1 Samuweli 7
7
1Evale alombwana a Kiriyati-Jeyarimi kagavwile mazu anne, kohovenya, aliwa dowa tukulawo Kaxa ile, dowana waniwa ilambo ya Kiriyati-Jeyarimi, aliwa hiya vande va mulombwana Abinadabe, wenno vande vaye vali vankumani eni. Nomala eto komuhambiha mwanaye Eliyazari ira aing'anelege Kaxa ya Yopangana ya Yehova ile.
Samuweli ohoroma atonga aIzarayeli
2Kaxa ya Yopangana ya Yehova ile yagafiyile sidadi ya Kiriyati-Jeyarimi wewule, aIzarayeli atene kohoroma nvepa Yehova ira aakamihedege mukondoni mwewa, aavunelege mmandani mwa amwidani ewa. Kagamanle yaka 20 kanvepaga Yehova,#7:2 Kagamanle yaka 20: Mazwala kinawonga ira Kaxa ya Yopangana ya Yehova yamanle yaka 20 bahi yagali sidadi ya Kiriyati-Jeyarimi. So anawonga ira kuma tempu yazile Kaxa ya Yopangana ya Yehova sidadi ya Kiriyati-Jeyarimi ante tempu Samuweli awongile liye na aIzarayeli, vamanle yaka 20. Tchoira kuma tempu yazile kaxele Kiriyati-Jeyarimi ante tempu mwene Davi adowenle liye kaxele vande va Abinadabe, vohovira wandamelana yaka 70. Muselu wa Davi adowelaga kaxele, adowagana Jeruzalemu unafwanyeya 2 Samuweli 6:1-15. 3Samuweli ohowonga na aIzarayeli atene, liye ira: <<Akala munafuna muwelele kala na Yehova na mmirimani mwenyu mwatene, mwaatatile amilugu enyu atene na josema ja amilugu a Axitaroti jejo jinatamaleletcha nyo, mudowe wa Yehova mmohive eto mmuharegeve liyene bahi.#7:3 mwaatatile amilugu enyu atene… mudowe wa Yehova mmohive: Fwanyeya ira aIzarayeli kohomala yaka 20 kanvepaga Mulugu eto Mulugu karumenle yovepiwa mwasiwa kohakana amilugu amohiwa kaaroromela atu. Ira Mulugu avwe jolobela ja mutu, voroma mutu unoroma lrapa jotega jaye eto unoatatila amilugu amohiwa anna liye. Mwairana eno, liye unouvunelani mmandani mwa aFilistewu.>> 4Evale Ana Izarayeli kohatatila amilugu ewa aBaali na aAxitaroti, aliwa roma muhara Yehova bahi.
5Evale Samuweli ohawandela eraga: <<Hiyo aIzarayeli atene nidowe nagumaneni ilambo ya Mizipa ira didowe daulobeleleni wa Yehova.>> 6Noira eno, siku niwa nagafiyile, atenene kohogumanelaga ilambo ya Mizipa, aliwa runga mahindje roma akutulela vati vamentoni va Yehova.#7:6 aliwa runga mahindje roma akutulela vati vamentoni va Yehova: Yeniyo yohokana yatapulela atu. Hiyo eto kanivwile yotapulela iwa. Muwari mohoiziwa ibaribari zela kutulela mahindje vati, afwase aIzarayeli kalobela ira: <<Nyo Yehova mwahanikoye, hiyo kaninna makalelo. Nnagomela dimela nnga mahindjala kanyowelaga vati.>> So iiziwile hiyo tchoira aliwa kohoirana muwari motwaruwa. Siku nenne kohovireliwaga eno kajejuwarigi,#7:6 kajejuwarigi: Navwa ira aIzarayeli kohojejuwari siku nompumbula, ku wonga aliwa tchadjile yengo siku neno. So aliwa kerave lobela bahi. eto kowongaga keraga: <<Hiyo nihimutegela Yehova.>> Tempu yenne kagali Mizipa wewule Samuweli paromile liye asogolrelra Ana Izarayeli atene.
