Ezodu 9

Ntembelrelro nanetanu: Kwa wa jifuwo ja aIjipitu

1Noira eno, Yehova ohomuwongana Mozeji ira: <<Tiye wawonge na Farawu, wire: <Yehova Mulugu wa aEberewu unawonga ira: <<Waahiye atwaga kadowe, kaditamalele. 2Mwasiwa wahaarumelihe dowa, wakalelave akondiha, 3miyo dagali Yehova, ndanda naga nnoziha itukwa yohokala ya masika mwilamboni muno, jifuwo jawo jatene jinafuwa we jinokwa. Roma kavalo, aburu, akamelo, ng'ombe, mabila, mbuzi, jatene jinomala kwamo. 4Eto miyo dagali Yehova nnohiyaniha jifuwo ja aIzarayeli na jifuwo ja aIjipitu ira muwari mwa jifuwo jatene ja Ana Izarayeli yahakalevo nne imohi inafuna kwa.>> > >> 5Yehova ohela siku niwa, eraga: <<Miyo dagali Yehova jatene jeji nnoirana metchelo mwilamboni mu.>>

6Mwa ibaribari mmetcheloni muwa Yehova ohoirana. Jifuwo jatene ja aIjipitu johomala kwa. Mbwenye jifuwo ja aIzarayeli kajakwile nne imohi. 7Noira eno, Farawu oharumaga atu ira kadowe kaone wewo wafwanyeya aIzarayeli akala jifuwo jiwa johokwa. Aliwa funa dowa ule, kafwanyile ira jifuwo ja aIzarayeli kajakwile nne imohi. Mbwenye masikive eno Farawu murimaye afwanyeyave oummene. Liye kaahiyile aIzarayeli ira kadowege.

Ntembelrelro nanetanu na nimohi: Mulugu ohorumiha anakadjindji

8Noira eno, Yehova ohowonga na Mozeji na Arawu eraga: <<Mugudele mmandani mwenyu ndora na muhofuni. Era eno mulombwana Mozeji atukule ndora nne, avokede zulu vamentoni va Farawu. 9Ndora nne namwadeyaga, nnosanduwa nikale tumbulru notchileya pama eto nnogaweya mwilamboni mwatene mwa Ijipitu eto nnosanduwa nikale anakadjindji mmaningoni mwa atu atene vamohi na jifuwo muwari mwa ilambo yatene ya Ijipitu. Anakadjindji ale anerege pwezeya fiyeda mwezo okala vilonda.>> 10Evale aliwa kohotukula ndora na muhofuni, dowana vamentoni va Farawu. Mozeji ohovokedaga ndora nne zulu. Ndora nne nagamwadeyile, nohosanduwa kala anakadjindji muwari mwa atu atene vamohi na vinyama. Mwa enne anakadjindji ale vapwezeya atu, kohoroma kala vilonda. 11Eto fwanyeya ira ang'anga okwima tchawandile dowa fiya vamentoni va Mozeji mwasiwa na aliwene kohokana anakadjindji ale nnga aIjipitu afwiwa atene. 12Mbwenye Yehova ohoummihave murima wa Farawu. Nnga mwemo mwawongele Yehova, Farawu kafunile vwa yowonga ya Mozeji na Arawu.

Ntembelrelro nanetanu na mbinli: Mulugu ohorumiha muzongwe wa maralaza owopiha

13Noira eno, Yehova Mulugu ohomuwandela mulombwana Mozeji ira: <<Metchelo na mabebehene ubehe udowe wa mwene Farawu wamuwandele, were: <Mulugu wa aEberewu unawonga ira: <<Waahiye atwaga ira kadowe kaditamalele. 14Tchoira fendo ila miyo na ibaribari nnorumiha jabure jaga jatene wa weyo vamohi na anamalabawo na atwawo atene ira weyo uiziwe ira mwilamboni mwatene kalimo mmohiwa olingana na miyo. 15Tchoira ahakanlege miyo difuna ira ditapule ndanda naga ira duvahe maurenda owopiha ira weyo vamohi na atwawo mukwena, na ibaribari tempu yenna yakala mwagamanle tolowamo. 16Mbwenye ira miyo duhiye weyo ira ukalewo, diirele ira duonihe kopolo daga eto ira nzina naga niiziweye mwilamboni ya vati. 17Kodi weyo unnave vitukulela vamentoni va atwaga, we hafunagave ahiya atwaga ira kadowege? 18Metchelo ora yokala nnga a yenna, nnafuna dimorihe muzongwe wa maralaza owopiha, maralaza anno kali kahanarome oneya muwari mwa ilambo ya Ijipitu kuma siku niromile kalawo ilambwela ya Ijipitu fiyeda peno. 19Nona miyo nnouwandela ira waarume atu, kadowe katawihe jifuwo jawo vamohi na jatene jili unde. Tchoira mutu uli watene vamohi na inyama ili yatene inafwanyeye unde, yahatawihediwe mmba, jinagomela moreliwa muzongwe wa maralaza ule, jifiyede kwa.>> > >>

20Mwa enne kohokalawo anamalaba amohiwa a mwene Farawu kaovile mazu awongile Yehova ale, aliwa tukula jifuwo jiwa vamohi na anamalaba ewa, aliwa dowa avolotchiha munyumbani mwiwa. 21Mbwenye amohiwa kahabalrile mazu awongile Yehova ale, kohiya jifuwo jiwa vamohi na anamalaba ewa unde.

