2 Amwene 6
6
Elizewu ohotavula mbazo yamorele mwiko
1Siku nimohi asempuru a anamafiyiheda kohomuwongagana Elizewu, aliwa ira: <<Mbwiyeni nimburo nnakala hiyo nigumanaga na nyo, nihitabwa yeva. 2Nnafuna nidowe muhindje Jordawu, nakakate kada mutu imiri imohi imohi ira niwande sakanyeda nimburo nimohi niwa wewule nnafuna hiyo gumanagavo.>> Evale Elizewu ohawakulaga, liye ira: <<Kadowani!>> 3Eto mutu mmohi ohowongaga eraga: <<Yohofwanela na nyenne mudowe vamohi na hiyo!>> Evale liye ohowakulaga eraga: <<Kavali makani, miyo nnodowa vamohi na nyo!>> 4Mwa enne kohodowaga vamohi na liye. Kagafiyile muhindje Jordawu ule, kohoromaga kakata jimiri jiwa. 5Mbwenye kakakatagave enne, mutu mmohi mbazo yannaga liye yohokuleyaga, aliwa dowa morela mwiko. Evale mbazo ile yagamorenle mwiko, liye ohokuwaga awongaga eraga: <<Dihikwa miyo mbwiyeni! Mbazo tchali yaga, dere boliha.>>#6:5 Mbazo tchali yaga, dere boliha. Ora yenno mbazo ali yengo yokwima bure mwasiwa mabasa opiya mabwe ira kakale momba kahi a masika. Nona dimeliha mbazo alive mulandu mulukulu nnga dimeliha djinga tempu ili hiyo ila. 6Evale Elizewu mutu wa Mulugu ule ohonfukaga eraga: <<Imorele vavi?>> Evale liye agamutonyihedile vevo vamorele mbazo ile, Elizewu ohogwadaga mwana imiri, liye vokeda vevo vamorenlege atu. Mwa enne mbazo ile yohoroma mbelruwa. 7Noira enne, Elizewu ohomuwandelaga, liye ira: <<Katukula.>> Evale liye ohotapulaga ndanda naye, liye itavula.
Elizewu omuwandela mwene wa Izarayeli jejo jawonga akuda Siriya mokoyeya
8Fwanyeya ira mwene wa Siriya okanetcha wanawana na aIzarayeli. Siku nimohi ohawandelaga andimuwa kalaba vamohi na liye eraga: <<Fendo ila nnafuna nakunge misasa dihu nimburo na Udje.>> 9Noira enne, mutu wa Mulugu ohorumihaga milanyo wa mwene wa Izarayeli amuwandelaga ira: <<Nimburo na Udje kuvirewo. Mwasiwa akuda Siriya anafuna kakunge misasa diwa wewo.>> 10Mwa enne mwene wa Izarayeli ule ohawandela anyakondo aye, liye mala awendjeliha ira kahavirewo nimburo nawonga mutu wa Mulugu ule. Eto yenno yoireya akoka fendo dingasi dingasi, Elizewu amuwendjelihaga mwene, mwenole liye arambelihagawo anyakondo aye.
11Evale mwene wa Siriya agaonne ira aIzarayeli tchawanda vira nimburo nenne, ohotakaleliwa, liye agumaniha andimuwaye, liye afukaga eraga: <<Ukala muwari mwa hiyo mutu unadowa amuwandelaga mwene wa Izarayeli zela jatene jinapanganela hiyo. Kadiwandeleni, kodi mutu wenno unairana ejo bani?>> 12Evale mundimuwa mmohi ohowakulaga eraga: <<Mbwiyeni so mwene, muwari mwa hiyo kalivo unadowa amuwandelaga mwene wa Izarayeli. So mbwenye namafiyiheda Elizewu wenno unafwanyeya mwilamboni mwa Izarayeli, liyene gunamuwandela mwene wa Izarayeli masiki mazu matene munawonga nyo mokoyeya kwartuni wenyu.>> 13Evale mwene wa Siriya ule ohowongaga eraga: <<Kadowa wamusake ira uone vali liye ira daarume atu, kadowe kamuhinde, kamuzena.>> Noira enne, kohomuwandelaga ira: <<Liye unafwanyeya sidadi ya Dotani.>> 14Evale oharumaga atu na kavalo, na aaterelado aye, vamohi na nikuru nindimuwa na anyakondo, aliwa za irindja sidadi ya Dotani ile na mahiyu.
