Galasiya 2

Pawulo ohogumana na anamarumiwa amohiwa

1Eto dagakumile sidadi ya Jeruzalemu, miyo dohomala yaka kumi na nnayi dahanawelelewo akoka. Evale miyo diwelelagawo, dadowile vamohi na Barnabe eto dohomudowana mulombwana Titu. 2Eto ira didowe Jeruzalemu, dadowelewo mwasiwa dohowandeliwa ira diyewo muwari moonihiwa na Mulugu. Eto dadowelewo ira daagumanihe vewa vene ale kaoneya nnga andimuwa, daawandelemo Muselu Wapama unalaleya miyo muwari mwa atu ohokala aJudewu. Miyo daova ira dahaawandele, mabasa alabile miyo anagomela nongeya eto masiki didowege sogolro, jinalaleyege miyo kajinavweyege pama.#2:2 Miyo daova ira dahaawandele, mabasa alabile miyo anagomela nongeya: Pawulo aumbuwela ira: <<Afwase andimuwa kinakayena ibaribari zela mabasa analaba miyo muwari mwa atu ohokala aJudewu.>> Ahaawandelamo andimuwa mabasa alaba liye, kerege wonga jengo jidjindji muwari momuwanganyeda Pawulo. Liye aova ira aliwa karoma wonga jengo jidjindji, masiki adowege sogolro, mabasa alaba liye kagomela nongeya eto jalaleyege liye kajavweyege pama.

3Eto fwanyeya ira masiki Titu alive muGerego, aliwa tchamukanyihedile ira aineliwe na makalelo a aJudewu, nari.#2:3 tchamukanyihedile ira aineliwe: Wanle alombwana atene kafwanyeya kagali aJudewu kohoineliwa. Voira Titu kaali muJudewu, so ali mutu omuroromela Yesu, kaineliwe agali mwana nnga jairetcha aJudewu. Mbwenye nnga ja aJudewu jihivira, tempu ila tchi tempu yowenda na malamulo maxa a Yesu Kiristu, tchali yofwanela aineliwe na makalelo a aJudewu. Ineliwa unawongiwa va kahi nnga ineliwa wa tempu ili hiyo ila. Wanle Mulugu ohomuwandela Abarahamu ira: mwana wa mwanapongwe uli watene unabaliwege vande vawo, akwakwanihaga malambo matanu na mararu, inafwanela aineliwe. (Jenesesi 17:10-14) Eto aineliwa ali ahima a alombwana ve, kakwakwaniha malambo matanu na mararu. Ku wonga mwana agali nnyenya na mmandani. Nione Levitiku 12:3. Ku wonga ja lunga jinera azombwe eto ja zoma na anamwali jinera atu tempu ili hiyo ila kajinna pandi na Mulugu. 4Mbwenye kohokalamo atu amohiwa kavioniheda nnga abalihu omuroromela Yesu agali aliwa kere zembelamo ira kaone kutchiwa wa hiyo atu nnafwanyeya muwari mwa Kiristu, amala kanitukule, kaniwelihede muuzarini mwali hiyo.#2:4 kutchiwa wa hiyo atu nnafwanyeya muwari mwa Kiristu: Fwanyeya ira atu omuroromela Yesu kohokana makalelo ohiyana na makalelo aJudewu kanna atu. Voroma, ule amuroromela Yesu ahanaineliwe na makalelo a aJudewu awendave eno ohoineliwene. (1 Korinto 7:18) AJudewu mbwenye kesaga para mutu avulusiwe, unaroma ineliwa. Yanembinli, aJudewu tchadja na mutu ahali muJudewu. (Juwawu 4:9; Joira ja Anamarumiwa 11:2-3) Atu omuroromela Yesu mbwenye kodja na atu ohokala aJudewu. (Galasiya 2:12-12) Sawasawa zela jodja. AJudewu koharihamo mangano matene Mulugu aawandenle liye aIzarayeli. Mbwenye atu omuroromela Yesu tchatongiwe ira kairegenave jaira atu wanle. (Markuji 7:19) Fwanyeya ira Pawulo ohowonga ira aJudewu omuroromela Yesu kafuna kanitukule, kaniwelihede muuzarini mwali hiyo. Ku wonga kafuna nnga atu omuroromela Yesu kairegena jatene ja wanle. Kafuna kaakalihe azari oharihamo jengo jinaira aJudewu. APawulo mbwenye tcharumenle. 5Mbwenye jatene jagaireyile eno, hiyo mbwenye nohokonda valukulu, kanarumenle nne vang'onove. Hiyo nohowanda runiha mwasiwa hiyo natawiha ira afwihu kavwa ira Titu uhuineliwa, anotatila ibaribari zela Muselu Wapama. Tcheniyo yanikondihile.

