1 Amwene 3
3
Salomawu ohomutela mwana Farawu
1Mwene Salomawu ohomutela mwana mwene Farawu, liye roma wandana na Farawu mwene wa Ijipitu.#3:1 Farawu mwene wa Ijipitu. Farawu kaali nzina nobaliwana, mbwenye ali nzina navahiwa mutu uli watene agwela vampandoni atongaga ilambo ya Ijipitu. Agamutenle ohomuzana sidadi ya Davi, fiyeda mariha manga nyumbaye vamohi na Nyumba ya Yehova, vamohi na muru owerewera sidadi ya Jeruzalemu. 2Fwanyeya ira mwa tempu yenne atu kavelelaga mikuto diwa wa Yehova, kadowetcha kuta mamburo otama ovelela mikuto.#3:2 mamburo otama ovelela mikuto: Fwanyeya ira muwari momutamalela Mulugu, Salomawu na aIzarayeli kohoirana yengo yabure tchoira kahanavolowe ilambo ya Kana, Mulugu aarumile aIzarayeli ira kabwanyule mamburo anno akuda Kana mwaveleletcha atu mikuto wa amilugu ewa. (Numero 33:52) Eto Mulugu ohakameliha ira aliwa kahamutamalelege mamburo a vaheno vene mbwenye aarumile ira kaze, kamutamalele nimburo neno nafuna liye atonyiheda. (Detoronomiyo 12:5-6, 11-14) Fwanyeya ira Mulugu amutonyihedile Davi nimburo eno wandamelana sidadi ya Jeruzalemu. (1 Koronika 21:18,26, 22:1) Evale roma iziweya ira neno nali nimburo nomutamalelavo Mulugu. (1 Amwene 8:29, 9:3; 2 Amwene 21:4,7; 2 Koronika 7:12,16) Mwasiwa mwa malambo anne yali yahanamangiwe nyumba para nzina na Yehova nitamaleliwegemo.
3Fwanyeya ira mwene Salomawu omuziveliwetcha Yehova, liye haraga mangano a babaye Davi. So mbwenye odowetcha mamburo otama ovelela mikuto, liye velelaga mikuto da Yehova eto liye tumeyaga jonukela mwemule. 4Salomawu ohodowa Jibeyawu ira avelele mikuto, mwasiwa nimburo nenne ku wewo wafwanyeya ibuwa indimuwa yovelelavo mikuto. Liye ohotumeya evale anavinyama 1.000, liye velela wa Mulugu nnga vairetcha liye.
Salomawu ohonvepa Mulugu zelru
5Salomawu agali Jibeyawu, Yehova Mulugu ohozaga wa liye na mahiyu muwari moroha, liye ira: <<Kadivepe inafuna we ira miyo duvahe.>> 6Evale Salomawu ohowakulaga eraga: <<Yehova nyo mwanna muoniha babaga Davi namalaba wenyu zivela wenyu ulukulu mwasiwa liye ali mutu ororomeleya eto awenda na makalelo apama, eto ali mutu owongowa murima vamentoni venyu. Nyo mohokalelave muoniha zivela wenyu ulukulu eto muhufiyeda nvaha mwanaye mmohi ira agarati vampandoni vaye fiyeda peno. 7Nyo so Yehova Mulugu waga muhuwanda dihiya miyo namalaba wenyu ira dikale mwene vamalroni va babaga Davi namalaba wenyu. Miyo eto dili mwana muzombwe eto kadiiziwile makalelo ofwanela ira diiregena. 8Miyo namalaba wenyu nnafwanyeya vari va atu enyu anno mwaasakunlre nyo ira kakale enyu, anno anafwanyeya kagali atu oindjivetchetcha, anno kahanawanda kontareya. 9Mwa eno, miyo kannafuna yengo imohiwa. So nnafuna mudivahe zelru ira diwandege atonga atwinyu oindjivetchetcha mwapama eto diwandege hiyanihavo yapama na yabure. Kodi bani unawande atonga atwinyu oindjiva eni, ahakale nyo munvaha zelru?>>
10Evale Yehova ohoziveliwa yovepa ya mwene Salomawu. 11Mwa enne Mulugu ohomuwandela eraga: <<Voira weyo uvepile zelru ira uwandege tonga na makalelo apama hiya vepa ira ingumi yawo igonele mwilamboni ya vati, nari jorayela, nari ira amwidanawo kakwe, uhusakanya pama. 12Miyo nnouvaha yenno ivepile we. Nnouvaha zelru no onelramo wewo uli wahanababihege kana atu amohiwa a ilambo ya vati eto kalivo unafuna za kana sogolro. 13Eto hiya yenno ivepile we bahi, miyo nnouvaha jengo jimohi jiwa jahavepile we. Nnouvaha jorayela vamohi na undimuwa, fiyeda ira kalawo wawo watene kaza akalawo mwene olingana na weyo. 14Eto weyo wawenda na ndila daga, uharihaga jofuna jaga na malamulo aga matene nnga jairile babawo Davi, miyo nnowendjeda malambo a ingumi yawo mwilamboni ya vati.