1 Samuweli 28

1Mwa malambo anne, aFilistewu kohagumaniha anyakondo ewa ira kadowe kawane na aIzarayeli. Mwa enne Akiji ohomuwandela Davi, liye ira: <<Inafwanela uiziwe ira weyo vamohi na atu atene anafwanyeya na weyo munerege dowa kondoni vamohi na miyo ira mudikamihedege.>> 2Evale Davi ohowakulaga, liye ira: <<Tabo, kavali makani. Eto nyo munafuna muone makalelo anafuna miyo irana dagali namalaba wenyu!>> Eto Akiji ohowongaga, liye ira: <<Miyo nnafuna weyo ukale gwarda odiing'anela miyo kalawo waga watene!>>

Sawuli ohonfuka ng'anga okwima ira amuwandele yenno yafuna liye ira

3Tempu yenne yali tempu Samuweli agakwile. Eto vakwile liye aIzarayeli kohomunlelaga, nomala aliwa dowa mukoya waniwa sidadi ya Rama. Eto tempu yenno yali Sawuli agamanle atamangihamo mwilamboni mwa Izarayeli mule aliba kuta mukuto wa azimu na aliba tapanya na azimu.

4AFilistewu kohogumanelaga, aliwa dowa kunga misasa diwa wandamelana tatamo ya Sunemi. Eto Sawuli ohagumanihaga aIzarayeli atene, aliwa dowa kunga misasa diwa mwango wa Jilibowa. 5Mwa enne Sawuli agaonne nikuru na anyakondo a aFilistewu, liye ohoroma ova eto murimaye ohonyungulruwa. 6Evale Sawuli ohodowaga nfuka Yehova yafuna liye ira. Mbwenye Yehova kaamuwakunlege, nne muwari moroha, nne muwari mwa Urimi,#28:6 Urimi ali yengo Mulugu aavahile liye aIzarayeli ira kawande wombezana yofuna yaye. Nione 1 Samuweli 14:41. nne muwari mwa anamafiyiheda. 7Evale Sawuli ohawandelaga anamalabaye, liye ira: <<Mudowe mwanvende muhiyana mmohi owanda wonga na azimu ira miyo didowe danfuke inafuna hiyo ira!>> Anamalabaye ale kohomuwakulaga, aliwa ira: <<Ilambo ya Eni-Dori, uhukalawo maliba wanda wonga na azimu.>>

8Evale mwene Sawuli ohowungula jowara jaye ja umwene, liye wara jowara jimohi jawara atu ira ahaiziweye.#28:8 jowara jaye ja umwene: Jowara ja umwene johiyana na jowara ja atu a vaheno vene. Fwanyeya ira mwene Sawuli nnga liye ali mwene, afunaga dowa wonga na ng'angole, ohowungulaga jaye ja umwene, liye wara ja vaheno vene ira ng'angole ahamuone ira wenna gu mwene Sawuli. Unde wagadibile, ohovenyihanaga vamohi na alombwanaye ambinli ira kadowe kanfwanye muhiyanole. Agafiyile wa muhiyanole, ohowongaga, liye ira: <<Miyo nnafuna mmugwelihe muzimu wa mutu wenno nnafuna miyo muromola ira diwande tapanya na liye!>>#28:8 mmugwelihe muzimu wa mutu wenno nnafuna miyo muromola: Malambo a mundulrimu muwari mwa ang'anga okwima, kohokalawo atu kalaba ira mutu awande tapanya na mutu ukwile wanle. Ku wonga mutu adowa wa ng'anga, ng'anga ule osakanya ira ikale nnga munemba wa mutu ukwile wanle uhuza ira atapanye na mutule hiya mutule tapanya na ng'angiwa. Atu kabalra ira: <<Ng'angole unowanda mugweliha mutu okumela mokwani mwali liye.>> Jatene ejo jali malrango a Satana. 9Muhiyanole ohowakula eraga: <<Na ibaribari weyo uhuiziwa yenno iirile mwene Sawuli. Liye uhatamangihamo mwilamboni mwa Izarayeli aliba kuta mukuto wa azimu na aliba tapanya na azimu atene. Nnga mwasiwa gwa nni weyo funaga dihela mmungohini ira miyo dikwe?>> 10Evale mwene Sawuli oholumbelaga na nzina na Yehova eraga: <<Miyo nnawonga vamentoni va Yehova okalawo ira weyo kunakwa na mwasa oirana yenno.>> 11Evale muhiyanole ohonfukaga, liye ira: <<Nnga weyo unafuna ira miyo dimugwelihe muzimu waani?>> Liye ohowakulaga, liye ira: <<Nnafuna umugwelihe muzimu wa Samuweli!>>

