Joira ja Anamarumiwa 13

Munemba Otchena ohomuruma Barnabe na Sawulo ira kadowe kalaleye mazu

1Nikuru na atu omuroromela Yesu nafwanyeya Antiyokiya nohokana anamafiyiheda na anamafundjiha.#13:1 anamafiyiheda na anamafundjiha: Anamafiyiheda na anamafundjiha kohiyana. Tchoira anamafiyiheda banno kawandeliwa mazu a Mulugu, aliwa awandelaga atu. Hiyaniha na anamafundjiha. Tchoira anamafundjiha banno katukula mazu a Mulugu kalrembiwe na anamafiyiheda, kafundjihaga muwari mwa anamwindji. Anamafiyiheda amohiwa banno kalrembile Mazu. Maziniwa ba ala: Barnabe, Simeyawu wenno aitaniwa Odiba, mulombwana Lusiyo wa Sirene, mulombwana Maname wenno aulukulihiwe#13:1 aulukulihiwe owu hehi awamwihiwe. vande va mwene Erodi. Ogomiheda ali Sawulo. 2Siku nimohi, aliwa kagagumanne, kamutamalelaga Nabwiya, kajejuwarigi, Munemba Otchena ohawandela, liye ira: <<Nnafuna munkumihevo mulombwana Barnabe na Sawulo, mwaarume ira kadowe kalabege mabasaga anno daafunnena miyo ira kalabege.>> 3Vevale kagajejuwarile eto kagalobenle, kohahelaga manda Barnabe na Sawulo, aliwa aruma ira kadowe kalabege mabasa a Mulugu.

Barnabe na Sawulo kohodowa vasuwa va Xipire

4Evale Barnabe na Sawulo kagarumiwe na Munemba Otchena ira kadowe kalabege mabasa a Mulugu, kohomaruwaga kadowaga sidadi ya Selewusiya. Nokuma evo kohogwela mwadeya, aliwa vira ante vasuwa va Xipire. 5Kagalive muwari mwa Xipire emule, kohotita sidadi ya Salamina,#13:5 Salamina tchi sidadi inafwanyeya muwari mwa Xipire. Ku wonga aliwa kalaleya muwari mwa Xipire. aliwa roma volowaga nyumba dofundjamo Mazu da aJudewu, aliwa laleyaga mazu a Mulugu.#13:5 Maliba lremba Lukaji awongaga zela nyumba dofundjamo Mazu da aJudewu ku wonga liye kaonne ira nyumba diwa dali da atu omuroromela Yesu mbwenye dali da atu omuriheda Mulugu. Barnabe na Sawulo kavolowaga, tchavolowile ira kalobele muwari mokala nikuru nimohive, mbwenye aliwa kohodowa, aliwa laleyaga mazu a Mulugu. Ali ira aJudewu kafwanyeyamo kakayena ibaribari zela vulusiwa momuroromela Yesu Kiristu hiya muwari mwa malamulo nnga mwaumbuwela atu. (Joira ja Anamarumiwa 13:38-39, 14:1, 17:1-12) Eto mulombwana Juwawu wenno airiwa Markuji afwanyeya vamohi na Barnabe na Sawulo, aakamihedaga mabasiwa.

6-7Kagamanle wenda vasuwa vatene, kohofiya sidadi ya Pafo. Wewule wohokala mulombwana mmohi, ali governadore wa ilambo yenne. Governadore ule ali mutu wa toto eriwa Serijiyo Pawulo. Liye ohomuitanihaga Barnabe na Sawulo ira kamuwandele mazu a Mulugu. Eto governadore ule awendetcha na muJudewu mmohi eni ali ng'anga okwima eto ali namafiyiheda onama, nzina naye aitaniwa Elima.#13:6-7 Elima owu hehi Bari-Yesu. 8Nzina na Elima nnatapulela ng'anga. Evale Barnabe na Sawulo kera kawonge na governadore ule, ng'angole oaruniha ira amuholotche governadore ule ira ahakayena ibaribari zela Yesu. Kamahi kawonge, liye okalelave aruniha. 9Mwa enne mulombwana Sawulo mmohive wenno eriwa Pawulo, ohozaleliwa Munemba Otchena, liye roma muing'ana do do do, liye ira: 10<<We mwana wa Diyabo, ngongomwa, mutu wa malrango, mutu oruniha yengo ya ibaribari! Kodi unaza uhiye alini zela makalelo unera we ononga ndila dapama da Nabwiya ira waavirihe atu mogombagomba? 11Kavuruwana. Ndanda na uwali wa Nabwiya nili na weyo eni. Weyo unomala malambo mangasi mangasi wahawandaga ona nne nzuwa nne yengo ili yatene.>> Mwa tempu imohive yenne yohozaga ifunga na isi, za mugudumeya ng'angole. Mwa enne liye ohoroma wambaselra, aavepaga atu ira kammeze na manda. 12Governadore ule agaonne enne, ohororomela mazu a Nabwiya eto ohotikina valukulu zela ja Nabwiya jafundjiha atu.

