1 Samuweli 14
14
Jonata na nfwaye kohowana na aFilistewu
1Siku nimohi Jonata mwana Sawuli, ohowongaga na muzombwe wenno atukuletcha fwaramento daye dowanana kondo, liye ira: <<Ndowemo kombela ya ule, vakapamento va anyakondo a aFilistewu, anno anafwanyeya pandi ya ule.>> Mbwenye Jonata awongaga enne, babaye kamuwandenle zela jejo jafuna liye ira.
2Sawuli tempu yenne afwanyeya Migoromi, wandamelana Jibeya, agagaratile vati va mutengo eni ovaha jovaha japama jairiwa romaya. Sawuli Migoromi wali liye ule afwanyeya vamohi na alombwana okwakwana 600. 3Muwari mwa atu kafwanyeya na liye ale, mmohi ali namakuta wenno awaretcha kuleti ya unamakuta. Nzina naye ali Ayiya. Ayiya ali mwana Ayitube. Ayitube wenno afwanyeya agali Ikabu mbalaye eto ali mwana Fineyasi. Fineyasi eto ali mwana Eli, wenno ali namakuta wa Yehova ilambo ya Silo. Eto atu atene a Sawuli tchaiziwile ira Jonata ohovenyavo.
4Ndila yenno yafuna vira Jonata ira awande fiya vali nikuru na aFilistewu, yohokana nimburo nodiha nokana mabwe mwafuna liye titela. Nipedi na kombela wazela liye naitaniwa Minga eto nkuma wa kombela ya ule wafuna liye gwela aitaniwa Vojerimela. 5Nipedi naitaniwa Minga nne nafwanyeya pandi ya suli sogolro wa ilambo ya Jeba. Nkumiwa aitaniwa Vojerimela afwanyeya pandi ya norti#14:4-5 pandi ya suli ku wonga mutu aimela againg'anile mavirelo wa nzuwa, pandi ya suli ku muwononi waye oromana. Eto pandi ya norti ku wonga mutu aimela againg'anile mavirelo wa nzuwa, pandi ya norti ku muwononi waye odjana. sogolro wa ilambo ya Mikimasi.
6Evale mulombwana Jonata ohowonga na muzombwe anna liye ule, liye ira: <<Ndowe vakapamentoni va anyakondo a aFilistewu anno kahaineliwe.#14:6 aFilistewu anno kahaineliwe: Ineliwa unawongiwa va kahi nnga ineliwa tempu ili hiyo ila. Wanle Mulugu ohomuwandela Abarahamu ira: mwana wa mwanapongwe uli watene unabaliwege vande vawo, akwakwanihaga malambo matanu na mararu, inafwanela aineliwe. (Jenesesi 17:12) Fwanyeya ira aineliwa akala alombwana ve. Eto kaineliwa kaganna malambo matanu na mararu, ku wonga kagali ahima a mmandani. (Levitiku 12:3) Ineliwa unawongiwa va ku wonga gwadiwa na mbene, hiya wandeliwa mazu. Wenno ahaineliwa kaanna pandi na Mulugu na atwaye. Voira Mulugu aavahile aIzarayeli ilambo ya Kana, Jonata ohokana ibaribari ira Mulugu aavahile aIzarayeli wandeya ira kaapege aFilistewu ohoineliwa ira kahafwanyeye mwilamboni muwa. (Detoronomiyo 9:1-6, 18:9-12, 20:16-18) Ha ejo Yehova afuna, unonikamiheda. Tchoira liye anikamiheda masiki nilive ambinli, nnoagondjiha. Mwasiwa Yehova ira agondjihe kavali yorutcha. Masiki mukale adjindji eto masiki mukale a vang'ono, jatene jinowandeya.>> 7Muzombwaye atukula jowanana jaye ule ohorumelaga eraga: <<Iranani malringana munaonela nyo, miyo nnouharani nyo na mmirimani mwaga mwatene.>> 8Jonata ohowakula eraga: <<Ndowemo nifiye vamisasani viwa vale ira nivioneyihe. 9Aliwa kaganionile, nivwa kawonga ira: <Mukaleve oimelene vevo ante hiyo nifiye vili nyo vo>, hiyo nirumele. Nera eno, hiyo kannagwela unafwanyeya atu ule. 10Mbwenye navwa aliwa kawonga ira: <Nyo mufiye uno>, inafwanela nidowe. Tchoira naona eno, nnovayela iziwa ira Yehova univaheda aliwa mmandani mwihu ira naagondjihe. Eto yenno inafuna ikale ionihedo.>>
11Noira enne, kohovihiya ira nikuru na aFilistewu kaaone. AFilistewu kagaaonne, kohowongaga keraga: <<Kaaoneni aEberewu amohiwa anno kavitanle anaavituwa mmulihani mwavitanle atu.>> 12Evale nikuru na alombwana a aFilistewu ale kohomuitanaga Jonata vamohi na muzombwe anna liye ule, aliwa ira: <<Kafiyani uno, ikala inafuna hiyo uwandelani.>> Evale Jonata ohomuwandela muzombwaye anna liye ule, liye ira: <<Kadiharege. Tchoira Yehova uhumala avaheda aFilistewu mmandani mwa aIzarayeli ira naagondjihe.>> 13Jonata ogwelaga na manda wafwanyeya atu ule eto muzombwe anna liye ule omuharaga. Jonata ohoroma ahinda, liye agwihedaga vati eto muzombwe anna liye ule omuhara mundulri muwa, liye roma apaga. 14Kohapa alombwana okwakwana 20 muwari mwa mwana nimburo eni.#14:14 mwana nimburo eni: Nimburo nne ulukula uwa ali nnga wu mameturu 40, wu mameturu 30. Eto fwanyeya ira yali nnga ndima ng'ombe mbinli nnawanda atu tipulravo siku nimohive. Wewo wali wana woroma wa aIzarayeli na aFilistewu siku nenne.
