1 Samuweli 4
4
AFilistewu kohotukula Kaxa ya Yopangana ya Nabwiya
1Mwa malambo anne aIzarayeli kohovenyaga ira kadowe kawane na aFilistewu. AIzarayeli misasa diwa kohomangaga Ebenezeri, aFilistewu misasa dewa aliwa manga Afeki. 2Mwa enne kohoromaga wana. Kawanaga, aFilistewu ale kohagondjihaga aIzarayeli, aIzarayeli aliwa roma porotchiwa na makalelo ohokala a masika fiyeda aliwa kwa alombwana okwakwana 4.000. 3Mwa enne anyakondo a aIzarayeli kagawelenle vamisasani viwa, andimuwa a aIzarayeli kagavwile jaireyile, kohowongaga, aliwa ira: <<Kodi mwasiwa gwa nni Yehova anihiya peno ira nigondjihiwe na aFilistewu?>> Mwa enne kohelavo zelru keraga: <<Naarumeni atu kadowe ilambo ya Silo, katukule Kaxa ya Yopangana ya Yehova ira nizena wewuno, ize ikale vari vehu eto inivunele mmandani mwa amwidanihu.>> 4Mwa enne koharumaga atu Silo ira kadowele Kaxa ya Yopangana ya Yehova wa Makuru Matene, wenno unakala vari va akerubi ambinli.#4:4 wenno unakala vari va akerubi ambinli: Agali Mulugu unafwanyeya mwatene mwene, Mulugu oharuma aIzarayeli ira kamange nyumba yenno inaitaniwa Musasa wa Yehova ira liye akale emule. Nimburo Mulugu akala liye naitaniwa Nimburo Notchenetchetcha. Mulugu oharuma aIzarayeli ira kasakanye kaxa yenno yaitaniwa Kaxa ya Yopangana ya Yehova ira kahele muwari mwa Nimburo Notchenetchetcha nne. Eto Mulugu oharuma aIzarayeli ira kaasakanye angelro ambinli anno anaitaniwa akerubi ira kakale vazulu va tampa ya Kaxa ile. (Ezodu 25:18-20) Kagamanle sakanya jatene ejile, Mulugu ohokana makalelo aoneya liye nnga moneya muwari mwa akerubi ambinli ale. Nona Kaxa ya Yopangana ya Yehova yaitaniwa mpando wa Umwene wa Mulugu. Ora yenno, mulombwana Hofini na mbalaye Fineyasi anno kali ana Eli kohokalavo kavelelaga kaxele kadowagana wafwanyeya aIzarayeli. 5Evale alombwanale kagatukunle Kaxa ya Yopangana ya Yehova ile kazagana, aIzarayeli vaonne atu Kaxa ile izaga, kohokuwaga moteyela na makalelo ohokala a masika fiyeda teya tekenyeya. 6Evale aFilistewu ale kagavwile kuwa wa aIzarayeli, kohowonga keraga: <<Kuwa undimuwa unavweya misasani wa aEberewu unatapulela nni?>> Mwa enne kagaiziwile ira aIzarayeli kakuwela na mwasa oira Kaxa ya Yehova yohoza, 7kohoromaga ova kawongaga keraga: <<Nihikwa hiyo! Alombwana, akala gu mulugu mmohi uzile wa aIzarayeli ule, hiyo nihimala gondjihiwa. Tchoira kajinababihe ireya jokala ha jeji. 8Nihikwa hiyo! Nnga unafuna nivunela wa amilugu andimuwa anno bani? Tchoira amilugu anno banne kaapile aIjipitu na jionihedo jabure johiyana hiyana muisalesaleni!>> 9Eto kohoromaga limbihana keraga: <<Alombwana a aFilistewu, inafwanela nikale atu olimba murima, niwaneni nnga alombwana tawiha ira anoza kanigondjihe, kanitukule ira nidowe nakale azari a aEberewu nnga jaairilena hiyo, naatukula, kakala azari ehu wanle! Nona inafwanela nikale alombwana, niwane mwa kopolo!>> 10Kagairile enne, aFilistewu kohovenyaga, aliwa dowa roma wana kondo akoka na aIzarayeli. Mwa enne tempu yawana atu, aFilistewu ale kohofiyeda mwezo oagondjiha aIzarayeli. Evale kada mutu otawelaga vande vaye eto kohopiwaga anyakondo a aIzarayeli ohokala a masika okwakwana 30.000 owenda na mendo. 11Noira enne, aFilistewu ale kohotukulaga Kaxa ya Mulugu ile, aliwa dowagana jiwa. Eto ana Eli ambinlene Hofini vamohi na Fineyasi kohokwaga siku nimohive nenne.