>>#3:14 wawenda na ndila daga, uharihaga jofuna jaga: Fwanyeya ira Mulugu agamanle nvaha mwene Salomawu zelru, liye ohowonga jokokomeza ira liye akale mutu onvwelela. Ku wonga inowandeya mutu kana zelru mbwenye hawenda na zelru daye. Aira eno, zelru daye kannamulabela yengo. Nona Mulugu amukokomezaga Salomawu ira awendege na makalelo apama na zelru davahiwe liye. 15Noira enne, mwene Salomawu agarurumuwile, ohoonelramo ira Mulugu ohowonga na liye muwari moroha. Mwa enne ohodowaga Jeruzalemu, liye dowa sogolro wa Kaxa ya Yopangana ya Yehova, liye velela wa Yehova mikuto dotumeya na jovelela ja murendele.#3:15 mikuto dotumeyadali mikuto dowatchela jotega. Mukuto watene era tumeyiwa. (Levitiku 1:1-9) jovelela ja murendelejali jovelela jomutamalela Mulugu zela makalelo apama aavahile liye aliba mutamalela. Mutu akutaga mukuto wa murendele, ku wonga ira: <<Miyo nnomutamalela Mulugu zela murendele unna miyo.>> Mukuto wenno wa vang'ono otumeyiwa, wa vang'ono adja ali namakuta, ohala adja ali maliba velela. (Levitiku 7:11-16) Noira eno, ohosakanyaga pwando para anamalabaye atene.
Mwene Salomawu ohotonga mulandu orutcha
16Siku nimohi ahiyana ambinli aputa kohozaga wa mwene Salomawu, aliwa za imela vamentoni vaye. 17Kagazile, muhiyana mmohi ohoromaga wonga eraga: <<Mbwiyeni so mwene, miyo na muhiyana nfwagola, nnakala vande vamohive. Miyo dohombala mwanaga wa mwanapongwe, nfwagola agali vamohi na miyo. 18Siku naneraru na nfwaga wenna tambe ohombala mwana waye wa mwanapongwe. Mbwenye jatene jejo jiireyaga, vande vale nalivo ambinlive, nne kavali mutu mmohiwa. 19Siku nimohi na mahiyu nigonaga, nfwagola muwari motalatala, ohonfinya mwanaye, fiyeda mwanayele kwa. 20Mwa enne ohovenyaga na mahiyu evale miyo namalaba wenyu digonaga dahaonagawo, liye mutukula mwanaye ule, za mugonantiha vamirimani vaga. Eto liye mutukula mwana waga dowa mugonantiha vamirimani vaye. 21Mmetcheloni muwa na mabebehene dagavenyile ira dimuwamwihe mwanaga, dinfwanyile uhukwa. Mbwenye unde wagatchile dagamuing'anile pama, dimuonile ira mwanole kahi waga.>> 22Mwa enne muhiyanole awongagave, nfwaye ohomugwadelaga, liye kwi: <<Unanama we. Mwana ukwile gwawo, uliwo gwaga!>> Evale muhiyana oroma wongamo ule ohowakulaga eraga: <<Unanama. Mwana okwa gwawo, mwana uliwo gwaga!>> Mwa enne kohoromaga kangana vamentoni va mwene evale.
23Noira enne, mwene Salomawu ohowongaga eraga: <<Mutu mmohi unawonga ira: <Mwana uliwo gwaga, mbwenye ukwile gwa nfwagola!> Eto nfwaye uni: <Nari. Mwana uliwo gwaga, mbwenye ukwile gwawo!> >> 24Mwa enne mwene Salomawu oharumaga atu ira kadowele supada. Evale kohodowelaga supada nne, aliwa zana vamentoni vaye. 25Kagazilena, mwene Salomawu ohowongaga eraga: <<Mmugwade vari mwana okalawo ula, pandi imohi munvahe nfwaye, pandi imohiwa munvahe nfwaye!>> 26Mwene Salomawu agawongile enne, mwana okalawo ule mmaye wa ibaribari agavwile mazu anne, ohomuwendelaga tangaranga mwanaye ule, liye kwi: <<Nari. Nnauvepani mbwiyeni, mwanagola kamumpe. Mutukuleni munvahede muhiyana nfwagola!>> Mbwenye muhiyana mmohiwa ule ohowongaga eraga: <<Iyaa, kamugwadeni vari ira ahakale waga nne ahakale waye. Atene nipuzeye.>> 27Evale mwene Salomawu ohowongaga kwi: <<Kamumpe mwanoyo! Mmutukule munvahede muhiyana oroma ule, mwasiwa mmaye gwenno!>> 28Jagaireyile enne, aIzarayeli atene kohovwaga zela makalelo atongile mwene Salomawu mulandu wenne. Mwa enne kagavwile, kohoroma muriheda valukulu, tchoira kohowanda ona ira Mulugu uhunvaha zelru ira awandege tonga mwa ibaribari.
Currently Selected:
1 Amwene 3: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