15Evale aFilistewu atene roma nikuru na ale kafwanyeya vakapamento vale, dowa ale kadowile kalabe ja umadjuba, vamohi na atu atene, Mulugu ohosakanya ira karome kukumuwa, kakayena ova. Eto teya yohorendeyaga.
Gondjihiwa wa aFilistewu
16Ora yenno Sawuli ohokana alombwanaye aarumile liye ira kadowe kaawendelele aFilistewu ale. Aliwa kafwanyeya Jibeya, ilambo yakala nlogo na Benjami. Mwa enne aliwa kagalive muwari mowendelela, kohaonaga aFilistewu okukumuwene, atene kabalaleyaga, kagudulagana mmohi na nfwaye. Evale aliwa kagawenlewo, kohozaga muwandela mwene Sawuli jatene.
17Evale Sawuli ohowongaga na atwaye kali na liye, ira: <<Mwaakontari atu atenene ira mmuone mutu guvi uvennyevo.>> Aliwa kagaakontarile, kohofwanya ira mulombwana Jonata na muzombwe atukula jowanana jaye tchalivo. 18Evale Sawuli ohomuwandela namakuta Ayiya eraga: <<Kazana uno kuleti ya unamakuta#14:18 kuleti ya unamakuta: MaBibiliya amohiwa anawonga Kaxa ya Mulugu. ira niwombezeni yofuna ya Mulugu!>> Tchoira mwa malambo anne Sawuli na anyakondwaye a Ana Izarayeli kawendaga, kowenda na namakuta Ayiya wenno anna kuleti ya unamakuta. 19Sawuli awongagave na namakuta ule eto madugudugu kapamento ya aFilistewu kerave simbwa. Evale Sawuli ohowonga eraga: <<Kahiya kuleti ya unamakuta, kuwombeze.>> 20Evale Sawuli ohogundeyaga vamohi na anyakondo aye, aliwa dowa ira kawane na aFilistewu. Kaafwannye aFilistewu kagali zagi zagi, kaporotchanaga oka oka na masupada kanna atu.
21Fwanyeya ira malambo a mundulri kohokalawo aEberewu kalupile kadowa kakalaga na aFilistewu. Mbwenye kagaonne enne, kohowelagawo, aliwa dowa gumanela na aIzarayeli anno kafwanyeya na mwene Sawuli na Jonata. 22Eto aIzarayeli anno kavitanle ilambo ya mmwangoni ya Efarayimi, kagavwile ira: <<AFilistewu anatawa>>, aliwa kohovituwaga, aliwa gumanela na afwiwa amohiwa ale, roma wanaga na aFilistewu. 23Kowanagave na ndila ante kwaranya ilambo ya Bete-Aveni. Eto Yehova siku nenne ohawombola aIzarayeli mmandani mwa aFilistewu.
Jonata ohovuneliwa na aIzarayeli
24Siku nenne aIzarayeli kohomalaga waheya na mwasa wa ndala. Tchoira siku nenne aliwa tchadjilege yengo. Mwasiwa Sawuli ere lumbela ira: <<Mutu wenne unabaranyede dja yengo peno nzuwa nahanavire, miyo dahanaawelihede kunyakunya amwidanaga, mutu wenno unotembelrelreya!>> Nona siku nenne kalivo adjilege yengo.