15Mmetcheloni muwa, namalaba wa mutu wa Mulugu ule agavenyile na mabebehene, agakumile, ohoonaga nikuru na anyakondo nagamanle irindja sidadile kagali vamohi na kavalo dewa vamohi na aaterelado ewa a kondo. Evale ohodowaga muwandela mbwiyaye Elizewu, liye ira: <<Nihikwa mbwiyeni! Kodi nnafuna niire avi?>> 16Evale Elizewu ohomuwakulaga eraga: <<Kuove. Tchoira ale anafwanyeya na hiyo kohoindjiva akwaranya ale anafwanyeya na aliwa.>> 17Evale Elizewu oholobelaga awongaga eraga: <<Yehova, nnouvepani muhule meso aye ira aone.>> Evale Yehova ohulaga meso a muzombole. Muzombole againg'anne, ohoonaga kavalo dohokala da masika da munlo vamohi na aaterelado ohokala a masika a munlo mwango watene wenne, jagamuwerewerile Elizewu.#6:17 kavalo… na aaterelado ohokala a masika a munlo… kagamuwerewerile Elizewu: Kafwanyeya kagali angelro a Mulugu karumiwe ira kamukoye Elizewu. Tchaoneya na meso mbwenye so kohooneya moonihiwa na Mulugu. Nona Elizewu hakagana ova zela aSiriya pwi kazile ira kampe. 18Mwa enne akuda Siriya ale kagazile wa Elizewu ira kamuhinde, Elizewu oholobelaga wa Yehova, liye ira: <<Yehova nnouvepani ira mwaafunge atwala meso ewa ira kahaonege.>> Evale Yehova ohofunga meso a anyakondo a aSiriya ale nnga mwemo mwavepile Elizewu. 19Noira enne, Elizewu ohawandelaga akuda Siriya ale eraga: <<Mutu munanvenda nyo, ndiliwa kahi yenna eto nne sidadiwa kahi yenna. Kadiharegeni ira duveleleni wa liye.>> Evale liye ohasogolrelraga, liye afiyiha sidadi ya Samariya.
Mwene wa Izarayeli ohasakanyelaga anyakondo a Siriya pwando
20Mwa enne kagavolowile musidadi mule, Elizewu oholobelaga, liye ira: <<Yehova kaahuleni atwala meso ewa ira kaone.>> Evale Yehova ohulaga meso ewa ira kaone akoka. Evale paonnege atu ira: <<Hiyo nnafwanyeya sidadi ya Samariya.>> 21Noira enne, mwene wa Izarayeli agaaonne, ohonfukaga Elizewu, liye ira: <<Babani kodi miyo podi apa atwala? Miyo podi apa?>> 22Mbwenye Elizewu ohowakulaga eraga: <<Nari! Kodi vihikala wandeya apa na masupadawo vamohi na mafumo awo atu anno watukunle we nnga azari kondoni? So mbwenye waasakanyele jodja vamohi na mahindje ira aliwa kadje, kang'we mahindje, amala kadowege wa mbwiyiwa.>> 23Evale mwene wa Izarayeli ohasakanyelaga pwando indimuwa, aliwa dja vamohi no ng'wa. Nomala enne, ohagunyaga, aliwa welela wa mbwiyiwa. Kuma evale anyakondo a Siriya kohomala tempu yapamene kahavolowaga mwilamboni mwa Izarayeli.