Kwa wa Namakuta Eli
12Mwa enne ohokalawo mulombwana mmohi wa nlogo na Benjami avuluwilege kondoni ule. Siku nimohive nenne, liye ohotamanga ante dowa fiya ilambo ya Silo. Afiyaga, afiyile agamanle kawula jowara jaye eto aganna teya mmuruni mwaye muwari motonyiheda kumbanya waye. 13Mwa enne tempu yafiyaga liye musidadi mule, mulombwana Eli agaratilege vakaderani vaye wandamelana mundila, aing'anaga ndila. Tchoira liye ohokana kumbanya ulukulu zela Kaxa ya Mulugu yatukunle atu ile. Mwa enne mulombwanole agafiyile, ababihilege volowa musidadi mule, liye roma awandelamo atu atene zela jejo jaireyile. Atwale kagavwile mazu anne, kohoromaga nla dugu dugu dugu. 14Mwa enne namakuta Eli agavwile kuwa zela nla wanlaga atu ule, ohotikinaga eraga: <<Kodi kuwa uwa wo kwa nni?>> Mohodibeliwa pazaga eto mulombwanole ira amuwandelemo Eli jatene jaireyile. 15Mwa tempu yenne mulombwana Eli anna yaka 98 eto meso aye kohogoma fiyeda liye haonaga. 16Mwa enne mulombwanole ohofiyaga valigi namakuta Eli, liye roma muwandelamo eraga: <<Miyo eni ditawile kondoni eto peno eva miyo tamangaga ante za fiya uno eni.>> Eli ohonfuka, liye ira: <<Kodi iireyile nni mwanaga?>> 17Evale liye ohomuwandelagamo eraga: <<Mulogo wa aIzarayeli kohatawa aFilistewu. AIzarayeli kohomala gondjihiwa na makalelo ohokala a masika. Eto hiya ejove bahi, ahiminyu ambinlene Hofini na Fineyasi kohopiwa eto aFilistewu kohotukula Kaxa ya Mulugu, kohodowana.>> 18Mwa enne mulombwana Eli agavwile ira: <<Kaxa ya Mulugu ihitukuliwa!>>, liye ohovivoka vakaderani vagaratilege liye vale wandamelana va mulango vale, liye gwela unduli waye na igogori. Muwari moira liye ali mulombwana oruva eto ohomala ulula, gwa wagwile liye, nikohi naye nohokotowaga ante liye fiyeda kwa ora imohive yenne. Eli aasogolrenlre aIzarayeli yaka 40.#4:18 Eli aasogolrenlre aIzarayeli yaka 40: Fwanyeya ira mulombwana Eli ohokana mabasa a unamakuta eto mutu mmohive ali mundimuwa oasogolrelra aIzarayeli.
Kwa wa mwadi marafula Fineyasi
19-20Eli ohomukana nijaliye wenno ali Fineyasi muhiyanaye. Tempu yenno nijaliye ule afwanyeya aganna vambani eto tempu yaye yobala yagamukwivenle. Mwa enne liye agavwile ira: <<Kaxa ya Mulugu ihitukuliwa eto nijalawo vamohi na mamunawo kohokwa!>>, mbani mwaye mohotatamuwaga, liye roma ona upa. Muwari mwa upa waonaga liye, ohofwanyeyagana bulela wohokala wa masika, halaga vang'onove ira akwe. Mbwenye ahanakwe, agahanle vang'ono, ohombalaga mwana wa mwanapongwe. Evale ahiyana afwaye kambalihaga kohomuwandelaga, aliwa ira: <<Kukatamiheye tchoira weyo eni uhumbala mwanapongwe!>> Mbwenye liye mwa jatene jawongaga atu jile kabalraga nne kawakunlegeve yengo. 21So wonga uwa, liye anvahile mwanole nzina na Ikabu [ku wonga kavali undimuwa], liye ira: <<Undimuwa wawenda na hiyo aIzarayeli peno uhunitawa.>> Liye awongele eno na mwasa oira Kaxa ya Mulugu yawendetchana atu yohotukuliwa na aFilistewu eto na mwasa oira mamunaye vamohi na nijaliye kohokwa. 22Amariheyaga, ohowonga akoka, liye ira: <<Voira Kaxa ya Mulugu ihitukuliwa na amwidanihu, undimuwa wawenda na hiyo aIzarayeli uhumala nitawa.>>
Currently Selected:
1 Samuweli 4: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
