1 Samuweli 30
30
Akuda Amaleki kohotumeya sidadi ya Zikalagi
1-2Mwa enne kohomalaga malambo menli mundila kawendagave. Siku naneraru niwa pafiyaga mulombwana Davi na atwaye ale sidadi ya Zikalagi yakaletcha atu. Fwanyeya ira mulombwana Davi na atwaye ale tempu yavenyilevo atu, aAmaleki kohodowaga laba ja umadjuba ilambo youmma na Zikalagi sidadi yakala Davi ile, aliwa mala itumeya sidadile. Kagaitumeyile, kohatukulaga ahiyana atene na ahimiwene na azombwe atene vamohi na andimuwa andimuwa kafwanyeya mwemule. Aliwa tchaampilege mutu nne mmohi. So mbwenye kerege atukula atene, aliwa adowagana. Eto nne mutu mmohi tchamuhiyilemo musidadi mule.
3Evale siku naneraru nne, Davi na alombwanaye ale kagafiyile, kafwanyilege sidadile ihanle vadebe ve bahi, ihimala tumeyiwa eto ahiyaniwa na ahimiwa atene kohomala tukuliwa ira kakale azari. 4Evale Davi na atwaye kohonlaga mokuwa, fiyeda atenene aliwa hakana kopolo. 5Eto Davi ahiyanaye ambinlene, Ainowa wa Jezereli, na Abigayeli wenno ali mwadi Nabali wa Karimele, kohotukuliwa. 6Evale alombwana a Davi ale muwari mojamo zela ahimiwa na ahiyana anno katukuliwe, kohowongaga ira: <<Ndoweni nimpeni Davi na mabwe.>> Evale Davi agaonne enne, ohokukumuwaga valukulu. Mbwenye ohovilimbihedaga kopolo daye muwari mwa Yehova Mulugu waye. 7Evale Davi ohomuwongana namakuta Abiyatare mwana Aimeleki, liye ira: <<Kazana uno kuleti ya unamakuta ira niwande nfuka Mulugu.>> Evale Abiyatare ohozagana. 8Noira enne Davi ohonfuka Yehova, liye ira: <<Yehova, kodi daahare akuda Amaleki? Kodi daahara, nnoawanda?>> Yehova ohowakula, liye ira: <<Kaaharege. Unoafwanya eto unoawaka atwinyu atene kaatukunle atu.>>
Davi ohagondjiha akuda Amaleki, liye avunela atwaye
9-10Noira eno, mulombwana Davi ohomaruwaga na alombwana 600 anno kawendetcha na liye, aliwa roma atamangela aAmaleki. Kagafiyile mwana muhindje wa Besori, alombwana 200 kohofiyedaga waheya, aliwa hala evale. Mbwenye Davi na alombwana amohiwa 400 kohodowagave musogolro.
11Evale alombwana a Davi kawendagave kohonfwanyaga muzombwe mmohi muIjipitu agali mukokolani mwene, aliwa mutukula, mudowana wa mulombwana Davi. Kohonvahaga pawu, liye dja, aliwa nvaha mahindje ira ang'we. 12Kohonvahaga eto pandi imohi ya nibolu nosakanyiwa na jovaha ja mufigera na vitazi mbinli da uva oumma mwasiwa liye ohomalaga malambo mararu ntana na mahiyu ahadjile nne ahang'wile. Mwa enne agadjile, kopolo daye dohowelelamo.
13Evale Davi ohonfukaga, liye ira: <<Kodi weyo uli nkuda ani? Nnga unakumela waani?>> Liye ohowakulaga, liye ira: <<Miyo dili muIjipitu eto dili muzari wa nkuda Amaleki. Mbwiyaga nnamulaba miyo gwadihiyile, liye dowaga, mwasiwa dali murenda. Eni dihimala malambo mararu dibulelaga. 14Hiyo nihilaba ja umadjuba pandi ya ilambo youmma ya akuda Kereti, dowaga ante muwari mwa ilambo ya Juda, dowaga ante ilambo youmma ya akuda Kalebi eto nihitumeya sidadi ya Zikalagi.>>
15Davi ohonfukagave, liye ira: <<Weyo podi ditukula, didowana wewo unafwanyeya amadjuba afwawo?>> Liye ohowakula, liye ira: <<Miyo nnouvelelani. So murome lumbela na nzina na Mulugu ira daufiyihaniwo, nyo kamunadipa eto nne kamunadivelela mmandani mwa mbwiyaga akoka!>> Mwa enne Davi ohorumela.