7Mwa tempu yenne aFilistewu kagavwile ira Ana Izarayeli anafwanyeya Mizipa, aliwa na amwene ewa kohovenyaga ira kadowe kawane na aIzarayeli. Evale Ana Izarayeli kagavwile ira aFilistewu anaza, kohokagana ova ulukulu. 8Evale Ana Izarayeli kohowonga na Samuweli keraga: <<Mukaleleve nilobelela wa Yehova Mulugu wehu, munvepege ira liye anivunele mmandani mwa aFilistewu.>> 9Noira eno, Samuweli ohotukula mwana nibila ning'onong'ono nowamwa, liye pa, mala tumeya natene nenne, sakanya mukuto wa Yehova. Liye nvepa Yehova ira aakamihede aIzarayeli. Evale Yehova ohorumela yovepa ya Samuweli.
10Fwanyeya ira tempu yenne mulombwana Samuweli avelelaga mukuto otumeya ule, ahanamaleve, tchi tempu yafiyaga aFilistewu ira karome wana na aIzarayeli. Mbwenye kahanaromeve wana, Yehova ohorumihaga ndari dilukulu, arendjetchaga aFilistewu eto ohosakanya ira aliwa kakale zagi zagi. Evale aliwa kohoroma tawa vamentoni va Ana Izarayeli. 11AFilistewu ale katawaga, akuda Izarayeli kohokumaga Mizipa ule, aliwa roma ahara, kaatamangihaga, aliwa roma apaga na ndila fiyeda Bete-Kari. 12Mwa enne mulombwana Samuweli ohotukulaga nibwe, liye dowa imetcha vari va Mizipa na Semi, liye kwi: <<Ante va mbwenye Yehova uhunikamiheda.>> Mwa enne, ohovaha nibwe nne nzina na Ebenezeri [ku wonga Nibwe Nonikamiheda].#7:12 Ebenezeri [ku wonga Nibwe Nonikamiheda].: Kalaga nnga mazu a Ana anafwanyeya 1 Samuweli 2:2. Ana ohowonga ira: kaniliwo nibwe nimohi niwa nnabarela nolingana na nyo Mulugu wehu. Ku wonga Samuweli amuonne Mulugu nnga nibwe noabarela aIzarayeli ira kahagondjihiwe na aFilistewu. 13Mwa enne aFilistewu kohogondjihiwa eto tchawelenle volowa ilambo ya aIzarayeli ira kaawake jengo jiwa. Tchoira Yehova ohela ndanda ira aFilistewu kahawande kana kopolo yaka datene datonga Samuweli. 14Sidadi datene dedo datukunle aFilistewu, romana Ekoromi ante Gate, kohomala aweliheda annya aIzarayeli. Mwa enne aIzarayeli kohowelihediwa vilambo diwa datene. Vamohive vevo eto, aAmore kohowandana na aIzarayeli.#7:14 aAmore kohowandana na aIzarayeli: Ira kawandane, afwase aAmore kohowanda iziwa ira: <<Malambwala aIzarayeli anokala pama. Hiyo nira nidowe naamexeri ira nikale howana na aliwa, afwase nnagomela gondjihiwa nnga vere aFilistewu.>>
15Samuweli alive namasogolrelra wa aIzarayeli kalawo waye watene. 16Yaka datene liye odowetcha Beteli, amala liye dowa Jiligali, amala liye dowa Mizipa, atongaga milandu dedo dafwanyeyana aIzarayeli.#7:16 atongaga milandu dedo dafwanyeyana aIzarayeli: Ku wonga Samuweli ohawandela aIzarayeli jafuna Mulugu muwari mwa milandu danna atu. Ku wonga atu kafwanyeyana milandu dorutcha tongiwa, awanda gwada ali Samuweli muwari moawandela atu makalelo Mulugu afuna liye. 17Amala tonga milandu dile, owelela waniwa sidadi ya Rama eto wewule oasogolrelra aIzarayeli. Eto Samuweli ohomangawo ibuwa ya Yehova ilambo ya Rama ule.
Currently Selected:
1 Samuweli 7: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
