Banndi 25
25
Banndi Suleymaana goɗɗi
1Inan banndi Suleymaana ɗi yimɓe Esekiya, kaananke Yahuudiya cottini.
2Teddeengal Laamɗo wo suuɗude kujje,
Teddeengal kaananke du, yiitude ɗe.
3Moy anndi haddu tooweefi kammu naa luggeefi leydi?
Sakko ɓernde kaananke.
4Ittu tuundi nder cardi,
ndeen bahillo waɗiran ndi jardugal.
5Ittu bonɗo yeeso kaananke,
ndeen laamorde mum semmbiɗan nder fonnditaare.
6Taa manu hoore maa yeeso kaananke,
taa jooɗa nokku tedduɓe.
7Sabo mbi'eɗaa: «Hewtu ɗo,»
na ɓuri pamɗineɗaa yeeso ɓii laamu.
Si gite maaɗa nji'ii goɗɗum dow goɗɗo,
8taa yaawu tuumude mo,
sabo noy ngattaa si o jiiɓii ma?
9Si aɗa hiitodoo e neɗɗo,
taa ɓanginaa sirri goɗɗo,
10heɓa taa goɗɗo nanu ko mbi'uɗaa, de semtine.
Ndeen, innde maa bonan faa abada.
11Haala kegitiika na nanndi e koɗol kaŋŋe ngol toɓɓe cardi.
12Jom hakkillo tindinoowo kettintooɗo
na nanndi e hootonnde kaŋŋe naa peɗe kaŋŋe dimo.
13No peewol weliri wakkati nguli
noon nelaaɗo koolniiɗo wa'ani neluɓe ɗum,
na welna ɓerɗe mawɓe mum.
14No henndu e kammu e duule ɗe toɓaay ngorri,
noon manoowo hoorem dow dokkal ngal hokkaay wa'i.
15Gaɗuɗo munyal jaaloto kaananke,
haala peewka na hela fay ƴi'al.
16Si a heɓii njuumndi, nyaamu haddu ko heƴete,
heɓa taa a yawtinowi, de tuuta.
17Taa heewu yaade wuro gondo maa,
sakko o sawte, de o wanye.
18Ceediiɗo fewre dow goɗɗo,
na nanndi e sawru e kaafaahi e kural mbelngal.
19Hoolaade jammbotooɗo nyannde bone,
na nanndi e nyiinde helnde naa koyngal laƴoowal.
20Jimanoowo jom ɓernde mettunde,
na nanndi e ittuɗo saaya mum jaangol hakkunde dabbunde,
naa dufuɗo lammuɗam dow ɓuure.
21Si ganyo ma yolbii fu, hokku ɗum nyaama,
si ɗomɗii, hokku ɗum yara.
22Si a waɗii noon, a dekii semteende dow hoore makko,
Joomiraaɗo yoɓete.
23Hono no kammu ɓalinirta lettugal de toɓa,#25:23 Ley Ibraninkoore, ina winndaa «No henndu soɓɓirre waddirta ƴuwoonde»
noon hunnduko nyo'oowo ɓawlinirta geese.
24Wuurude dow soɓɓundu suudu
na ɓuri wondude e debbo kaɓeteeɗo ley mayru.
25Kabaaru belɗo ƴuwɗo leydi mboɗɗundi,
wo hono ndiyam peewɗam kokkaaɗam ɗomɗuɗo.
26Ponnditiiɗo mo bonɗo wayliti hoore mum,
na nanndi e feto diibiingo naa ndiyam ɓunndu nyolɗam.
27Yarde njuumndi ɗuunndi wooɗaa,
noon du tefande hoorem manngu.
28Neɗɗo mo walaa nanngitaare,
na nanndi e wuro ngo walaa kokuwol deenorgol.
Currently Selected:
Banndi 25: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