16Evale muzombole ohomutukulaga Davi, liye mudowagana. Mwa tempu yenne aAmaleki ale kohomala mwadeya mwilamboni na mwasa wa pwando ilukulu yanna atu vakapamentoni viwa kadjaga, kang'waga eto kainaga. Kasakanyelege pwando na mwasa wa jengo jidjindji jejo jatukunle atu mwilamboni mwa aFilistewu na ilambo ya Juda. 17Evale mulombwana Davi na alombwanaye ale kohowanaga na aAmaleki ale roma ora ya tchiguwo yaafwannyege atu, ante nzuwa aliwa vira.#30:17 ante nzuwa aliwa vira: Tempu yaromile atu wana kinaiziweya pama. Ali siku nenne na mabebehi owu hehi, ali munziloni muwa itchiguwo tchiguwo. Evale kohapa atu adjindji. So mbwenye azombwe 400 bahakwilege. Para aliwa hakwa, kagwenlege vaakameloni, aliwa tawa.
18Mwa enne Davi ohawakaga aAmaleki ale jatene jatukunle atu eto ohavunelaga ahiyanaye ambinlene. 19Mwa jengo jatene jatukunle atu, kilivo yengo yadimenle. Nne ing'ining'ini, nne ilukulu, nne mwana wa muhiyana nne mwana wa mulombwana, nari yengo ili yatene yatukuliwe, Davi ohawaka jatene. 20Eto Davi ohawakaga jifuwo jatene romela mabila matene na ng'ombe datene. Eto alombwana a Davi ale kohogumanihaga mabila matene na ng'ombe datene daawakile atu aAmaleki, aliwa kumbuzaga vasogolro va Davi, Davi aharaga mundulri muwa. Aliwa kadowagana jatene ejile, kowongaga keraga: <<Eji ti jengo jipile Davi kondoni!>>
21Nomala enne, kohodowaga sogolro, aliwa dowa mwana muhindje wa Besori nimburo naahiyile atu alombwana amohiwa 200 kawaheyile ale. Evale aliwa kagamuonne Davi na alombwana aadowilegena liye kondoni ale kazaga, kohovenya, aliwa dowa ira kagumane na Davi vamohi na atwaye. Kagagumanne, Davi ohozaga valigi atu vale, liye alondjela. 22Mbwenye alombwana amohiwa otakala mirima, abure anno kadowilege na Davi kondoni, kohowongaga aliwa ira: <<Voira afwihu ala tchadowile vamohi na hiyo kondoni, hiyo kannaavahamo jengo jaawakile hiyo aAmaleki ale! So mbwenye aliwa anaatukula ahiyaniwa na ahimiwa bahi, kadowege.>>
23Mbwenye Davi ohawandelaga eraga: <<Abalaga, nyo kamuirena eno jejo Yehova jinivahile liye! Liye uhunikoya eto uhunivaheda amwidani ehu mmandani mwihu. 24Kalivo unafuna vwelela jejo jinawonga nyo! Jatene niganeni mokwakwanela. Ale kahanlena mitolro vamohi na ale kadowile kondoni, gana uwa inafwanela ira ukale sawasawa.>> 25Eto kuma evale Davi ohokumiha nlamulo muwari mwa aIzarayeli atene ira jinawakiwa kondoni jigawiwege mokwakwanela muwari mwa aliba wana na aliba koya mitolro. Fiyeda siku na peno nlamulo neno nnolabave.
26Davi agawelenle Zikalagi, ohotukulaga pandi imohi ya jorayela jaawakile atu amwidaniwa kondoni, roma arumihedaga andimuwa a Juda, anno kafwanyeya kagali afwaye eraga: <<Miyo nnourumihedani nyo japama ji, jejo jaawakile hiyo amwidani a Yehova.>> 27Liye ohorumiha japama jile wa andimuwa a Beteli, ilambo youmma ya akuda Ramote, andimuwa a Jatiri, 28andimuwa a Aroweri, a Sifimote, a Estemowa, 29a Rakali, na andimuwa a sidadi da akuda Jerameli na sidadi da aKeni, 30sidadi ya Horima, sidadi ya Borasa, sidadi ya Atase, 31sidadi ya Eboroni, na pandi datene mwemo mulombwana Davi vamohi na alombwanaye ale mwavirile atu malambo a mundulri.
Currently Selected:
1 Samuweli 30: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