25Mwa enne kohovolowaga guguru eni mwafwanyeya nuwi vati vene. 26Evale aliwa kagavolowile muguguruni mule, kohoonaga nuwi dile vati. Mbwenye kalivo adjilege, mwasiwa atenene kaovaga yolumbela ya Sawuli.
27Mbwenye Jonata kavwile mazu Sawuli alumbela liye na aIzarayeli. Mwa enne kagafwanyile nuwi dile, liye ohotukulaga imiri yanna liye, liye bwiniha vali nuwi dile, liye nyangulraga. Mobaranya maningo aye kohomulimbaga. 28Mbwenye mulombwana mmohi ohowongaga eraga: <<Hiyo atenene nihimala waheya na mwasa wa yolumbela ya babawo iniovihilena liye ira: <Mutu wenne unadje yengo peno unotembelrelreya!> >> 29Evale Jonata ohowakulaga eraga: <<Babaga airagana eno kalabileve yengo. Kaing'anani vidjile miyo nuwi ding'ining'inive, maningwaga kohodilimba! 30Yali yofwanela nahadjilege jodja jinafwanya hiyo muwari mwa amwidanihu ira nikayena kopolo. Kaing'anani! Kodi na makalelo naapile hiyo amwidanihu ale na ndala dihu dene, ahakanlege nnga nidja yengo, atu nafuna hiyo apa kakala angasi?! Tchakala a masika! Mbwenye na mwasa wa ndala, kanisimbwile apa aFilistewu adjindji.>>
31Siku nenne aIzarayeli kohagondjiha aFilistewu kawanaga romela Mikimasi ante dowa fiya Ayijaloni. Nomala eno, aliwa kohomala waheya waheya. 32Evale kohotukulaga jengo jaawakile atu amwidaniwa ale: mabila, ng'ombe, na ana ng'ombe, aliwa paga vati na makalelo abure, piyaga eno djaga na sangiri niwa nene.#14:32 djaga na sangiri niwa nene: Kahi ira aIzarayeli tchapiya nne tchawotcha, nari. So mbwenye muwari mwa malamulo, Mulugu okameliha dja sangiri. Nona aIzarayeli kafunaga pa mwanainyama, aliwa kapa na makalelo kaiziwile atu ira sangiri natene nimalemo. Mbwenye siku nenne na mwasa wa ndala ira kavirihemo mwatene mwene mwaviretcha atu, kohoona dibeliwa, evale tchairilena. Yeniyo mbwenye yali yotega vamentoni va Mulugu. 33Mbwenye kohokalawo atu kavenyilege dowa muwandela Sawuli ira: <<Kaing'anani! Atu anamutegela Yehova. Aliwa anapa anavinyama, kadjaga na sangiri nene!>> Evale Sawuli ohowonga eraga: <<Kohosakanya yengo yabure. Kapingiritchani nibwe nlukulu muzena vili miyo va.>> 34Nomala eno, Sawuli ohowongaga eto eraga: <<Muvenye, mudowe mwaawandele atwayo ira kazegena uno mabila ewa na ng'ombe diwa ira kape veva, amala kadje. Eto mwadjaga, kakalevo unafuna dja nyama na sangiri niwa nene tawiha ira munamutegele Yehova.>> Mwa enne ora ya mahiyu kada mutu ozagana mwanainyama waye waye, aliwa pa vevale. 35Evale Sawuli ohosakanya ibuwa ya Yehova. Ibuwa yenne yali ibuwa yoroma yasakannye mwene Sawuli.#14:35 ali ibuwa yoroma yasakannye mwene Sawuli: Ku wonga tonga waye watene ali ahanababihege manga ibuwa. Ku wonga Sawuli kaali mutu osimbwa kukumuwela ja Mulugu. Johoireya jengo jidjindji malambo a mundulri jofwanela nnga Sawuli amange ibuwa mbwenye kairilena.
36Evale Sawuli ohowongaga na atwaye atene eraga: <<Mahiyu vano ndoweni nawane na aFilistewu. Ante fiyeda unde unatchege atu nnomala awaka jatene jinna atu eto nnomala apa, nne mmohi kannamuhiya.>> Evale aliwa kohowakula keraga: <<Tabo, iranani nnga munaonela nyo.>> Mbwenye namakuta ohowongaga, liye ira: <<So nahanairena, inafwanela nibabihe nfuka Mulugu inafuna hiyo irana.>> 37Evale Sawuli ohonfukaga Mulugu, liye ira: <<Didowe dawane na aFilistewu? Dadowa ira dawane, kodi nyo munoavaheda mmandani mwa aIzarayeli?>> Mbwenye Mulugu kawakunlegeve yengo siku nenne.
