Jenesesi 36

Ahima a Ezawu

1Ula gu muselu wa nlogo na Ezawu wenno unaitaniwa Edomu. 2Ezawu aatenle ahiyana a ilambo ya Kana. Muhiyana mmohi ali Ada mwana Eloni, nkuda Eti. Mmohiwa ali Olibama mwana Anaya. Anaya ule babaye ali Zibeyawu nkuda Evi. 3Muhiyana mmohiwa ali Basemate mwana Jomayili, Nebayoti murongoliye.

4Mwadi Ezawu mmohi aitaniwa Ada ule ambanle Elifaji. Eto muhiyana mmohiwa aitaniwa Basemate ule ambanle Reuweli. 5Eto muhiyana mmohiwa aitaniwa Olibama ule ahima aabanle liye ba ala: Jeyusi, Jalawu, na Kora. Ahima anna Ezawu aabanle agali ilambo ya Kana.

6Noira eno, Ezawu ohatukula ahiyanaye, ahimaye a anapongwe na anavihiyana, vamohi na atwaye atene a vande vaye, jifuwo jaye jatene, na jokana jaye jatene jejo japatile liye ilambo ya Kana, liye tamela ilambo imohiwa, mwalana na mbalaye Jako.#36:6 liye tamela ilambo imohiwa, mwalana na mbalaye Jako: Jeji jaireyile babiwa Izaki agakwile. Fwanyeya ira mulombwana Jako gwahanle ilambo ya Kana, ilambo Mulugu apanganne liye ira anvahe Abarahamu na Izaki. Ezawu ohotamela unde wa Kana, liye kaanna pandi na nipangano Mulugu asakanyile liye. Yeniyo yalaba mokwakwanela na mazu anafwanyeya Jenesesi 28:13. 7Tchoira aliwa tchawanda kala vamohive na mwasa oira atenene kohokana jorayela jidjindji. Ilambo yowendela ile, tchanna nimburo nlukulu nofwanela ira atene anne kakale wewule, na mwasa oindjiva wa anavinyama kanna atu. 8Na mwasa wenne, kohomwalana, mulombwana Ezawu dowa kalaga pandi ya Seyire, wewo wafwanyeya mwango didjindji. (Ezawu mmohive wenne eto oitaniwa na nzina na Edomu.)

9Ula gu muselu wa nlogo na Ezawu, wenno ali nikolo na akuda Edomu, anno kafwanyeya pandi ya Seyire, wewo unafwanyeya mwango didjindji. 10Mazina a ahima a mulombwana Ezawu ba ala: Elifaji wenno ambanle liye na muhiyanaye Ada, na Reuweli mwana wa muhiyanaye Basemate. 11Ahima a Elifaji ba ala: Temani, Omare, Zefu, Gayetani, na Kenazi. 12Elifaji mwana Ezawu ohomukana mwendaye aitaniwa Timina. Liye ohombala Amaleki. Ahima anna kakumile mwa Ada, Ezawu muhiyanaye.

13Ahima a Reuweli mwana Ezawu ba ala: Nahati, Zera, Sama, na Miza. Ahima anna kakumile mwa Basemate, Ezawu muhiyanaye. 14Eto ahima a Olibama mwana Anaya, muzula wa Zibeyawu, aabanle liye na Ezawu ba ala: Jeyusi, Jalawu na Kora.

15Ala ba mazina a asogolrelri a malogo anno kakumile muwari mwa ahima a Ezawu. Muwari mwa nlogo na Elifaji, wenno ali mwana murandji wa Ezawu, mazina a asogolrelri ewa ba ala: Temani, Omare, Zefu, Kenazi, 16Kora, Gayetani na Amaleki. Ala bafwanyeya kagali asogolrelri a nlogo na Elifaji mwilamboni mwa Edomu, anno kakumile mwa Ada, mwadi Ezawu.

17Muwari mwa nlogo na Reuweli, mwana mmohiwa wa Ezawu, mazina a asogolrelri ewa ba ala: Nahati, Zera, Sama na Miza. Anna bali asogolrelri a ahima a Reuweli, mwilamboni mwa Edomu, anno kakumile mwa Basemate, mwadi Ezawu.

18Muwari mwa nlogo na ahima a Olibama, wenno ali mwadi Ezawu, mazina a asogolrelri ewa ba ala: Jeyusi, Jalawu, na Kora. Anna bali asogolrelri muwari mwa ahima a mwadi Ezawu wenno aitaniwa Olibama, mwana Anaya. 19Atene anna kali ahima vamohi na asogolrelri kakumile mwa mulombwana Ezawu wenno unaitaniwa eto na nzina na Edomu.