13Evale mulombwana Pawulo na afwaye kohogwela mwadeya sidadi ya Pafo, ante aliwa dowa vira sidadi ya Perije muwari mwa porovinsiya ya Panfiliya. Mbwenye kagafiyile wewule, Juwawu wenno eriwa Markuji ohahiyaga Barnabe na Pawulo, liye welelaga mundulri, adowaga Jeruzalemu.

Pawulo oholaleya muwari mwa nyumba yofundjamo Mazu

14Evale Barnabe na Pawulo kagakumile Perije, kohodowaga sidadi ya Antiyokiya yenno ili porovinsiya ya Pisidiya.#13:14 sidadi ya Antiyokiya yenno ili porovinsiya ya Pisidiya: Hiya Antiyokiya wewo wakuma atu. Ku wonga dohokalawo sidadi mbinli dokana nzina na Antiyokiya. Siku na sabado nagafiyile, kohovenyaga, dowa volowa muwari mwa nyumba yofundjamo Mazu, aliwa garati. 15Kagagaratile, atu a mwemule kohoileri mazu a malamulo na mazu kalrembiwe na anamafiyiheda. Kagamanle ileri mazwale, asogolrelri a mmba mule koharuma atu ira kadowe kaawandele aPawulo ira: <<Abalihu, mwakana yoakokomeza atu, nyo podi wonga.>>

16Vevale Pawulo ohovenya, vaha sinale na ndanda naye ira kamuvuruwane, liye kwi: <<Alombwana a aIzarayeli nari nyo atu amohi omuova Mulugu, nnafuna muvuruwane pama inafuna miyo wonga. 17Mulugu wa hiyo aIzarayeli ohasakulra makolo ehu ira kakale atwaye. Kagadowile ilambo ya Ijipitu, Mulugu ohaindjiviha eto ohakumiha muIjipitu mule na muwono waye wa kopolo. 18Kagakumile Ijipitu, kohovolowa muisalesaleni. Eto Mulugu ohovilela na joira jabure jatene jaira atu wandamelana yaka 40 dedo dawenda atu muisalesaleni mule. 19Noira eno, Mulugu ohotolotcha malogo matanu na menli kafwanyeya ilambo ya Kana, liye avaha aIzarayeli ilambo yenne ira ikale yewa. 20Ira jatene ejo jiireye, vamanle wandamelana yaka 450.

<<Nomala eno, Mulugu oharuma anamasogolrelra, aliwa asogolrelraga aIzarayeli fiyeda namafiyiheda Samuweli. 21Noira eno, aIzarayeli kohovepa ira kakayena mwene. Evale Mulugu ohomusakulra mulombwana Sawuli mwana Kixi wa nlogo na Benjami ira akale mwene wewa. Sawuli ohatonga aIzarayeli fiyeda yaka 40. 22Evale Mulugu agamuwakile Sawuli umwene, ohomuhambiha Davi, wenno Mulugu amuhidedele liye umboni eraga: <Dihinfwanya Davi mwana Jese, wenno unafwanyeya agali mulombwana okana murima wapama nnga murima waga. Liye gunafuna irana jofuna jaga jatene.> >>

23<<Mwa eno, Mulugu ohonirumiheda hiyo aIzarayeli Nvulusi wenno akumenle muibalini mwa Davi, nnga mwapanganne liye, wenno unafwanyeya agali Yesu. 24Yesu ahanarome hinda mabasaye, Juwawu Mbatizi ohalaleya aIzarayeli atene ira katwaruwe, kabatiziwe. 25Mbwenye magomelo uwa, Juwawu amarihaga mabasaye ohafukaga aIzarayeli ira: <Nyo mwadiona miyo, munadiona nnga dili ani? Miyo kadili wenno unamuing'anela hiyo, nari. Mbwenye unamuing'anela hiyo eni unaza mundulri mwaga. Nne miyo kadifwanenle ira ditapule mingohi da sapato daye.> >>

