Joira ja Anamarumiwa 14

Pawulo na Barnabe koholaleya mazu sidadi ya Ikoniyo

1Pawulo na Barnabe kagali sidadi ya Ikoniyo, kohovolowa vamohi na aJudewu muwari mwa nyumba yofundjamo Mazu ya aJudewu, aliwa roma laleya emule mazu fiyeda atu adjindji muroromela Yesu, aJudewu vamohi na aGerego,#14:1 nyumba yofundjamo Mazu ya aJudewu: Ku wonga nyumba mwagumana aJudewu hiya nyumba ya atu omuroromela Yesu. Pawulo na Barnabe kavolowaga, kafwanyeya kagali alendo hiya kala anamurala. Masiki aliwa kagalive aJudewu mobaliwa, na mwasa wa nzina na Yesu, aliwa kohowanda hiyaniheya na aJudewu anno kahanlena ja iJudewu jiwa kahafunaga muroromela Yesu. hiya kala aJudewu ve bahi.

2Mbwenye aJudewu amohiwa, anno kahamuroromenle Yesu, kohovenya, aliwa roma atujaga atu amohi ohokala aJudewu ira kaidanege na atu omuroromela Yesu ale. 3Na mwasa wa jotuja ja atwale, Pawulo na Barnabe kohomala malambo madjindjene sidadi ya Ikoniyo ule, kalaleyaga mazu a Nabwiya vatando vene mohoova. Eto Nabwiya ohavaha aPawulo kopolo doirana jionihedo na jotikiniha vamentoni va atwale ira atwale kawande kana ibaribari zela muselu wa sayi da Nabwiya kalaleya aPawulo.

4Mwa enne muwari mwa atu a sidadi ya Ikoniyo ule kohokana gaweya. Amohiwa kali aliba vuruwana jotuja ja aJudewu eto amohiwa kali aliba vuruwana jofundjiha ja anamarumiwa. 5Mwa ale kahafunne ja aPawulo ale, amohiwa kali aJudewu, amohiwa atu ohokala aJudewu, amohiwa andimuwa andimuwa a wewule. Atene anne kohogumanela kafunaga jomuhinda Pawulo na Barnabe ira kaape na mabwe. 6Mbwenye, mulombwana Pawulo na Barnabe kagavwile jejile, kohovenyihana, aliwa tawa, dowa Listira na Derebe, sidadi dedo dafwanyeya muwari mwa porovinsiya ya Likoniya, aliwa dowa vilambo dowandamelana wewule. 7Aliwa kowendawenda wewule kalaleyaga Muselu Wapama.

Pawulo na Barnabe kagali sidadi ya Listira

8Siku nimohi Pawulo alaleyaga mazu vatando vene sidadi ya Listira, muwari mwa ale kavuruwana, ohokalavo mulombwana mmohi ali murenda, abaliwe ohowendene, orangala manyalo. 9Mulombwanole afwanyeyaga anvuruwanaga Pawulo alaleyaga. Evale Pawulo agamuing'anne pama, ohomuona ira mulombwanole ohokana nroromelo ira avulumutchiwe. 10Mwa enne Pawulo ohomuwongana murendole na mazu olimbiha eraga: <<Kavenya uimele na manyalo awo.>> Tempu imohive yenne murendole ohovenya mobaranya, roma wendaga.

11Anamwindji ale kagaonne jairile Pawulo, kohoromaga kuwa na iwongelo ya wewule iLikoniya keraga: <<Amilugwihu peno kohotita, aliwa za na makalelo nnga hiyo atu.>> 12Mwa enne Barnabe kamuitana na nzina na mulugu wewa Jupiteri. Eto Pawulo kamuitana na nzina na mulugu wewa Merkuriyo#14:12 Muwari mwa amilugu anna akuda Listira, mulugu mundimuwa kamuitana Jupiteri. Kohokana eto mulugu mmohiwa eriwa Merkuriyo. Onelramo wewa Merkuriyo awonga mazu a Jupiteri. Voira asimbwa wonga ali Pawulo, akuda Listira kamwesa Pawulo nnga Merkuriyo maliba wonga ja Jupiteri. Barnabe kamwesa nnga mulugu wewa Jupiteri. mwasiwa Pawulo ali maliba wonga. 13Eto ora yenno ohokala namakuta wenno alaba mabasa a nyumba yamutamaleletcha atu mulugu wewa Jupiteri, yafwanyeya unde wa sidadile. Namakuta ule muwari moaona anamarumiwa ale nnga amilugu ewa, ohotukula ng'ombe da alombwana na kara da folori, liye dowagana va mulango va sidadile ira liye vamohi na anamwindji atene anne kadowe kaakutele mikuto aPawulo.