22Evale Yehova ohowonga na Mozeji ira: <<Uvenyihede ndanda nawo zulu ira arumbwe muzongwe wa maralaza ilambo yatene ya Ijipitu, maralaza ale kaamorele atu na vinyama na jovaha jatene ja mmundani muwari mwa ilambo ya Ijipitu.>> 23Evale Mozeji ohovenyiheda ikumbuzo yaye zulu. Agavenyihedile zulu, Yehova ohoroma moriheda mwilamboni ndari vamohi na muzongwe wa maralaza eto vamohi no jerima. Mwa ibaribari Yehova ohorumbwiha muzongwe wa maralaza mwilamboni mwa Ijipitu. 24Eto muzongwe wa maralaza ule vamohi no jerima ule jaireya moharana se miyala, jiireyaga na makalelo owopiha. Ali ahanaromege rumbwa muzongwe wa maralaza wa makalelo anno romela vatamelemo atu mwilamboni mwa Ijipitu mule. 25Mwilamboni mwatene mwa Ijipitu muzongwe wa maralaza ule ohotolotcha jengo jatene jafwanyeya unde, roma atu na vinyama na jalo jatene jali mmindani na mitengo datene. 26Mbwenye mwilamboni mwa Gozeni, wewule wafwanyeya Ana Izarayeli, muzongwe wa maralaza ule kafiyilewo.

27Mwa enne Farawu ohomuitaniha mulombwana Mozeji na Arawu, liye awandela eraga: <<Fendo ila miyo dihitega. Yehova unafwanyeya agali otonga mwa ibaribari. Mbwenye miyo na atwaga nili atu abure. 28Nnauvepani ira mudowe mwalobele wa Yehova. Tchoira jabure jatene jidifwanyile zela ndari na muzongwe wa maralaza jinaruma Mulugu ji, jihikwakwana. Miyo nnouhiyani mudowege ira mwahakaleve mwemuno.>> 29Mulombwana Mozeji ohomuwakulaga mwene Farawu eraga: <<Vanakumege miyo musidadi mu, nnovenyiheda mandagala zulu ira dinvepe Yehova. Era eno ndari di nnomiyala eto muzongwe wa maralaza kanakalawo akoka. Jatene ejo jinafuna jiireye ira weyo uwande iziwa ira ilambo ya vati ila tcha Yehova yaye. 30Mbwenye miyo dihiiziwa ira zela weyo vamohi na anamalabawo ante peno kamunarome muova Yehova Mulugu.>>

31Fwanyeya ira muwari mwa maralaza anno kamorile, jomela jasakanyana atu usalru jineriwa linyu#9:31 linyu tchi yomela imohi kalima atu ira kasakanyena usalru. na sevada johomala nongeya na mwasa oira sevada ohoroma manga mihumbu eto linyu ohoroma kuma tondo. 32Mbwenye tirigu vamohi na mbewu imohiwa ineriwa sentero kajanongeyile mwasiwa jagazaliwe jali jahanakumele unde. #9:32 mwasiwa jagazaliwe jali jahanakumele unde. MaBibiliya amohiwa anawonga ira mwasiwa ti mbewu nnakaletcha dogomiheda zaliwa.

33Mozeji ohokumagamo musidadi mule vamentoni va mwene Farawu, liye dowaga. Agadowile, ohovenyihedaga mandaye zulu anvepaga Yehova. Mwa enne ndari dile vamohi na muzongwe wa maralaza ule johomiyalaga, eto muzongwe wenne kawelenle rumbwa akoka mwilamboni. 34Mbwenye mwene Farawu agaonne ira muzongwe vamohi na maralaza ale vamohi na ndari jatene jihimiyala, ohowelelave tega eto ohoummihave murimaye roma liye vamohi na anamalabaye. 35Mwa enne murima wa Farawu afwanyeyave oummene. Nnga mwemo Yehova mwamuwandenle liye mulombwana Mozeji, Farawu kaahiyile Ana Izarayeli ira kadowege.

Currently Selected:

Ezodu 9: iLolo

Highlight

Copy

Compare