Detoronomiyo 13
13
Mozeji ohawandela aIzarayeli makalelo oatonga anamafiyiheda onama
1Mozeji ohowongagave eraga: <<Muwari mwa nyo akalamo namafiyiheda nari maliba roha auwandelani ionihedo nari yotikiniha, 2amala wonga, mwaona ira jengo jiwa jawonga liye jihireya eto aroma uwandelani ira: <Ndoweni naaharegeni amilugu amohiwa eto naalabegeni aliwene>, kagali amilugu mwahaaiziwile nyo, 3namafiyiheda wenno nari maliba roha wenno jowonga jaye kamuhare. Tchoira Yehova Mulugu wenyu unauwombezani ira auoneni akala nyo munomuziveliwa Yehova Mulugu wenyu na mmirimani mwenyu mwatene vamohi no kalawo wenyu watene. 4Nyo mbwenye mmuharege Yehova Mulugu wenyu eto mmuovege liyene, muharihege malamulo aye, muvuruwanege nizu naye eto mmulabege vamohi no muhideda liyene bahi. 5Era eno namafiyiheda ule nari maliba roha ule inafwanela apiwe, mwasiwa uhuwonga mazu okonda tongiwa na NABWIYA Mulugu wenyu wenno uukumihileni mwilamboni mwa Ijipitu eto wenno uuwombonleni muuzarini mwafwanyeya nyo. Liye uhuwonga mazu ira auholotcheni ndila yenno Yehova Mulugu wenyu auwandenleni liye ira muharege. Ayo ba makalelo anafuna nyo malihaga ubure vari venyu.
Mozeji ohawandela aIzarayeli makalelo oatonga aliba hara vikwamutu josema
6<<Akala mbalawo wa ingulu imohive na weyo, nari mwanawo wa mwanapongwe owu wa mwana muhiyana, nari muhiyanawo unamugonana we, nari nfwawo wenno unamuziveliwa we nnga maningo awo, aza auwongagana mazu ofuna uholotcha eraga: <Ndowe naatamalelege amilugu amohiwa> ahali Mulugu umuiziwile we, nne makolo awo kahamuiziwile atu, 7kagali amilugu a atu anne kaurungunuwileni, romela atu anne anafwanyeya vakwikwi vene na nyo nari atu anne anafwanyeya olapela, kuma pandi imohi unaroma ilambo ya vati fiyeda pandi imohiwa unagomela ilambo ya vati, 8mutu wenno kumuhare nne kuvuruwane jowonga jaye, nne kumuwendele tangaranga, nne kumuhiye ira akalewo, nne kumukoye. 9Mbwenye inafwanela mumpe. Mutu oroma nvoka akale weyo maliba umboni, era eno, atu atene kakale ogomiheda. 10Munvoke na mabwe ante afiyede kwa. Tchoira liye avenda jouholotcha wa Yehova Mulugu wawo wenno uukumihile ilambo ya Ijipitu, muuzarini mwafwanyeya we. 11Inafwanela muiregena eno ira aIzarayeli atene kavwa, kaovege ira yahaweleleye ireya yengo yotakala yakokene vari venyu.>>
12<<Mwakala ilambo yenne, muwari mwa sidadi dedo nnafuna uvahani Yehova Mulugu wenyu ira mukalegemo, 13mwavwa ira kohokalawo alombwana angasi angasi kakumile muwari mwa nyo kadowa kawongaga mazu oaholotcha atu anafwanyeya muwari mwa sidadi yewa, kawongaga keraga: <Ndoweni naaharegeni amilugu amohiwa>, amilugu anno mwahaaiziwile nyo, 14inafwanela musayele iziwa, mufukede na makalelo apama ira muiziwe pama jaira atu a sidadi yenno kagavwile mazwale. Mwa enne mwavwa ira na ibaribari jihiireya jengo jotakaletchetcha nnga jejo vari venyu, kohorumela ahara amilugu amohiwa, 15inafwanela mwaatolotche na supada atu atene anakala sidadi yenne,#13:15 mwaatolotche na supada atu atene anakala sidadi yenne: AIzarayeli ohara amilugu amohiwa kotongiwa na makalelo mamohive nnga Mulugu aatongile liye akuda Kana anno Mulugu aatamangihamo liye mwilamboni mule. romela atu atene vamohi na anavinyama atene anafwanyeya sidadi yenne. 16Eto mugudele jengo jiwa jatene mudowena varampani, mwatumeye na munlo eto mutumeye sidadi yatene ira ikale nnga mukuto otumeya wa Yehova Mulugu wenyu. Era eno sidadile kimangiwe akoka. Ikale vadebe kala no kala. 17Eto muwari mwa jengo jatene jinafuna Yehova ira jitumeyiwe, kikalevo yengo inafuna nyo tukula. Mutumeye jatene nnga munafunela Yehova ira uwali waye utotowe eto auwendeleni tangaranga eto auireleni upama eto auindjiviheni nnga mwalumbenle liye na makolo enyu. 18Ira muwande ireliwa upama watene wenno, inafwanela muvwelelege jowonga ja Yehova Mulugu wenyu eto muharihege malamulo ayene anno nnauwandelani miyo peno eto muiregena jofwanela vamentoni va Yehova Mulugu wenyu.>>
Currently Selected:
Detoronomiyo 13: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