14Mbwenye anamarumiwa ale Barnabe na Pawulo kagaonne makalelo kafuna atu airela, muwari moruniha mwewa, kohokawula jowara jiwa, aliwa roma tamanga kaviraviraga muwari mwa atwale, aliwa awandelaga mokuwa keraga: 15<<Alombwana nyo, kodi munairela nni jeji? Hiyo kanili amilugu, nili atu nnga nyo. Nizilena Muselu Wapama ouwandelani ira muhiye jengo johokana mabasa jinera nyo ji, mmuharege Mulugu Okalawo, wenno upandutchile ilambo ya zulu na ilambo ya vati na bara na jatene jinafwanyeyamo.>>

16<<Mulugu tempu ya wanle ohahiya malogo matene wendaga na makalelo ewene. 17Mbwenye zela wa liye, kavihiyile eno. Ovihidedela umboni muwari mouvahani muzongwe okumela zulu eto mwalimaga, kumaga jalo pwi pwi ira mukayena udja eto muhagalalege mmirimani mwenyu.>> 18Mwa enne na mazu kawonga atu ale, aliwa kohofiyeda agondjiha, aliwa hawanda akutela. Mbwenye ira kawande agondjiha, vohokala mabasa mandimuwa.

19Nomala eno, kohozaga aJudewu okumela Antiyokiya na Ikoniyo. Aliwa kagazile, kohatuja anamwindji ale, aliwa roma tukula mabwe, nvokaga mulombwana Pawulo. Mwa enne kaganvokile, kohomburula, dowa mutatilela unde wa sidadile, kaumbuwelaga ira Pawulo uhukwa. 20Mbwenye anamamuhara Yesu kagadowile wewo wamutatilenle atu Pawulo, kagagumanne vali liye, Pawulo ohovenyaga na mendo daye, dowa volowa musidadi mwakoka mwene. Mmetcheloni muwa, Pawulo na Barnabe kohovenyihana, aliwa dowaga sidadi ya Derebe.

Pawulo na Barnabe kohowelelaga mundulri, kaalimbihaga afwiwa

21Kagadowile ilambo ya Derebe, kagalaleyile wewule Muselu Wapama, atu oindjiva kohoroma kala atu omuroromela Yesu.

Vevale Pawulo na Barnabe kohowelelaga mundulri, aliwa vira sidadi ya Listira, aliwa dowaga Ikoniyo, ante Antiyokiya. 22Kowenda emule kaalimbihaga anamamuhara Yesu, kaakokomezaga ira kakaleve olimba muwari mwa nroromelo niwa. Eto koawandela keraga: <<Ulrendo unna hiyo nidowaga ira navolowe muUmweneni mwa Mulugu gu ulrendo wa makatamiho madjindji.>> 23Mwatene mwavira atu, muwari mwa kada nikuru na atu omuroromela Yesu aPawulo koasakulra aansiyawu ira kasogolrelrege. Koalobelela eto kojejuwari kaavahedaga mmandani mwa Nabwiya wenno kamuroromela atu.

Pawulo na Barnabe kohowelela Antiyokiya

24-25Nomala eno, kohovenyihana, aliwa vira muwari mwa porovinsiya ya Pisidiya, aliwa dowa porovinsiya ya Panfiliya ante sidadi ya Perije. Kagafiyile sidadi ya Perije, koholaleya wewule mazu. Noira eno, kohokwaranyavo, aliwa dowa Ataliya. 26Nokuma evale, kohogwela mwadeya aliwa dowaga Antiyokiya wewo wavahediwe atu mmandani mwa Mulugu ira kasogolrelriwe na sayi daye, kadowe kalabe mabasa olaleya, anno kakwakwanelihedile atu.

27Pawulo na Barnabe kagawelenle Antiyokiya wakoka wene, kohogumaniha nikuru na atu omuroromela Yesu, roma awandelagamo jengo jidjindji jaairela Mulugu eto na makalelo Mulugu ahunle liye musuwo ira atu ohokala aJudewu kamuroromele Yesu. 28Noira eno, kohomala malambo madjindjene kawendaga na anamamuhara Yesu kafwanyeya Antiyokiya.

Currently Selected:

Joira ja Anamarumiwa 14: iLolo

Highlight

Copy