1 Samuweli 31
31
Kwa wa Sawuli na ahimaye kondoni
1Fwanyeya ira tempu yawana mulombwana Davi na aAmaleki, aFilistewu na aliwene kafwanyeya kawanaga na aIzarayeli. Muwari mowana mule, aIzarayeli kohoroma tawa, aliwa piwaga na makalelo ohokala a masika mwango wa Jilibowa. 2Mwa enne aFilistewu kohomutamangihaga mwene Sawuli na ahimayene, aliwa fiyeda mwezo oapa ahima araru a Sawuli romela Jonata, Abinadabe na Malekisuwa.
3Kondo ile yagalive vari, Sawuli ohofiyedaga sanyeya mwasiwa aliba maurwa a aFilistewu, kohomuonaga, aliwa mala mulata, liye poreya na makalelo abure. 4Evale mwene Sawuli ohomuwongana nkamihedi waye wenno atukuletcha fwaramento daye dowanana, liye ira: <<Kapulula supada nawo, udimarihena tawiha ira atu ohoineliwa ala anaze kadizuzumihe!>> Evale nkamihedi ule ohoovaga. Na mwasa wenno kaampilege. Sawuli agaonne ira: <<Nkamihedi wagola kanafuna dipa!>>, ohotukulaga supada naye, liye imetcha vati, viwambana mwinnya.#31:4 ohotukulaga supada naye… viwambana mwinnya: Masupada kawanana atu wanle kohiyana na masupada a tempu ili hiyo ila. Tchoira masupada a wanle, magomelo uwa wakala woxongowa wene hiyaniha na masupada a tchineneva. 5Eto nkamihedi ule agaonne ira Sawuli uhukwa, na liyene ohopululaga supada naye, liye imetcha vati, viwambana mwinnya. Evale ambinlene kohokwaga vamohi. 6Mwa enne Sawuli vamohi na ahimaye araru ale na nkamihedi waye vamohi na alombwanaye atene, kohokwaga siku nimohive nenne.
7Noira eno, aIzarayeli kafwanyeya pandi imohiwa ya ndabo vamohi na ale kafwanyeya kombela ya Jordawu, kagavwile ira: <<Afwihu kohotawa eto Sawuli vamohi na ahimayene araru kohokwa!>>, kohiyaga sidadi dewa dakala atu, aliwa tawa dowaga umohi uwa wene. Eto sidadi dahiyilege atu dile, aFilistewu kohodowa, aliwa kalaga mwemule.
8Noira eno, mmetcheloni muwa, aFilistewu ale kagadowile ira kaawungule fwaramento atu atene kakwile ale, kohonfwanya mwene Sawuli vamohi na ahimaye araru kagakwile mwango wa Jilibowa. 9Evale kohogwadaga muru wa mwene Sawuli eto kohotukulaga jowanana jaye. Nomala enne, koharumaga atu ira: <<Mudowe mwilamboni mwatene mwa aFilistewu, mwavirege munyumbani mwemo munafwanyeya vikwamutu josema vamohi na mutatamoni, mwavweyihege muselu wapama oira mwene Sawuli uhumala piwa!>> 10Nomala eno, kohotukulaga jowanana ja Sawuli, aliwa dowa volotchiha munyumbani mwemo mwafwanyeya mulugu wewa wa muhiyana wenno aitaniwa Axitaroti. Noira eno, kohotukulaga maningo a mwene Sawuli na ahimayene, aliwa dowa komela vamuruni wenno awerewerile sidadi yatene ya Bete-Seya.
11Noira enne, atu a sidadi ya Jabeji-Jileyadi,#31:11 atu a sidadi ya Jabeji-Jileyadi: Atwala ba aIzarayeli anno Sawuli aavulumutchile liye aromaga wene atonga aIzarayeli. (1 Samuweli 11:1-11) kagavwile ukwa wa mwene Sawuli, ira: <<Eni mwene Sawuli agakwile, aFilistewu kohomukomela vamuruni uwerewerile sidadi yatene ya Bete-Seya!>>, 12alombwana atene olimba murima kohovenyaga na mahiyu, aliwa roma wenda mahiyu matene anne, aliwa fiya ilambo ya Bete-Seya. Kagafiyile wewule kohokumihagavo maningo a Sawuli, vamohi na ahimaye anne vamuruni va Bete-Seya vale, aliwa adowana waniwa ilambo ya Jabeji. Kagaafiyilena wewule kohatumeyaga. 13Noira enne, kohotukulaga makuviwa, aliwa dowa timbela vati va mutengo mmohi eni uneriwa tamarga mwilamboni mwa Jabeji. Kagamanle irana enne kohojejuwari malambo matanu na menli.
Kukala mazu a livuru na 1 Samuweli.
Currently Selected:
1 Samuweli 31: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