Ahima a Seyire

20Ala ba mazina a ahima a mulombwana Seyire, nkuda Hori, anno kafwanyeya kagali anamurala a ilambo ya Edomu: Lotani, Sobali, Zibeyawu, Anaya, 21Disoni, Ezeri, na Disani. Ahima a Seyire ala, kali asogolrelri a akuda Hori mwilamboni mwa Edomu. 22Eto Lotani ahima aabanle liye ba ala: Hori na Homani. Lotani ohomukana eto murongoliye aitaniwa Timina. 23Sobali ahimaye ba ala: Alivani, Manahati, Ebali, Sefo, na Onani. 24Ahima a Zibeyawu ba ala: Ayiya na Anaya. Anaya gwenne afwannye isime ya mahindje okaha bure kokolani adjihaga aburu a babaye Zibeyawu.

25Anaya aabanle ahima ambinli. Mwana mmohi ali wa mwanapongwe aitaniwa Disoni, mwana mmohiwa ali mwana muhiyana aitaniwa Olibama. 26Ahima a Disoni ba ala: Hamurani, Esibani, Itarani, na Kerani. 27Ahima a Ezeri ba ala: Bilani, Zavani na Akani. 28Ahima a Disani ba ala: Uzi na Arani. 29-30Eto akuda Hori, anno kafwanyeya kagali anamurala a ilambwele, asogolrelri ewa maziniwa ba ala: Lotani, Sobali, Zibeyawu, Anaya, Disoni, Ezeri na Disani. Anna bali asogolrelri katonga ilambo ya Seyire molingana na makalelo kaigawile atu.

Amwene a Edomu

31Ala ba mazina a amwene katongetcha ilambo ya Edomu, Ana Izarayeli kahanakayena mwene wewa. 32Mwene murandji ali mulombwana Bela mwana Beyori. Liye atonga ilambo ya Edomu eto ali wa sidadi ya Dinaba. 33Noira eno, Bela ohokwa. Agakwile, Jobabe mwana Zera wa sidadi ya Bozira gwahambile umwene vamalroni vaye. 34Eto Jobabe agakwile, mulombwana Huzawu wa ilambo ya akuda Temani, gwahambile umwene vamalroni vaye. 35Huzawu agakwile, mulombwana Hadade, mwana Bedadi wa sidadi ya Avite, gwahambile umwene vamalroni vaye. Mulombwana Hadade gwenno aagondjihile akuda Midiyani kawanaga muwari mwa ilambo ya Mowabe. 36Hadade agakwile, Samela wa ilambo ya Masareka, gwahambile umwene vamalroni vaye. 37Samela agakwile, mulombwana Sawuli wa Rehoboti, sidadi yenno inafwanyeya wandamelana muhindje Eufarati, gwahambile umwene vamalroni vaye. 38Eto Sawuli agakwile, mulombwana Bali-Anani mwana Akibori gwahambile umwene vamalroni vaye. 39Bali-Anani mwana Akibori agakwile, Hadari gwahambile umwene vamalroni vaye. Mulombwana Hadari ali wa sidadi yaitaniwa Pawu eto muhiyanaye ali Metabeli, mwana Materedi. Materedi babaye ali Me-Zahabi.

Mazina a asogolrelri kakumile muibalini mwa Ezawu

40Ala ba mazina a asogolrelri anno kakumile muibalini mwa Ezawu: Timina, Aliva, Jeteti, 41Olibama, Ela, Pinoni; 42Kenazi, Temani, Mibizari, 43Magidiyeli na Irani. Asogolrelri atene anna kali andimuwa a kada nlogo eto ilambo yakala kada mundimuwa yaitaniwa na nzina nimohive neno naitaniwana liye.#36:43 ilambo yakala kada mundimuwa yaitaniwa na nzina nimohive neno naitaniwana liye: Akala liye nzina naye ali Kenazi eto na ilambo yenno yakala liye yaitaniwa Kenazi. Ku wonga mazina matene a asogolrelri anawongiwa va, dohokalawo sidadi diwa daitaniwa na mazina anna. Kada mutu ohokana ilambo yatonga liye. Eto babi wa akuda Edomu atene unafwanyeya agali mulombwana Ezawu.

Currently Selected:

Jenesesi 36: iLolo

Highlight

Copy

Compare