1 Timoteyo 5

Makalelo afuna Timoteyo wenda na atu muwari molaba mabasaye

1Wafunaga muwandela mundimuwa wa idadi mazu, kumuwandele muwari momusumulula, mbwenye umukokomeze nnga babawo. Eto zela azombwe, inafwanela waawongena nnga abalawo. 2Eto waafwanya ahiyana a idadi, waawongena nnga ammawo. Eto waafwanya anamwali, waawongena nnga arongoliyo moviing'ana pama tawiha ira unagwe motegani.

Makalelo ira atu omuroromela Yesu kaakamihedege amakwele a ahiyana

3Inafwanela mmukamihedege makwele wa muhiyana uli eka mwa ibaribari. 4-5Makwele wa ibaribari gwenno uli eka, unagarati so amuumbuwelaga Mulugu. Ntana na mahiyu alobelaga, anvepaga Mulugu ira amukamihede. Mbwenye makwele unna ahimaye na azuliye, inafwanela mubabihe ahiya aliwa kafundje makalelo oirana ja Mulugu moakamiheda atu anafwanyeya vande viwa ira kapagalri mangawa anno kaireliwa atu na ababiwa tempu kaleliwa atu kagali ahima. Tchoira yenno tchi yengo yofwanela vamentoni va Mulugu. 6Mbwenye mwamuona makwele ira jofuna jaye jihiindjiva, na liyene mmuhiye. Tchoira liye masiki agaliwove, unawenda okwene. 7Miyo nnafuna we Timoteyo waarume ira kairegena jatene jinawonga miyo ji ira kawendaga, kahafwanyeyena imanya. 8Mbwenye mutu wenno unakonda mukamiheda mutu osegedeya uli muibalini mwaye, simbwasimbwa amakwele a muibalini mwaye osegedeya, mutu wenno umala hiya ibaribari inahara hiyo eto ubure waye uhumukwaranya mutu wenne ahanamuroromela Yesu.

9Makwele unafuna lrembiwa valistani inafwanela akale ofwanyeyana yaka 60 para sogolro eto akale wenno ababihile teliwa na mulombwana mmohi bahi, 10akale mutu oiziweya ira unoiretchana japama, akale oalela pama ahimaye, oawatchela pama alendo, okana respeto pama ira atu otchenihiwa kazaga vaniwa, oahuwetcha manyalo eto akale oakamiheda atu osegedeya. Akala jatene jene oirana, makwele wenno alrembiwe valistani.

11Mbwenye kumulrembe makwele wenne unna idadi ya vang'ono tawiha ira sogolro unerege funa joteliwa akoka hiya hindaga ja Kiristu. 12Evale unokana mulandu mwasiwa liye uhiya mmambalo yopangana yaye yoira alabege mabasa a Kiristu bahi.#5:12 uhiya mmambalo yopangana yaye: Ku wonga muhiyana ira alrembiwe valistani va amakwele ofuna kamihediwa, unoroma rumela ira ahateliwe akoka mbwenye alabege mabasa a Mulugu bahi. Aharumele ejo, kanalrembiwa na ahiyana afwaye. 13Ubure umohiwa, makwele okana idadi ya vang'ono aroma tambilra kobiri, kanahinda yengo, so unoroma wendaga mmavande awalredege jaye. Muwari mohohinda yengo, munokuma jowamba, urambwe, aliwa wongaga jengo johofwanela.

14Nona miyo nnaona ira yapamiwa, makwele uli ahanaulule, ateliwe, aabale ahimaye, asapege jaye vande vaye. Kairana eno, ale ananiida kinakana makalelo ofuna ninukeda yengo. 15Nnawonga eno mwasiwa kohokala amakwele kahateliwe akoka, kaperuwile, aliwa roma hara ndila ya Satana.

16Inafwanela kada muhiyana omuroromela Yesu awande mukamiheda makwele unafwanyeya muwari mwa ibali inna liye ira nikuru na atu omuroromela Yesu nahasimbwe kana mabasa oakamiheda amakwele adjindjene, so mbwenye kakayena mabasa oakamiheda amakwele ogomeliwa.