38Mwa enne Sawuli ohowongaga eraga: <<Nyo asogolrelri atene a aIzarayeli ndoweni nigumane ira nione kodi yotega tchivi isakanyiwe peno. 39Miyo nnawonga vamentoni va Yehova okalawo, wenno unaawombola aIzarayeli ira mutu wenne utegile, unagomela piwa, masiki akala mwanaga Jonata.>> Mbwenye kalivo awakunlege yengo. 40Noira eno, Sawuli ohowongaga na aIzarayeli atene, liye ira: <<Nyo atene mukale pandi imohive, miyo na mwanaga Jonata nikale wehu wene.>> Evale aliwa kohowakulaga, aliwa ira: <<Muirena munafunela nyo.>>
41Noira eno, Sawuli ohowongaga na Yehova Mulugu wa Izarayeli eraga: <<Nyo peno kamudirumenle ifukile miyo. Nnaona ira muwari mwa hiyo ukala utegile. So Yehova Mulugu wa aIzarayeli, miyo peno nnouvepani ira akala yotega tchaga nari ya mwanaga, murumele muwari mwa Urimi. Mbwenye akala yotega tcha atwinyu aIzarayeli, murumele muwari mwa Tumimu.>>#14:41 murumele muwari mwa Urimi… murumele muwari mwa Tumimu: Malambo a mundulrimu Mulugu ohawandela aIzarayeli makalelo owombeza jofuna jaye. AIzarayeli kohokana mabwe menli kawombezetchana atu anno aawandenle Mulugu. Yowombezana imohi yaitaniwa Urimi, imohiwa yaitaniwa Tumimu. (Ezodu 28:30) Evale aliwa kowanda wombeza na makalelo aawandenle Mulugu. Makalelo kairana atu kaniiziwile. Evale kagairilena enne, yorumela yamutonyile mwene Sawuli vamohi na mwanaye Jonata, hiya anamwindji ale.
42Evale Sawuli ohowonga, liye ira: <<Kawombezani ira muone akala yotega tchaga owu tcha mwanaga Jonata.>> Mwa enne kagawombezile, atonyiwile ali mulombwana Jonata. 43Evale Sawuli ohonfuka mwanaye ule, liye ira: <<Kodi wirile nni?>> Mwanaye ule ohomuwakula, liye ira: <<Miyo datukunle imiri yanna miyo, miyo zoliha nuwi da vang'onove, nomala miyo dja. Eni dili okozeyene ira dikwe.>> 44Evale Sawuli ohowongaga, liye ira: <<Weyo peno unokwa. Nahaupe weyo peno, Mulugu aditonge na makalelo anafuna liye.>> 45Mbwenye anamwindjale kohowakulaga keraga: <<Kajinaireya. Ira mulombwana Jonata wenno uawombonle aIzarayeli akwe, nari, kajinaireya. Hiyo nnawonga vamentoni va Yehova okalawo ira kalivo unafuna moriheda vati nne nsisi naye nimohi. Tchoira jisakanyile Jonata peno ji, jiwandeyile na kopolo da Mulugu.>> Mwa enne anamwindji kohonvunela mulombwana Jonata ira liye ahakwe.
46Evale Sawuli ohiyaga ahara aFilistewu. AFilistewu kohowelelaga mwilamboni muwa.
Sawuli na aIzarayeli kohagondjiha amwidaniwa
47Sawuli agamanle kala mwene wa aIzarayeli, ohowana na amwidanaye atene owandamelana roma akuda Mowabe, dowa akuda Amoni, akuda Edomu, amwene a Zoba vamohi na aFilistewu. Eto mwatene mwawana liye, ogondjiha. 48Sawuli ohowana molimba, fiyeda agondjiha akuda Amaleki, liye avunela aIzarayeli mmandani mwa ale kaawaketcha fwaramento dewa.
49Sawuli anna ahima a alombwana araru: Jonata, Isivi na Malekisuwa. Eto ohokana ahima a ahiyana ambinli. Wa mulukuluwa aitaniwa Merabe, wang'onong'onuwa aitaniwa Mikali. 50Eto muhiyanaye aitaniwa Ainowa, mwana Ayimazi. Musogolrelri wa nikuru naye na anyakondo ali pirimu waye wenno aitaniwa Abineri, mwana titiyu waye Neri. 51Kixi, babaye Sawuli, na Neri, babaye Abineri, babiwa ali mulombwana Abiyeli.
52Mwene Sawuli tonga waye watene amwidanaye aawanetchana liye simbwa ali aFilistewu. Mwa enne aIzarayeli atene kadowa kondoni, Sawuli amuona muIzarayeli mmohi owana pama na kopolo, agali olimba murima, liye omugumaniha na anyakondwaye.
Currently Selected:
1 Samuweli 14: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
