2 Amwene 5
5
Vulumutchiwa wa mulombwana Namani maliba maranya
1Ohokalawo mulombwana mmohi eriwa Namani. Liye ali musogolrelri mundimuwa wa anyakondo atene a mwene wa Siriya. Mwene waye omuroromeletcha eto omutitimihetcha, tchoira Yehova oavaha akuda Siriya gondjiha muwari mwa liye.#5:1 Yehova oavaha akuda Siriya gondjiha muwari mwa liye. Fwanyeya ira akuda Siriya tchali atu omuroromela Mulugu. Kohokana mulugu wewa aitaniwa Rimoni. (2 Amwene 5:18) Aliwa eto kafwanyeya kagali amwidani a aIzarayeli. (2 Amwene 5:2) Mbwenye na mwasa wa jotega ja aIzarayeli, Mulugu ohava akuda Siriya kopolo doagondjiha atwaye. Nione Detoronomiyo 28:15,25,28; 2 Koronika 24:24. Eto liye afwanyeya agali mulombwana wa kopolo owanda wana kondo. Mbwenye liye ohokana urenda wovunda maningo eriwa maranya. 2Fwanyeya ira fendo imohi anyakondo a Siriya kagadowile mwilamboni mwa Izarayeli ira kawane, kohomuhinda mwana namwali mmohi eni, aliwa mudowana vande va Namani, liye roma mulaba mwadi Namani. 3Evale Namani abulelagave enne, namalaba wa muhiyana ule, ohomuwongagana sinyoraye mwadi Namani, liye ira: <<Ahakanlege patarawu waga anfwanya namafiyiheda wenno unafwanyeya Samariya, ogonvulumutcha maranya unna liye.>> 4Namani agavwile mazu anne, ohomuwandela mwene waye wa Siriya zela mazu awongile namwali wa Izarayeli ule. 5Evale mwene wa Siriya ule ohowongaga, liye ira: <<Venya, udowe. Miyo nnolremba karta ira udowegena wanvahede mwene wa Izarayeli!>> Mwa enne Namani ohomaruwaga, liye tukula kilu 350 da parata na kilu 70 da oru vamohi na jowara jotchindja fendo kumi. 6Eto ohodowana karta nanvahedile mwene wa Siriya nne, liye nvaha mwene wa Izarayeli. Karta niwa nawonga ira: <<Miyo dihimuruma mulombwana Namani vamohi na karta ni. Nnafuna ira liye agafiyile, unvulumutche urenda waye wa maranya.>> 7Mwa enne mwene wa Izarayeli ule agailerile karta nne, ohokawulaga jowara jaye eraga: <<Kodi miyo dili Mulugu ira nnowanda mpa mutu nari nvaha ingumi? Kodi mwasiwa gwa nni mwene wa Siriya dirumihedaga mutu ira dinvulumutche? Eni liye unasakavo mwasa bahi.>>#5:7 ohokawulaga jowara jaye : Malambo a mundulrimu atu kokawula jowara jiwa muwari mokumbanya owu mosanyeya. Fwanyeya ira mwene wa Izarayeli aonne ira yovepa ya mwene wa Siriya yoira maliba maranya avulumutchiwe tchali yengo yowandeya. Voira liye kafunne jowana na mwene wa Siriya, muwari mosanyeya ohokawulaga jowara jaye eto ohowonga ira Eni liye unasakavo mwasa bahi.
8Mbwenye mutu wa Mulugu Elizewu agavwile ira mwene wa Izarayeli ohokawula jowara jaye, ohorumihaga milanyo wa mwene ira: <<Kodi mwasiwa gwa nni nyo kawulaga jowara jenyu? Kamurumeni Namani aze uno ira akayena ibaribari ira mwilamboni mwa Izarayeli muhukala namafiyiheda.>> 9Mwa enne Namani ohomaruwa na kavalo daye vamohi na aterelado waye, aliwa za imela va mulango va nyumba ya Elizewu. 10Kagafiyile va Elizewu, mulombwana Elizewu mbwenye kakumile mmba mwaye. So amurumilege mutu, liye ira: <<Udowe wamuwandele ira adowe muhindje Jordawu, ahambe fendo tanu na mbinli. Era eno unovulumuwa, maningo aye anokala pama.>>
11Mbwenye Namani agavwile mazwale, ohotakaleliwaga, liye maruwa ira awelelege mundulri, liye roma wonga eraga: <<Miyo dizaga daumbuwela ira liye unokuma, aze adiwatchele, avepe nzina na Yehova Mulugu waye, agali oimelene vanafwanyeya miyo eto atukule mandaye avirihe muvilondani mwaga ira adivulumutche. 12Tchoira Damaxiku uhukala muhindje Abana na muhindje Faripari, dedo nnafwanyeya dagali mihindje dindimuwa dapama kwaranya mahindje matene a Izarayeli. Kodi miyo kadawanda hamba mihindje dedile ira divulumuwe?>> Mwa enne ohomaruwaga, liye dowaga otakaleliwene. 13Mbwenye anamalabaye kohodowaga muwandela keraga: <<Babani, ahakale namafiyiheda auvepani ira muirena yengo yorutcha, kodi kamwairana? Eto fwanyeya ira iwongile liye kahi yengo yorutcha, nari. So uwongile ira mudowe mwahambe, era eno, munovulumuwa.>> 14Evale mulombwana Namani ohovwaga mazu a anamalabaye ale, liye dowa muhindje Jordawu, bwina mwiko fendo tanu na mbinli nnga mwawongele mutu wa Mulugu ule. Mwa enne vilonda danna liye dohovolaga, maningo aye aliwa kala pama nnga maningo a mwana.