26Pawulo ohowongaga eraga: <<Abalaga, nyo atu a muibalini mwa Abarahamu vamohi na nyo atu omuova Mulugu, nnafuna duwandeleni ira Mulugu umala nirumiheda hiyo atene mazu onivulusa ala. 27Tchoira Yesu agazile, aJudewu anakala Jeruzalemu na anamasogolrelra ewa kohomutonga Yesu ira apiwe kakwakwanelihedaga mazu matene kalrembile anamafiyiheda anno anaileriwa masabado matene.#13:27 kakwakwanelihedaga mazu matene kalrembile anamafiyiheda anno anaileriwa masabado matene: AJudewu atene anno kampile Yesu nari Estevawu (Joira ja Anamarumiwa 6:9) nari ale kamwida Pawulo na jolaleya jaye (Joira ja Anamarumiwa 13:45, 14:2,19) kafwanyeya kagali atu olobela siku na sabado eto atu ofundja mazu a Mulugu. Yoviringaniha ya aJudewu anno yali ira aliwa kohomukonda Yesu. Aliwa kairilena muwari mohowanda onelramo ira Nvulusi kamuwonga atu ali liyene. 28Tchoira agali aJudewu tchanfwannyena muselu ompana, kohodowa nvepa mundimuwa Pilatu ira Yesu apiwe. 29Mwa enne jagamanle kwakwanela jatene jalrembiwe zela liye, agakwile, kohomutitiha vamuradini, aliwa mukoya munifukweni. 30Mbwenye Mulugu ohomuvenyiha mokwani.

31<<Mwa enne Yesu agavennye mokwani, ohomala malambo madjindjene aakumelelaga atu anne kakumile Galileya na liye, kadowa Jeruzalemu tempu yali liye ahanakwe. Atu anne kamuonne peno anafwanyeya kagali aliba hidedela umboni, kaawandelaga atu.

32<<Eto hiyo nizele nuwandeleni Muselu Wapama wenno Mulugu apangile liye na makolo ehu malambo a mundulrimu, 33Mulugu uhumala kwakwaneliheda mwa hiyo ahimiwa muwari monvenyiha Yesu mokwani, kalaga nnga eto mulrembele atu livuru na Salmu 2 ira: <We uli Mwanaga. Miyo peno duhubala.>#13:33 Mazu a Mulugu oira: We uli Mwanaga. Miyo peno duhubala karomile lrembiwa Salmu 2:7. Mazu anno ananiwandela ira Mulugu muwari momuvenyiha Yesu mokwani, liye amuimetchile ira akale musogolrelri wa mabasa aye matene. Kalaga nnga baba anvahedaga mwanaye jaye jatene ira asogolrelrege. Mulugu muwari momuvenyiha Yesu mokwani, amuhambihile liye ira akale musogolrelri eto namatonga wa jaye jatene. Nione Matewuji 28:18; Joira ja Anamarumiwa 2:36, 5:30,31, 10:42, 17:31; Roma 1:4; 1 Korinto 15:27; Efezo 1:10,22.

34<<Eto zela ibaribari ira Mulugu ohomuvenyiha Yesu mokwani eto ira liye kaza awelela kwa akoka, Mulugu ohowonga ira: <Miyo nnafuna duvaheni mareliho otchena, a ibaribari nnga damurelihile miyo Davi.>#Izaiya 55:3 #13:34 Nnowanda kana ibaribari ira Mulugu ohomuvenyiha Yesu mokwani eto ira liye kaza awelela kwa akoka muwari movwa mazu a Mulugu oira Miyo nnafuna duvaheni mareliho otchena, a ibaribari nnga damurelihile miyo Davi. Voira Mulugu unaareliha atu muwari mwa Yesu, Yesu kaza awelela kwa mwasiwa Yesu ahakwe akoka, Mulugu kawanda areliha atu muwari mwa Yesu nnga mwapanganne liye.

35<<Nona muwari mwa Salmu mmohiwa liye uhuwonga ira: <Nyo Nabwiya kamunamuhiya Mutu wenyu Otchena ira liye avunde.>#Salmu 16:10 36Tchoira na ibaribari ahavundile kaali Davi, mwasiwa mulombwana Davi agamanle laba mabasa matene anfunana Mulugu tempu yenno, Davi ohogona gona wa ukwa, liye tukuliwa, dowa koyiwa na makalelo amohive nnga akoyiwe andimuwaye a wanle, liye vundela evo. 37Mbwenye wenno Mulugu amuvenyihile liye mokwani, kavundile.>>

38<<Nyo abalaga, inafwanela muiziwe ira peno munalaleyiwa ira mutu uli watene unowanda leveleliwa jotega jaye muwari mwa Yesu. 39Muwari mwa Yesu, mutu uli watene unamuroromela unokutchiwa mwa jatene jejo jahawandile liye kutchiwa muwari mwa malamulo a Mozeji.>>#13:38-39 Mazwala anawonga Muselu Wapama mogwada. Voroma, mutu uli watene unowanda leveleliwa mwa jotega jaye muwari mwa Yesu Kiristu. Mbwenye vulusiwa kahi para atu atene. So mbwenye vulusiwa uli para mutu uli watene unamuroromela. Eto zela malamulo, nnovwa ira mutu amuroromela Yesu unokutchiwa mwa jatene jejo jahawandile liye kutchiwa muwari mwa malamulo a Mozeji. Ku wonga muwari mwa malamulo a Mozeji, kalivo nne mutu mmohi unawanda leveleliwa yotega. Mbwenye, mutu amuroromela Yesu Kiristu, jotega jaye jatene unoleveliwa.