6Eto fwanyeya ira muwari mwa ale kaiziweya nnga andimuwa omuroromela Yesu sidadi ya Jeruzalemu, dagaawandenle makalelo analaleya miyo, aliwa tchanna yengo ira karunihe. Dawongaga ira kaiziweya nnga andimuwa, kannasimbwa balra akala ba andimuwa, so iiziwile miyo, tchoira Mulugu kanna nsakulro. 7Hiya diruniha, andimuwale kohoona ira sawasawa nnga Peduru ohovahiwa ira aalaleyege aJudewu Muselu Wapama, na miyene eto dohovahiwa ira daalaleyege atu ohokala aJudewu Muselu Wapama.

8Miyo eto dihiiziwa ira jatene ejo, aliwa kohowonga pama. Tchoira Mulugu mmohive alabile mabasaye muwari mwa Peduru zela kala namarumiwa wa aJudewu#2:8-9 aJudewu owu hehi atu oineliwa. gu mmohive alabile mabasaye muwari mwa miyo zela atu ohokala aJudewu. 9Fwanyeya ira andimuwa andimuwa, anno anafwanyeya kagali mulombwana Tiyagu na Peduru na Juwawu kagaonne ira Mulugu na sayi daye udirumile ira daalaleye atu ohokala aJudewu, aliwa kohodiwatchela miyo na Barnabe na manda menli nnga abali. Atu kwi: <<Nyo mulimbihede alaleya atu ohokala aJudewu. Hiyo mbwenye nnafuna naalimbihede aJudewu.>> 10So kanivepile ira: <<Hiyo nnafuna nnga mwahaadiwale atu osimela anafwanyeya muwari mwa Kiristu.>> Eto yengo yenno miyo dohokana mmirimani mwaga ira diiregena.

Pawulo ohomusumulula Peduru vatando vene

11Miyo dagadowile ilambo ya Antiyokiya, mulombwana Peduru agazile, miyo dohomusumulula kove na kove mwasiwa liye ogwana mulandu na joira jaye. 12Tchoira azaga wene, liye adja vamohi na atu ohokala aJudewu. Mbwenye kagazile atu kawendetcha na Tiyagu wanle anno kasimbwa riheda ineliwa, Peduru ohoroma konda dja vamohi na atu ohokala aJudewu afwaye, liye kala vaye vene mwasiwa liye aaova ale kazile ale. 13AJudewu atene omuroromela Yesu kohoiziwa ira hiyo podi dja vamohi na atu ohokala aJudewu omuroromela Yesu. Eto kagaonne ungongomwa wa mulombwana Peduru, na aliwene kohoroma muhara Peduru viringaniha waira liye. Ante mwinnyiwene Barnabe, ohiya ibaribari, liye haraga ja ungongomwa jaira afwaye. 14Mbwenye miyo dagaonne ira jinera afwaga kahi jolingana na ibaribari inafwanyeya muwari mwa Muselu Wapama, miyo dohowanda wonga na Peduru vatando vamentoni va atene ira: <<Katiye Peduru, we uli muJudewu eto unawendetcha nnga mutu ahali muJudewu. Nnga unawanda avi akanyiheda atu kahali aJudewu ira kawendege nnga aJudewu?>>#2:14 unawanda avi akanyiheda atu kahali aJudewu ira kawendege nnga aJudewu? Fwanyeya ira Yesu na anamarumiwa tchatongile ira atu ohokala aJudewu kaharihegemo mangano a aJudewu. Nona inafwanela mutu unamuroromela Yesu ahawande akanyiheda afwaye omuroromela Yesu ira kawendege na malamulo Mulugu aawandenle liye aIzarayeli wanle. Malringana awendege na mangano a tempu ili hiyo ila zela atu omuroromela Yesu. Zela mangano a tempu ili hiyo ila, nione eto Roma 12:1-14:23; Efezo 4:17-5:21.