15Evale Namani vamohi na atwaye atene kohowelaga, aliwa dowa fiya vamentoni va mutu wa Mulugu ule, liye wonga eraga: <<Miyo peno dihiwanda iziwa ira na ibaribari ilambo yatene ya vati kaliwo Mulugu mmohiwa ahali Mulugu wa Izarayeli. Mwa eno, miyo namalaba wenyu nnouvepani ira muwande watchela mwana yovaha inafuna miyo uvahani.>> 16Mbwenye mulombwana Elizewu ohomuwakulaga eraga: <<Miyo nnawonga vamentoni va Yehova, wenno nnamulaba miyo ira kannatukula yengo ili yatene.>> Evale mulombwana Namani ohomukanyihedaga ira atukule, mbwenye liye karumenlege. 17Evale Namani ohowongagave eraga: <<Akala nyo kamunarumela watchela, nnauvepani ira mudihiye miyo namalaba wenyu ditukule teya inawanda tukuliwa na akavaru ambinli,#5:17 ditukule teya: Liye afuna atukule teya ira adowe asakanyena ibuwa yokutavo mukuto wa Yehova. Teya ile yarumelela ira Mulugu wa Izarayeli gu Mulugu waye. Nione Ezodu 20:24-25. didowegena. Tchoira kuma peno dowa sogolro, miyo namalaba wenyu kadiza divelela mukuto otumeya wa amilugu amohiwa, ahali Yehova. 18Mbwenye nnavepa Yehova adikurumuwele yengo imohi ineretcha miyo. Tchoira mwene waga tempu inavenya liye adowaga mutamalela Rimoni wenno unafwanyeya agali mulugu wa Siriya, miyo nnonveleletcha eto dadowa wewule, na miyene nnokokoretcha nimburo nenne mwasiwa miyo gunamuhidedeletcha liye akokoraga. Nnavepa ira dadowa wanihu, Yehova adiona diiragana eno, adikurumuwele zela yenno.>> 19Mwa enne Elizewu ohomuwandelaga eraga: <<Venya, udowege mwa murendele.>>
Jeyazi ohalana maranya a Namani
20Mbwenye Namani agamaruwile adowaga, agawendile vang'onove ahanasuse, Jeyazi namalaba wa Elizewu mutu wa Mulugu ule, ohoumbuwelaga ira: <<Mbwiyaga okonda jejo jazilena Namani nkuda Siriya ule ira anvahe. Mbwenye miyo nnawonga vamentoni va Yehova ira nnafuna dimutamangele ira adivahe yengo imohi.>> 21Mwa enne Jeyazi ohotamangaga amuharaga Namani. Evale mulombwana Namani agamuonne Jeyazi atamangaga azaga mundulri mwaye, ohotitaga muatereladoni mwaye, liye nfuka Jeyazi eraga: <<Kawonga, ikala yengo iireyile?>> 22Evale Jeyazi ohowakulaga eraga: <<Nari, kiireyile yengo! So mbwiyaga udirumile ira dize wa nyo, mwasiwa azombwe ambinli anafwanyeya kagali asempuru a anamafiyiheda bazile tchineneva kakumaga ilambo ya mmwangoni ya Efarayimi. Mbwiyaga unavepa ira mwaavahe kilu 35 da parata, vamohi na jowara jotchindja fendo mbinli.>> 23Mwa enne Namani ohowakulaga eraga: <<Kavali makani. Miyo eto nnouvaha kilu 70 da parata.>> Evale mulombwana Namani omukanyiheda, liye tukula masakwi menli, helamo parata ule. Eto ohotukulaga jowara jotchindja fendo mbinli. Noira enne oharumana anamalabaye ambinli mitolro dile, aliwa nvelelana Jeyazi. 24Evale Jeyazi agafiyile nkuma eni, awandamelaga vande vale, ohowatchela masakwi ale, dowa volotchiha mmba. Evale ohagunya anamalaba a Namani ale, aliwa dowaga.
25Evale liye ohovolowaga mmba mule, dowa imela vamentoni va mbwiyaye. Evale Elizewu ohonfuka eraga: <<Jeyazi kodi unakuma uvi?>> Liye ohowakulaga eraga: <<Miyo namalaba wenyu kadadowile yengo.>> 26Mbwenye Elizewu ohomuwandelaga eraga: <<Kodi weyo unaumbuwela ira miyo kaduonne? Tchoira tempu yatita mulombwanole muatereladoni mwaye agumanaga na weyo, munemba waga afwanyeya vamohi na weyo aing'anaga jatene. Jiireyile peno kavili mwasa oira weyo uwatchele kobiri, nne jowara, nne minda da azeti, nne minda da uva, nne mabila, nne ng'ombe, nne anamalaba a alombwana nne anamalaba a ahiyana. 27Mbwenye na mwasa wa yenno isakanyile we, maranya afwanyeyana mulombwana Namani anowela kakale na weyo vamohi na ahimawo dowagave musogolro kala no kala.>> Noira enne, Jeyazi ohovenyagavo vamentoni va Elizewu aganna maranya otchena mbuu nnga ntondje, maningo aye.
Currently Selected:
2 Amwene 5: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