40<<Polre polre tawiha ira yenno yawongile anamafiyiheda inaze iireye muwari mwa nyo. Tchoira aliwa kohowonga mazu a Mulugu oira:

41 <Kaing'anani nyo atu opokiha nyo! Mutikiniheye eto mutolotchiwe mwasiwa kamunafuna roromela inalaba miyo muwari mwa nyo masiki mwagawandeliwe.> >>

AJudewu a Antiyokiya kohatamangiha Barnabe na Pawulo mwilamboni mwewa

42Evale atwale kabalaleyaga, kohavepa aPawulo, aliwa ira: <<Nnavepa ira sabado mmohiwa unaza, muwele muze munifundjihe akoka.>> 43Mwa enne kagamanle alanya atu atene kagumanne, aJudewu adjindji vamohi na atu adjindji omuriheda Mulugu ohara makalelo a aJudewu, kohoroma muhara Pawulo na Barnabe. Mwa enne aliwa kohowongagave mazu na ale kaaharile, aliwa akokomezaga ira kawendegeve na sayi da Mulugu.#13:43 kawendegeve na sayi da Mulugu: Ku wonga ira aliwa kohoroma wenda na sayi da Mulugu. Karomile wenda na sayi da Mulugu momuroromela Yesu. Ali ira kawendegeve na sayi da Mulugu muwari momuroromela Yesu. Wenda na sayi da Mulugu ku wenda na makalelo onvepa Yesu ira ausogolrelre mwatene mwene munawenda we.

44Sabado oharela agafiyile, atu atene kafwanyeya sidadi ya Antiyokiya ile kohozaga nimburo nenne ira kavwe mazu a Nabwiya. 45Mbwenye aJudewu kagaaonne atu oindjiva ohokala a masika kazaga ira kavwe muselu awonga aPawulo, kohakalela aPawulo nrima, aliwa roma wonga jomululuviha Pawulo, kamurunihaga jawonga liye. 46Evale Pawulo na Barnabe kohowonga molimbiha murima kaawakulaga aJudewu ale keraga: <<Kavuruwanani. Yohofwanela nyo aJudewu mukale arandji vwa mazu a Mulugu ala. Mbwenye voira peno nyo munatukula mazu, nyo helaga vammambalo, nyo vionihedaga nnga atu ohofwanela kana ingumi yohomala, hiyo peno eni nnouhiyani ira nidowe naalaleyege atu ohokala aJudewu! 47Tchoira hiyo Nabwiya unirumile ira:

<Miyo duhusakanya ira ukale moneya wa atu ohokala aJudewu ira utukule vulusiwa fiyeda magomo wa ilambo ya vati.> >> # Izaiya 49:6

48Evale atu ohokala aJudewu kafwanyeyaga evale kagavwile mazu a Pawulo, kohoteyelaga, aliwa titimihaga mazu a Nabwiya. Vevale atu atene kasakulriwe ira kakayena ingumi yohomala kohomuroromela Yesu.

49Evale Mazu a Nabwiya kogaweya ilambo yatene yafwanyeya atu ile. 50Mbwenye aJudewu kohagumaniha ahiyana omuriheda Mulugu, okana mabasa orihediwa vamohi na andimuwa andimuwa a sidadile ira kamuharaharege Pawulo na Barnabe, aliwa fiyeda mwezo oatamangiha mwilamboni mwewa.

51Evale Pawulo na Barnabe kohotata tumbulru nafwanyeyaga mmanyaloni mwewa#13:51 kohotata tumbulru nafwanyeyaga mmanyaloni mwewa: Yali ionihedo yoaruniha mazu awonga aJudewu. Aliwa kohotata ira kahiyede jotakala ja atwale jihale mwilamboni mwewa. Nione Matewuji 10:14; Markuji 6:11; Lukaji 9:5. moaruniha ale kaatamangihile, aliwa dowa sidadi ya Ikoniyo. 52Mbwenye aliwa masiki katamangihiweve, anamamuhara Yesu kafwanyeya sidadi ya Antiyokiya kagahanle, kohagalala eto kohozaleliwa Munemba Otchena.

Currently Selected:

Joira ja Anamarumiwa 13: iLolo

Highlight

Copy