1 Samuweli 8
8
AIzarayeli kohonvepa Samuweli mwene
1Samuweli agaulunle, ohatukula ahimaye a anapongwe, liye ahambiha ira kaatongege aIzarayeli. 2Murandji baliwa aitaniwa Joweli, wanembinliwa aitaniwa Abiya. Ambinlene katonga ilambo ya Beriseba. 3Evale ahimaye ale kagaromile atonga aIzarayeli, aliwa tchatonga na makalelo nnga atonga babiwa Samuweli. Aliwa katongaga, kaziveliwa kobiri. Aliwa kafunetcha watchela kunya bahi eto tchatonga muibaribarini muwa.
4Mwa enne andimuwa a aIzarayeli kohogumana, aliwa dowa wa mulombwana Samuweli ilambo ya Rama. 5Kaganfwanyile, kohomuwandela keraga: <<Kaing'anani! Nyo eni muhumala ulula eto ahiminyu kinawenda na ndila dapama dawendetchana nyo. Na mwasa wenno hiyo nnafuna ira munivendele mwene ira anitongege na makalelo nnga jinaireya vilambo dimohi diwa da afwihu.>>#8:5 univendele mwene ira anitongege: Mwa tempu yenne aIzarayeli tchanna mwene. So aliwa kanna anamasogolrelra bahi. Eto fwanyeya ira aIzarayeli tchafunne kala atu osogolrelriwa na Mulugu. Aliwa kohowonga ira: <<Hiyo nnafuna niwendege na makalelo nnga jinaireya vilambo dimohi diwa da afwihu.>> Agali atu a vilambo dimohi diwa kawenda na zelru dewa hiya da Mulugu. 6Mbwenye aliwa kagawongile ira: <<Nnafuna munivendele mwene ira anitongege!>>, Samuweli kaziveliwile yovepa yewa. Mwa enne ohonvepa Yehova zelru tivi afuna liye iranavo. 7Aganvepile, Yehova ohomuwakula Samuweli, liye ira: <<Karumela yovepa ya atwayo. Mwasiwa eno aliwa kinaukonda weyo, mbwenye anadikonda miyo ira dahakaleve mwene wewa.#8:7 anadikonda miyo ira dahakaleve mwene wewa: Fwanyeya ira Mulugu ali mwene wa aIzarayeli. Samuweli kaali mwene. So liye ali namatonga. Ahakanlege nnga ja ilambo ya vati, perezidenti ali Mulugu. Samuweli ali nnga mutu unalaba tiribunale bahi. Nione 1 Samuweli 12:12. 8Tchoira romela siku daatukunle miyo Ijipitu, aliwa annanave dihiya dowa akokorelaga amilugu amohiwa. Eto peno anauirela weyo yengo imohive yenno inadiirela atu miyo. 9Mwa eno, weyo inafwanela uvwelele jatene jinauvepe atu. So mbwenye inafwanela uvayele awandela makalelo orutcha anafuna tongaga mwene wenno unafuna atongaga.>>
10Noira eno, Samuweli ohodowaga awandela atu atene mazu matene awongile Yehova zela matongelo a mwene wenno kanvepile atu. 11Ohawandelaga eraga: <<Makalelo anafunege utongani mwene, ba ala. Liye unoatukula ahiminyu a anapongwe ira kakale anyakondo aye. Unoagawamo amohiwa kakale anyakondo ogwela aaterelado, amohiwa kakale aliba wendiha kavalo, amohiwa kakale anyakondo otamanga na mendo sogolro wa aaterelado ale. 12Amohiwa unoahela ira kakale asogolrelri a anyakondo 1.000. Amohiwa asogolrelri a anyakondo 50. Amohiwa unoaruma ira kadowe kalimege, kahandege mmindani mwaye. Eto amohiwa anerege sakanya fwaramento dowanana kondoni na jofuneya jatene ja aaterelado a kondoni. 13Mwene eto unerege asokela ahiminyu a ahiyana. Aliwa anerege kana mabasa omusakanyela mwene maperefume eto kamupiyelege jodja jaye vamohi no muwotchela pawu daye. 14Liye unerege uwakani minda dinyu dapama dolimamo jalo nari minda dinyu da uva ante minda da mitengo da azeti. Unotukula jatene jejo aavahege anamalabaye. 15Liye unerege tukula janekumi ja mmundani na johanda ja uva, aavahege asogolrelri aye na anamalabaye. 16Liye eto unerege uwakani anamalaba enyu a alombwana vamohi na a ahiyana na azombwe enyu apama na aburu enyu apama, adowe alabegena. 17Liye unerege tukula yanekumi ya mabila enyu eto nyo munakala azari aye. 18Jaireya eno, nyo munoza munle ira muvuneliwe na mwasa wa mwene wenno mmusakunlre nyo. Mbwenye Yehova kaza avwa yovepa yenyu.>>
19Evale atwale kagavwile jawonga Samuweli jile, aliwa tchabanlre. Mofutukula kohowakula, aliwa ira: <<Nari! Hiyo nnafuna nimukayena mwene. 20Hiyo nnafuna nikale nnga atu a vilambo dimohi diwa. Mwene wenno nnafuna hiyo mukana gunanitongege, anisogolrelrege mukondoni eto awanege na amwidanihu.>>#8:20 Mwene… anisogolrelrege mukondoni eto awanege na amwidanihu: Agali malambo a mundulri awana vamalroni va aIzarayeli ali Mulugu (1 Samuweli 7:10-12), fwanyeya ira aliwa kohomukonda Mulugu wenno aakumihile Ijipitu eto aakamihedile atamangiha atu kakala ilambo ya Kana. (Detoronomiyo 1:30, 20:4; Jozuwe 23:3,5, 24:8,11-12) 21Samuweli agavwile jatene jawongile atu, ohodowa muwandelamo Yehova. 22Evale Yehova ohomuwakula, liye ira: <<Usakanye nnga mwemo munafunela atu. Waavahe mwene.>> Noira enne, Samuweli ohavepa alombwana atenene a Ana Izarayeli ira: <<Jatene ejo jihimala vweya. Nyo mubabihe welela mmavande mwinyu.>>
Currently Selected:
1 Samuweli 8: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
