1 Timoteyo 4

Zela atu owonga jonama na nzina na Mulugu

1Munemba Otchena unoniwandela mohokayikela ira matempu ogomiheda, kohokalamo anafuna kapupuruwe, kahiye ibaribari inahara hiyo, kahare minemba donyenga na jonama jinafundjiha minemba dabure. 2Anerege wonga jonama johofwanela jile muwari moanyenga atu eto keraga eno mmirimani mwiwa kinakayegena kumbanya zela jabure jinaira atu.

3Muwari monama anawongege makalelo ofuna ahiyiha atu ira kahatelane eto anerege wonga makalelo oahiyiha atu zela jodja jejo jipandutchile Mulugu ira hiyo atu omuroromela eto oiziwa ibaribari nidjege muwari momutamalela. 4Tchoira jatene Mulugu jipandutchile liye ti jengo japama. Akala hiyo nnowanda dja yengo muwari momutamalelana Mulugu, kilivo yodja inafuna hiyo konda. 5Tchoira jodja jihimala tchenihiwa na mwasa wa mazu a Mulugu#4:5 jodja jihimala tchenihiwa na mwasa wa mazu a Mulugu: Mazu anawonga ira Mulugu agamanle sakanya vinyama datene dohiyana-hiyana, liye ohoona ira tchapama. (Jenesesi 1:25) Eto Mulugu ohowonga na Nowe ira: Sawasawa nnga dauvahileni miyo wanle ira mudjege jalo, peno miyo nnouvahani ira mudjege vinyama datene. (Jenesesi 9:3) Eto Yesu agazile mwilamboni ya vati, ohowonga ira: Tchoira mutu adja yengo, kinadowa mmirimani mwaye. Inadowa munifuni. Yakuma munifuni, kumela unde… Mowonga enne ku tapulela ira Yesu ohorumeliha jodja jatene jene ira jidjiwege. (Markuji 7:19) vamohi no lobela.

Jokokomeza Pawulo anvahile liye Timoteyo

6Watukula jatene jinauwandela miyo ji, waafundjiha abalihu, weyo unokala namalaba wapama wa Yesu Kiristu ovilemeliheda mazu#4:6 ovilemeliheda mazu ku wonga fundja mazu fiyeda mwezo olemela pama. Ku wonga Timoteyo eretcha fundja mazu ira awande laleya pama mohokayikela, mohonama. a ibaribari nnahara hiyo na mafundjihelo a ibaribari anno anahara we.

7Kuharege anatchitwa ohokana mabasa anno anamululuviha Mulugu. Mbwenye inafwanela uterenari zela irana jofuna ja Mulugu. 8Atu katerenarihaga maningwiwa, kahi ira terenariha maningo kunna mabasa. Ukana mabasa, so mabasiwa kinasusa. Mbwenye we uterenari zela irana japama ja Mulugu. Tchoira terenari wewo unonilabela yengo tempu ili hiyo ila eto unonilabela yengo tempu inafuna za sogolro.

9Mazu anawonga miyo ala ba a ibaribari eto bofwanela rumeliwa mohokayikela. 10Tchoira nnorumela laba no onihiwa goyi mwasiwa hiyo yoing'anela yehu inafwanyeya muwari mwa Mulugu Okalawo wenno uli Nvulusi wa atu atene makamaka ale anamuroromela Yesu.#4:10 Nvulusi wa atu atene makamaka ale anamuroromela Yesu. Ku wonga Nvulusi mmohive owanda avulusa atu gu Yesu. Mbwenye kahi ira anafuna vulusiwa ba atene. So anafuna vulusiwa banne anamuroromela Yesu. 11Jatene jinawonga miyo ji, inafwanela waafundjihege afwawo eto waarumege. 12Kwahiye atu ulramwisa na mwasa oira weyo kunna idadi yapama. So inafwanela ukale mutu owonga jowonga japama, ukale oirana joira jofwanela, ukale mutu oaziveliwa afwawo, ukale wa nroromelo, ukale mutu ohofwanyeyana yabure ili yatene ira afwawo kausazihege weyo.#4:12 ukale mutu ohofwanyeyana yabure ili yatene ira afwawo kausazihege weyo: Ku wonga ale anawonga ira: <<Muvwe jinawonga miyo, hiya saziha joira jaga>>, atu anno kinna pandi na Mulugu eto kahi atu ofwanela vahiwa undimuwa. 13Dahanaze wewo, inafwanela weyo ukale mutu oailerela afwawo mazu a Mulugu vatando vene eto inafwanela waakokomezege eto waafundjihege. 14Malambo a mundulrimu aansiyawu kagagumanne, kohouhela manda eto kohowonga mazu ofiyiheda a Mulugu zela weyo. Muwari mwa emule, weyo ukana ivahiwe we. Kulramwisege yenno ivahediwe we.#4:14 weyo ukana ivahiwe we: Yengo yavahiwe liye kaniiziwile. Afwase aansiyawu kohowonga mazu omulimbiha muwari mwa kopolo da Munemba Otchena ira: <<Weyo wadowa, walaleyege mohoova tchoira Mulugu unousogolrelra. Mwatene mwene unafuna we vira, Mulugu unokala na weyo ira mazu anafuna we laleya kavweyege pama.>> Va Pawulo unamuwumbutcheda nfwaye mazu kawongile aansiyawu ora yenno yamurumile atu ira Timoteyo alimbihe kopolo ira airegena yenno yarumiwe liye. Nione 1 Timoteyo 1:18.

15Jatene jinauwandela miyo ji, inafwanela uzuzumelege ira uiregena na mmirimani mwawo mwatene ira atu atene kauona, kawandege ona ira muroromela Yesu wawo unadowave sogolro.

16Eto inafwanela uing'anege pama mawendelo awo eto uing'anege pama mazu analaleya we. Ukaleleve irana jejo. Tchoira wairagana eno unowanda vivulusa weyo wa mwinnya vamohi na atu anne anavuruwana jofundjiha jawo.#4:16 inafwanela uing'anege pama mawendelo awo eto uing'anege pama mazu analaleya we… Tchoira wairagana eno unowanda vivulusa weyo wa mwinnya vamohi na atu anne anavuruwana jofundjiha jawo. Kohokalawo anamalaleya adjindji anakukumuwela laleya bahi, mbwenye hakukumuwelaga makalelo unawenda liye. Kalaga nnga so unaalaleya atu bahi ira kavulusiwe, mbwenye liye kanna pandi no vulusiwa unalaleya liye ule. Va mbwenye Pawulo unamuwandela Timoteyo ira akale mutu oing'ana pama makalelo awenda liye vamohi na jofundjiha jaye. Mwasiwa mutu akala oving'ana makalelo unawenda liye eto alimbihedaga fundjiha ibaribari, liye mwinnya maliba laleya unowanda vulusiwa eto masiki atu anne ananvuruwana, kaona makalelo unawenda liye, anokana makalelo ofwanela nnga atu anaing'anela vulusiwa.

Currently Selected:

1 Timoteyo 4: iLolo

Highlight

Copy