Galasiya 1

Malondjelo a Pawulo

1Unalremba gu miyo Pawulo, namarumiwa wa Yesu Kiristu. Muwari mokala namarumiwa, kadili namarumiwa orumiwa na nikuru na atu nne mutu uli watene wa mwilamboni muno. Mbwenye udirumile gu Yesu Kiristu na Mulugu Baba wenno umuvenyihile Yesu Kiristu mokwani. 2Miyo na abalaga dinna miyo uno nnorumiha malondjelo wa nyo makuru a atu omuroromela Yesu a ilambo ya Galasiya.

3Malondjelo anaurumihedani hiyo ba ala. Nifunne ira sayi na murendele okumela wa Mulugu Babihu na Nabwiya Yesu Kiristu, jatene ejo jikale na nyo. 4Yesu guwandile vivelela, liye za kwela jotega jihu ira awande niwombola mwa tempu yabure inna hiyo ila.#1:4 niwombola mwa tempu yabure inna hiyo ila: Yesu aawombolaga atwaye, kaali ira anikumihemo mwilamboni ya vati (Juwawu 17:15) nne kaali ira avungule goyi nnawendana hiyo (Filipo 1:29-30) mbwenye Yesu aniwombonle ira nahawendege motongiwa na Satana na jofuna jehu joirana jotega. (Roma 6:1-3; 2 Peduru 1:4) Jatene ejo liye ohoirana mwemo nnga Babihu Mulugu mwafunele liye. 5Mulugu eka atamaleliwe kala no kala. Ame!

Muselu Wapama gu mmohive

6Miyo nnotikina mwasiwa vohosusa vene, muroma muhiya Mulugu wenno uuitanileni mwa sayi da Kiristu. Peno muhuperuwa, munahara muselu mmohiwa ahali Muselu Wapama. 7Mbwenye iiziwile miyo tchoira miselu dapama kadiliwo minli. Muselu Wapama wa Kiristu gu mmohive. Mbwenye kohokalawo eto atu anauzuzumihani muwari moulaleyani jimohi jiwa, aliwa gombihaga Muselu Wapama zela Kiristu. 8So mbwenye mutu wenno unalaleya muselu mmohiwa ahali Muselu Wapama wenno nulaleyileni hiyo, masiki akale hiyo vano, masiki akale mungelro okumela zulu aza alaleyaga muselu muxa ohokala wenno nulaleyileni hiyo, wenno atembelrelreye. 9Sawasawa nnga mwawongele hiyo malambo a mundulrimu nagali na nyo, nnafuna diwonge akoka. Mutu wenno unafuna za sogolro aalaleyaga afwaye muselu mmohiwa hiya wenne muwandeliwe nyo, mutu wenno atembelrelreye.

10Nyo mwadivwa diwongaga eno, kodi nnawonga ira atu kaziveliwege? Nari. Nnawongela eno ira Mulugu aziveliwege. Wanle miyo dali mutu oaziveliwiha atu. Mbwenye peno ahakale difunagave kala mutu oaziveliwiha atu, miyo kadakala muzari wa Kiristu.

Pawulo alaleya jejo jawandeliwe liye na Yesu

11Miyo abalaga nnafuna nnga muiziwe ira muselu duwandenleni miyo kahi muselu okumela mmuruni mwa mutu. 12Tchoira Muselu Wapama dulaleyileni miyo, kadiwatchenle na mutu, nne kalivo udifundjihile. Mbwenye miyo dulaleyileni muselu wenno diwandeliwe miyo na Yesu Kiristu.

13Tchoira muhumala iziwa makalelo danna miyo tempu dawenda miyo na makalelo a aJudewu. Doholaba mabasa oharahara na uwali wohokala wa masika nikuru na Mulugu, miyo funaga nnga atenene kamale piwa. 14Zela mangano matenene kanivahile makolo ehu aJudewu, miyo vano dohariha pama na mmirimani mwaga mwatene. Miyo eto dohakwaranya afwaga oindjiva a idadi yanna miyo. 15Mulugu mbwenye, ohodisakulra dahanabaliwe. Noira eno, liye udiitana mwa sayi daye. 16Muwari modiitana, Mulugu mofuna mwaye ohodioniha Mwanaye ira diwande mulaleya muwari mwa atu ohokala aJudewu. Kuma evale, kadadowile wa mutu mmohiwa ira adimarihedemo jimohi jiwa jahanle nari. 17Nne miyo kadadowile Jeruzalemu ira dagumane na ale kali anamarumiwa wanle miyo dahanakale namarumiwa, nari. Mbwenye dadowile Arabiya. Noira eno, dohowelela Damaxiku akoka.

18Vagamanle yaka taru tchi tempu yoroma dadowile miyo Jeruzalemu ira dangumanena Peduru.#1:18 Peduru owu hehi Sefa. Tchoira Peduru ohokana nzina nimohi niwa na Sefa. Sawasawa Galasiya 2:9,11,14. Nione eto Juwawu 1:42. Wewule dohomalawo malambo kumi na matanu dagali vamohi na liye. 19Mbwenye kadigumanne na anamarumiwa amohiwa, so mbwenye dangumannena Tiyagu Nabwiya mbalaye.#1:19 Tiyagu Nabwiya mbalaye: Tiyagu ali Yesu mbalaye muwari mobaliwa. Ku wonga Tiyagu amuonaga Yesu awendaga mwilamboni ya vati, liye amuira: <<Mano.>> Nione Markuji 6:3. 20Inawonga miyo, nnawonga vamentoni va Mulugu. Kannanama.#1:13-20 nnawonga vamentoni va Mulugu: Mazu matene a vs 13-20, Pawulo unawonga muwari mohidedela ibaribari ira muselu alaleya liye akumile wa Yesu Kiristu hiya kala mafundjihelo apiyile liye vande vaye.

21Evale miyo dohokuma porovinsiya ya Judeya, miyo roma wendawenda maporovinsiya mamohiwa a Siriya na Silisiya.#1:21-22 porovinsiya ya Judeya: Sidadi ya Jeruzalemu yafwanyeya muwari mwa porovinsiya ya Judeya. Pawulo awongaga ira: <<Atu omuroromela Yesu a Judeya tchadiiziwile miyo kove na kove>>, ku wonga Pawulo kadibeliwile sidadi ya Jeruzalemu nari porovinsiya ya Judeya. Silisiya ali porovinsiya yafwanyeya sidadi ya Tarsu, wewo wali Pawulo waniwa. (Joira ja Anamarumiwa 9:11) Siriya yali porovinsiya yafwanyeya sidadi ya Antiyokiya, wewo wakumile Pawulo na Barnabe kavenyihanaga muulrendoni mwewa. (Joira ja Anamarumiwa 13:1-3) 22Muwari moira kadadibeliwile porovinsiya ya Judeya, miyo dohovenyavo atu omuroromela Yesu anafwanyeya muwari mwa Kiristu kahanadiiziwe kove na kove. 23So aliwa kera vwa wene ira: <<Wenno aniharaharetcha, peno unalaleya mazu anno afunetcha liye nnga kamale.>> 24Aliwa eto kohomutitimiha Mulugu na mwasa wa miyo.

Currently Selected:

Galasiya 1: iLolo

Highlight

Copy