Mazu amohiwa zela aansiyawu

17Inafwanela atu omuroromela Yesu kaakamihedege aansiyawu ewa. Makamaka ansiyawu olaba mabasa olaleya eto ofundjiha, wenno arihediwe. Muwari morihediwa inafwanela ansiyawu wenno akamihediwe. 18Mwasiwa ilrembiwa mMazuni ira: <<Kakalevo unafuna imanga ng'ombe wanoni, amala adugudiha udja.>>#5:18 Kakalevo unafuna imanga ng'ombe wanoni, amala adugudiha udja. Malambo a mundulrimu atu kodowana ng'ombe vafuna atu bubuda jalo, aliwa roma wendihaga ng'ombe dile vazulu va jodja muwari momwalaniha jodja na makata. Fwanyeya ira malamulo anokondiha mangiha wanoni wa ng'ombe, amala we dugudihaga jodja. (Detoronomiyo 25:4) Ali ira ng'ombe ile irome takuna jodja ja vang'ono nnga yotambilra yaye zela mabasa alaba liye. Tapulela ira wenno unalaba mabasa a Mulugu ukana direitu yowatchela yengo zela mabasa analaba liye. Eto mMazuni mwakoka mwene mulrembiwa mazu oira: <<Mutu wenno unalaba mabasa, inafwanela atambilre zela mabasa analaba liye.>>

19Wanvwa mutu mmohi unamunukeda ansiyawu yengo, kubaranyede dowa nfuka. Mbwenye waavwa atu ambinli owu hehi araru kawongaga imohive, tchi tempu inafuna we venya dowa nfwanya ansiyawule. 20Wamuona ira kanawanda hiya jotega jaye, umusumulule vatando vene vamentoni va atu atene ira aansiyawu afwaye kaovege.

21Miyo nnouruma vamentoni va Mulugu na Yesu Kiristu na angelro anno Mulugu aasakunlre liye, ira mangano matene anawonga miyo ala, uharihegemo mohokana nfwawo, mohokana nsakulro.

22Weyo kukayena marulu zela muhela mutu mandawo eto kurumelele jotega ja atu amohiwa.#5:22 Malambo a mundulrimu andimuwa muwari mwa atu omuroromela Yesu koahela atu manda muwari moalobelela zela maurenda nari zela muhambiha mutu mabasaye. Kana marulu zela muhela mutu mandawo wafuna zela muwari momuhambiha mutu ira akale mundimuwa, joira jaye jahanaiziweye pama. Evale agahambihiwe, airana yabure, ora yenno na maliba muhela manda wenne unaoneyege nnga uhuimelela umboni zela ubure unera liye ule. Nona Pawulo amukokomezaga Timoteyo ira kurumelele jotega ja atu amohiwa. Uwendegeve na makalelo apama. 23Kung'wege mahindje bahi, nari. Mbwenye ung'wege vinyu vang'ono, ira ukamihediwe zela urenda wa mbani nari maurenda amohiwa anakayetchana we.

24Uumbuwele ira kokala atu amohiwa jotega jiwa jinavayela oneya vatando vene, tempu yewa yotongiwa yahanafiye. Mbwenye kohokalawo atu amohiwa kahanabaranyeda oneyana jotega jiwa.#5:24 Mazu oira kohokalawo atu amohiwa kahanabaranyeda oneyana jotega jiwa, tapulela ira inafwanela andimuwa kahakayena marulu ofuna muhambiha mutu izo, tchoira ukala mutu mmohi wabure eto jotega jaye kajinavayela oneya vatando. Nona inafwanela umale malambo madjindjene umuing'anaga mutu ira uonevo ibaribari ili liye. Akala ku upama nari akala ku ubure, unokumelela. 25Na makalelo amohive, akala mutu unoirana japama, joira jaye japama jinooneya vatando. Masiki joira japama jikoyeye, jinoza jioneye.

Currently Selected:

1 Timoteyo 5: iLolo

Highlight

Copy