Detoronomiyo 20
20
Malamulo zela ja kondo
1Mozeji ohowongagave eraga: <<Nyo mwadowa kondoni ira mwawane na amwidaninyu, muona kazaga atu oindjiva bure vamohi na kavalo didjindji na aaterelado a kondo eto kaganna anyakondo pwi oukwaranyani nyo, nyo mbwenye kamwaove mwasiwa Yehova Mulugu wenyu wenno uukumihileni ilambo ya Ijipitu uli na nyo. 2Mwaakwivela amwidani, mwatandana ira muwane, aze namakuta sogolro wa anyakondo atene ira awonge na anyakondo atene a Izarayeli, 3aire: <Nyo akuda Izarayeli muvwe inafuna miyo wonga. Peno munatandana ira mwawane na amwidaninyu. Nyo mbwenye mmirimani mwenyu mukale olimbene. Kamuove, nne kamungurumele, nne kamufoke na mwasa wa aliwa. 4Mwasiwa Yehova Mulugu wenyu unodowa vamohi na nyo ira awane na amwidaninyu ira muwande agondjiha.>
5<<Namakuta amala wonga eno, asogolrelri a kondoni anowonga na atu atene ira: <Kodi ukala mulombwana uli eva umangile nyumba tchineneva uli ahanarome kalamo? Liye awelele vande tawiha ira unakwe kondoni, era eno, mutu mmohiwene adowe akalemo. 6Kodi ukala mulombwana uli eva uzanle mundaye wa uva eto uli ahanarome dja jovaha jiwa? Liye awelele vande tawiha ira unakwe kondoni, era eno, jovaha jile jidjiwege na mulombwana mmohiwene. 7Kodi ukala mulombwana uli eva umbanyenlre muhiyana tchineneva uli ahanamutele? Liye awelele vande tawiha ira unakwe kondoni, era eno, mulombwana mmohiwene akale unafuna mutela.> 8Asogolrelri ale kawongegeve na atwale ira: <Kodi ukala mulombwana uli eva unaova eto uli okukumuwene mmirimani mwaye? Awelele vande vaye tawiha ira unaze anyungulrutche mirima da afwaye ira kakale nnga liye.> 9Evale asogolrelri kagamanle wonga eno na anyakondo atene, anoasakulra andimuwa osogolrelra kada nikuru kondoni unadowa atu.
10<<Mwa enne mwadowa sidadi imohi ira mwawane na aliwa, mwahanarome wana, mubabihege awandela makalelo anafuna nyo ira aliwa kasakanye ira nyo mwahaairele yabure. 11Aliwa karumela, kahula sidadi yewa mwa murendele, atu atene anakala musidadi mule anokala azari enyu, karome ulabani mabasa anno munaavahe nyo. 12Mbwenye aliwa kaharumele makalelo anafuna nyo ira aliwa kasakanye ira nyo mwahaairele yabure, mwaona karoma funa jowana na nyo, nyo murindje sidadi yatene yenne. 13Na ibaribari Yehova Mulugu wenyu unouvahedani mmandani mwenyu, eto mulombwana uli watene unafwanyeya musidadi mule mumpe na supada. 14So mbwenye anafuna nyo ahiya ba ahiyana vamohi na ahima na anavinyama ewa, na jatene jinafwanyeye musidadi mule, na jorayela jewa jatene. Mutukule jatene jejile ira jikale jenyu. Eto mudje jorayela jatene ja amwidaninyu ale jejo juvahileni Yehova Mulugu wenyu. 15Ayo ba makalelo anafuna nyo airela atu atene a malogo anno anafwanyeya olapela wene na nyo, hiya sidadi da malogo a ilambo yenno inafuna nyo dowa kalaga. 16Mbwenye zela sidadi da atu anafwanyeya vakwikwi na nyo, sidadi da malogo anno Yehova Mulugu wenyu unauvahani liye ira ikale yowatchela yenyu, kikalewo yengo yovuma ili yatene inafuna nyo hiya ira ikayena ingumi. 17Inafwanela mwaatolotchege atene nnga mwemo muuwandenleni Yehova Mulugu wenyu, romela aEti, aAmore, akuda Kana, aFerizi, aEvi, aJebuzi, atene anno inafwanela mwaatolotche, 18tawiha ira anaze kaufundjiheni irana jengo jotakaletchetcha jejo jaireletcha atu amilugu ewa. Tchoira mwafiyeda mwezo wenno, inafwanyeya yagali yotega vamentoni va Yehova Mulugu wenyu.
19<<Eto mwairindja sidadi fiyeda malambo madjindjene muwanaga na aliwa ira muwande itukula, kamukakatege mitengo nnafwanyeya wewule mugwadaga na mbazo. Nyo podi djaga jovaha ja mitengo dile mbwenye kamugwadege mitengo diwa. Tchoira mitengo dile kahi amwidaninyu, fiyeda ira nyo mugwihege. 20Mbwenye mutengo wenne munamuiziwa nyo ira jovaha jiwa kajinadjiwa, wenno mbwenye nyo podi mugwada ira aukamihedeni muwari mosakanyana makalelo owanda igondjiha sidadile ante mufiyede igudjula.>>
Currently Selected:
Detoronomiyo 20: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
