: <<Muzari wenyu jidiirele liye ti jeji>>, ohotakaleliwa na makalelo ohokala a masika. 20Mwa enne patarawaye ule oharuma atu, aliwa muhinda Joze, dowa muhela kadeya. Kadeya yamuhenle atu ali yenno mwafwanyeya anyakadeya ale kamutegela mwene wa Ijipitu.

21Mbwenye Yehova alive na Joze, liye muirelaga upama eto ohosakanya ira musogolrelri wa kadeya ule amuona Joze, amufwewele murima. 22Mwa enne musogolrelri wa kadeya ule ohonvaheda Joze utongi ira akale mundimuwa oaing'anela anyakadeya afwaye atene. Mwa enne Joze gwasogolrelra mabasa matene a kadeya ule. 23Eto musogolrelri wa kadeya kakukumuwela mabasa amuhiyedile liye Joze, voira Yehova ali na Joze eto omureliha zela jatene jahinda liye.

Currently Selected:

Jenesesi 39: iLolo

Highlight

Copy

Compare