15Miyo dohomuwandela Peduru na afwaye ira: <<Hiyo nili aJudewu mobaliwa. Kanili atu otega nnga atu ohokala aJudewu. 16Masiki eno hiyo nihiiziwa ira mutu kanakala wapama vamentoni va Mulugu muwari mwa joira jaye joharihamo malamulo, mbwenye unakala wapama momuroromela Yesu Kiristu.#2:15-16 Pawulo awongaga ira: Kanili atu otega nnga atu ohokala aJudewu ku wonga mategelo a aJudewu na atu ohokala aJudewu kohiyana. Masiki aJudewu kahali atu otega simbwa, Pawulo ohowonga ira: mutu kanakala wapama vamentoni va Mulugu muwari mwa joira jaye joharihamo malamulo. Ku wonga liye arumela ira vulusiwa watene unazela momuroromela liye bahi hiya vikaliha apama vamentoni va Mulugu muwari moharihamo joira ja malamulo. Hiyo nimuroromenle Yesu Kiristu ira niwande kala apama momuroromela liye bahi hiya vikaliha apama vamentoni va Mulugu muwari moharihamo joira ja malamulo. Tchoira kalivo unaza akale wapama vamentoni va Mulugu muwari moharihamo malamulo.>>

17Hiyo nagali atu otega nnafuna nnga nikale apama vamentoni va Mulugu muwari mwa Kiristu. Mbwenye akala Kiristu unonikaliha pama hiyo atu otega, kodi moira eno Kiristu gowandana na jotega? Nne vang'ono. 18Akala miyo nnamanga yenno ibwanyunle miyo, nnavioneyiheda ira dili mutu oviringaniha.#2:18 Akala miyo nnamanga yenno ibwanyunle miyo: Afwase mazwala anatapulela ira ule unavilimbiheda muwari mwa malamulo agaonne ira: <<Miyo kannawanda kwakwaneliheda malamulo>>, gu mutu oviringaniha. Tchoira unakalela ntindi yenno yahanawanda liye kwakwaneliheda. Kalaga nnga mulombwana Peduru awelelaga mundulri roma hara mangano a aJudewu anno ahiyile liye.

19Muwari mwa malamulo miyo dohowanda onelramo ira: <<Kadiwende na malamulo.>> Pa evale vahiyile miyo wenda na malamulo ira diwande wenda na Mulugu.#2:19 Owu hehi Muwari mwa malamulo miyo dohokwa zela wenda na malamulo. Miyo dohokwa zela wenda na malamulo ira diwande hinda jofuna ja Mulugu. Nione Roma 3:19-20, 7:1-6.

20Miyo dihikomeliwa vamuradini vamohi na Kiristu. Dawendaga eni, unawenda kahi miyo. So gu Kiristu unakala mwa miyo.#2:20 Dawendaga eni, unawenda kahi miyo. Ku wonga Pawulo ohorumela ira tempu yowenda na jofuna jaye yohomala. Eto mazu oira: So gu Kiristu unakala mwa miyo ku wonga muwari mwa ingumi ixa inna hiyo, inafwanela joira ja Yesu jioneye muwari mwa hiyo. Yesu umala dowa zulu mbwenye mabasaye unalabave muwari mwa atwaye omunyindela. Eniva dawendaga na maningwagala, miyo nnawenda muwari momuroromela Mwana Mulugu wenno udizivenle, wenno uwandile vivelela za dikwela miyo vano.

21Miyo kannaruniha sayi da Mulugu. Tchoira akala mutu unakala wapama vamentoni va Mulugu muwari mohara malamulo, era eno, Kiristu ukwele vasayi.

Currently Selected:

Galasiya 2: iLolo

Highlight

Copy