12Evale muhiyanole agamuonne Samuweli, ohoroma kuwa morendjeya. Agakuwile, ohowonga ira: <<Kodi mudinyengele nni? Nyo muli mwene Sawuli!>> 13Mwene Sawuli ohowakulaga, liye ira: <<Kuove! Kodi unaona nni?>> Liye ohowakulaga ira: <<Nnamuona muzimu mmohi akumaga vati, agwelaga.>>

14Nomala enne, Sawuli ohonfuka muhiyanole, liye ira: <<Muzimu unamuona we uyo, unna makalelo bavi?>> Liye ohowakula ira: <<Liye gu mundimuwa uwarile kapa eto unagwela!>> Mwa enne Sawuli ohovayelaga iziwa ira: <<Podi pii, wenno gu Samuweli!>> Mwa enne ohokokorelaga kove yaye vati, momuriheda.

15Evale Samuweli ohonfukaga Sawuli, liye ira: <<Katchiye, kodi weyo unadikukumulela nni udigwelihaga?>> Sawuli ohowakulaga, liye ira: <<Miyo dugweliheleni mwasiwa dire kala mmakatamihoni! AFilistewu anafuna jowana na miyo eto Mulugu uhudihiya. Danfuka, kanadiwakula, nne muwari mwa namafiyiheda nne muwari moroha. Nona duitanagani nyo ira mudiwandele inafuna miyo ira!>> 16Samuweli ohowakulaga, liye kwi: <<Kodi mwasiwa gwa nni uza udifukaga miyo, agali Yehova umala uhiya, gu mwidanawo? 17Yehova umala uirela yenno yawongile liye muwari mwa miyo. Tchoira liye uhuuwaka umwene wawo ira anvahe mutu mmohiwa, wenno unafwanyeya agali Davi. 18Tchoira weyo kufunile nvwelela Yehova, kufunile abwanyula aAmaleki atene vamohi na jatene janna atu molingana na uwali wohokala wa masika wanna Yehova. Nona Yehova asakanya jejo na weyo peno va. 19Vamohive vevo liye unouvaheda weyo vamohi na mulogo watene wa aIzarayeli mmandani mwa aFilistewu. Metchelo weyo vamohi na ahimawo munomala piwa, muze mukale vamohi na miyo wewuno. Eto Yehova unoavaheda nikuru na anyakondo a aIzarayeli mmandani mwa aFilistewu.>>

20Evale Sawuli agavwile jatene jawongilege Samuweli jile, ohogwelaga vati ozongowene na mwasa oova jatene ejile. Eto ohowaheyaga na mwasa oira ohomalaga siku nompumbula ntana watene na mahiyu atene ahadjileve yengo. 21Muhiyanole ohozaga valigi Sawuli vale, agamuonne ira ohokukumuwaga, ohomuwandelaga, liye ira: <<Miyo namalaba wenyu duhuvwelelani. Dohovilevela ingumi yaga, miyo irana yovepa yenyu. 22Miyo nnouvepani ira muirena yenno inafuna miyo vepa. Nnouvepani ira mudihiye didowele yodja ing'onong'onove, mudje mulimbe kopolo ira muwandege wenda ulrendo wenyu pama.>> 23Muhiyanole agawongile mazu anne, Sawuli ohorunihaga eraga: <<Miyo kannafuna dja yengo ili yatene!>> Mbwenye anamalabaye aazilegena liye vamohi na muhiyanole kohomukanyihedagave ira adje. Mwa enne ohorumelaga. Liye venya valigi liye vale, liye dowa garati vakamani. 24Fwanyeya ira muhiyanole vande vaye ohokana mwana ng'ombe yoruva. Ohodowaga pa mwana ng'ombe ile mobaranya. Liye tukula utu wa vang'onove, sakanyana pawu dohosakanyiwana leverina. 25Evale ohozagana jodja jile valigi Sawuli vamohi na anamalabaye ambinli annaga liye ale, aliwa dja. Kagamanle dja enne, mahiyu mamohive anne kohovenyihana, aliwa tukula ndiliwa dowaga.

Currently Selected:

1 Samuweli 28: iLolo

Highlight

Copy

Compare