1 Koronika 5
5
Makolo kakumile mwa Rubeni
1Ala ba anapongwe a Rubeni mwana murandji wa Izarayeli. Rubeni ali murandji baliwa, masiki eno, voira ohogona na muhiyana wang'ono wa babaye atakalihaga kama ya babaye, undimuwa waye wohomulupa, dowa kala na ahima a mbalaye Joze.#Jenesesi 48:3-6 Muwari molremba malista a makolo ewa, Rubeni kabalriwe nnga mwana murandji. 2Masiki eto Juda ali wa kopolo akwaranya abalaye atene, eto musogolrelri afuna akume munlogoni mwaye, liye kabalriwe nnga mwana murandji. Undimuwa ozela kala murandji baliwa avahiwe ali Joze. 3Ala ba anapongwe a Rubeni mwana murandji wa Izarayeli: Enoki, Palu, Ezironi na Karimi. 4Joweli ohombala Semaya, Semaya ohombala Gogi, Gogi ohombala Simeyi, 5Simeyi ohombala Mika, Mika ohombala Reyaya, Reyaya ohombala Bali, 6Bali ohombala Bera wenno Tigalate-Pilezeri mwene wa Asiriya amuhindile liye amudowana ilambo imohiwene. Fwanyeya Bera ule ali musogolrelri wa nlogo na Rubeni. 7Kagalrembile malista a makolo ewa, asogolrelri a muibalini mwa Bera kafwanyeya kagali Jeyeli, Zakariya, 8na Bela wenno ali mwana Azazi, mwana Sema, mwana Joweli. Aliwa kakala ilambo ya Aroweri dowagave Nebo na Bali-Meyoni. 9Aliwa eto kakala makumelo wa nzuwa vovolowela isalesale yenno ifiyile pakana muhindje Eufarati mwasiwa jifuwo jiwa johosimbwa indjiva mwilamboni mwa Jileyadi. 10Malambo atonga mwene Sawuli, atu a nlogo na Rubeni kohowana kondo na aAgiri, aliwa agondjiha, roma kala muwari mwa ilambo yatene yafwanyeya makumelo wa nzuwa wa Jileyadi.
Makolo kakumile mwa Gadi
11Atu a nlogo na Gadi kali norti wa ilambo yakala nlogo na Rubeni, eto kakala muwari mwa ilambo ya Bazani dowagave ante Salika. 12Mwilamboni mwa Bazani musogolrelri wewa ali Joweli, omuharela ali Safani eto kohakana asogolrelri amohiwa Janayi na Safati. 13Kohokana eto abaliwa anno kali asogolrelri a maziza matanu na menli. Maziniwa ba ala: Mikayeli, Mesulawu, Seba, Jorayi, Jakani, Ziya na Eberi. 14Atu anna kali atu kakumile muibalini mwa mulombwana Abiyaili mwana Huri, mwana Jarowa, mwana Jileyadi, mwana Mikayeli, mwana Jesisayi, mwana Jado, mwana Buzi. 15Mulombwana Ayi mwana Abidiyeli muzula wa Guni gwali musogolrelri wa muibalini mwewa. 16Atu a nlogo na Gadi kakala ilambo ya Jileyadi, ilambo ya Bazani na tatamo dowandamelana wewule na mamburo owandamela odjihamo jifuwo fiyeda mwemo mwagomenle ilambo ya Saromi. 17Atene anna koholrembiwa muwari mwa malista a malogo ewa tempu yatonga Jotawu mwene wa Juda na Jerobowawu mwene wa Izarayeli.
Anyakondo a Rubeni, Gadi na metadi ya atu a nlogo na Manasesi
18Muwari mwa malogo a Rubeni, Gadi na metadi ya atu a nlogo na Manasesi, mohokala alombwana a kopolo oterenari pama owenda na supada na defeza na maurwa, atu oiziwa wana kondo okwakwana 44.760. 19Aliwa kohowana kondo na aAgiri, aJeturi, aNafisi na aNodabe. 20Tempu yawana atu kondo, kohonvepa Mulugu ira aakamihede, evale Mulugu ohavaheda mmandani mwewa akuda Agiri na afwiwa atene. Mulugu aakamihedele mwasiwa aliwa kohomunyindela. 21Kohawaka amwidaniwa ale jifuwo jiwa romana akamelo 50.000, mabila 250.000 na aburu 2.000. Kohahinda eto alombwana 100.000. 22Kohapa amwidani adjindjene mwasiwa kondwele awana ali Mulugu. Aliwa kohokalave muwari mwa ilambo yewa fiyeda tempu yahindiwe atu, katukuleliwa vilambo dimohi diwa.
Makolo kakumile muwari mwa metadi ya atu a nlogo na Manasesi
23Metadi ya atu a nlogo na Manasesi kali atu oindjiva, aliwa kakala ilambo ya Bazani fiyeda sidadi da Bali-Erimomi na Seniri na mwango Herimoni. 24Asogolrelri a muibalini mwa nlogo niwa ba ala: Eferi, Isi, Eliyeli, Aziriyeli, Jeremiya, Hodaviya na Jadiyeli. Asogolreli atene anna kali anyakondo a kopolo eto ovweya. 25Mbwenye atwale kohomutegela Mulugu wa makolo ewa, aliwa kohoraruwa kaharaga amilugu a atu anne Mulugu aatolotchile liye mwilamboni mule ira aliwa kakalemo. 26Na mwasa wenno Mulugu wa Izarayeli ohonvenyiha mulombwana Puli mwene wa Asiriya wenno eto aitaniwa Tigalate-Pilezeri, dowa bwanyula jilambo dewa, liye ahinda atu a nlogo na Rubeni, a nlogo na Gadi, na atu a metadi ya nlogo na Manasesi, adowagana vilambo dimohi diwa. Ohatukula adowana ilambo ya Hala, Habori na Ara na ilambo yawandamenle muhindje Gozani, aliwa kalaga wewule fiyeda siku na peno.
Currently Selected:
1 Koronika 5: iLolo
Highlight
Copy
Compare
Share
Want to have your highlights saved across all your devices? Sign up or sign in
© 2018 Visão Integral