Akuda Samariya kohokana ndala na mwasa orindjiwa
24Jagaireyile jejile, vagavirile malambo, mulombwana Beni-Hadade mwene wa Siriya#6:24 Beni-Hadade mwene wa Siriya : Afwase amwene ambinli owu araru kalabile na nzina nimohive. Ku wonga mwene mmohi akwa, mwanaye ahambihiwa umwene vamalroni va babaye, liye tukula nzina na babaye ule. ohogumaniha nikuru naye natene na anyakondo. Aliwa venya, dowa irindja sidadi ya Samariya. 25Mwa enne sidadi ya Samariya ile yagamanle rindjiwa, jodja jewa johamalela fiyeda kalamo ndala yohokala ya masika, fiyeda muru wa buru gulihiwaga kobiri da parata 80 eto kopo imohi ya maroti a kangayiwa gulihiwaga kobiri da parata tanu.#6:25 jodja jewa johamalela fiyeda kalamo ndala yohokala ya masika: Fwanyeya ira akuda Siriya kohomala irindja sidadile. Evale aliwa tchawanda kumela unde ira kadowe kasake jodja. Aliwa kadja jodja jafwanyeyana atu mwemule. Mwa enne jagamanle, kohokana ndala fiyeda muru wa buru gulihiwaga kobiri da parata 80 eto kopo imohi ya maroti a kangayiwa gulihiwaga kobiri da parata tanu. Fwanyeya ira buru ali mwanainyama Mulugu aakamelihile liye ira aIzarayeli kahadje. (Levitiku 11:1-8; Detoronomiyo 14:3-8) Eto kobiri da parata 80 tchali kobiri ya vang'ono, mbwenye yali ilukulu nnga mutu inavahiwa liye alaba mmindani mwa nfwaye malambo matanu. 26Mwa enne siku nimohi mwene wa Izarayeli awendawendaga vazulu va muru wa sidadile, ohokalawo muhiyana mmohi amukuwenlege eraga: <<Mbwiyeni so mwene waga nnavepa ira mudikamihede.>> 27Evale mwene ohomuwakulaga, liye ira: <<Akala Yehova kanaukamihedani, nnga unafuna ukamiheda gu miyo? Tchoira roma nimburo nobubudavo jalo dowa ante nimburo nofinyamo uva kilivo yengo ihanle.>> 28Eto noira enne, mwenole ohowongagave akoka, liye nfuka muhiyanole eraga: <<Kodi weyo unafuna nni?>> Evale muhiyanole ohowakulaga eraga: <<Muhiyana nfwagola ere diwandela ira: <Umpe mwanawo wa mwanapongwe uyo peno ira nimutakune. Era eno metchelo nnomutakuna mwana waga.> 29Noira eno, hiyo mpa mwana waga, hiyo mpiya, nomala hiyo mutakuna. Mbwenye mmetcheloni muwa, miyo dagamuwongilena ira: <Peno ndowe nimpe mwana wawo ira nimutakune!>, liye wire mukoya mwanayiwa.>> 30Mwa enne mwenole agavwile mazu a muhiyanole, ohokawulaga jowara jaye. Evale awendagave vazulu va muru vale, atu atene kohoonaga sakwi nawarilege liye ahela muwari.
31Evale mwenole ohowongaga eraga: <<Peno muru wa Elizewu mwana Safati ahagwadiwe, Mulugu aditonge na makalelo anafuna liye!>> 32Mwa tempu yenne Elizewu afwanyeya ogaratene vande vaye, agali vamohi na andimuwa a sidadile. Mwa enne mwene ule ohomurumaga mutu ira asogolre, adowe wa Elizewu. Mbwenye maliba rumiwa ule ahanafiye, Elizewu ohawandelaga andimuwa ale eraga: <<Kaing'anani nyo! Eni mpanga ule uhumuruma mutu ira aze adigwade muru. Mutu umurumile liye afiya, mufunge musuwo eto mulimbihe pama ira ahavolowe. Eto nnovwa migugudo da mbwiyaye umurumile. Eni unaza mundulri mwaye.>> 33Evale Elizewu awongagave ahanamiyale, tchi tempu yafiyaga maliba rumiwa ule. Mohodibeliwa eto mwene ule ohofiyaga, awongaga eraga: <<Ubure watene wenna unakumela wa Yehova. Kodi mwasiwa gwa nni unafunela miyo kalela mudedihaga ira anikamihede?>>
Currently Selected:
2 Amwene 6: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
