Esaaya 66
66
Haala ɗowtantooɓe goongaaɓe e fewreeɓe
1Inan ko Joomiraaɗo wi'i:
Kammu woni jooɗorgal laamu am.
Leydi woni ɗo koyɗe am njaaɓata.
Suudu nduye mbaawɗon nyiɓande kam,
faa laatoo nokkuure to powtintoomi?
2Kujje ɗeen fuu e juuɗe am tagirmi ɗum'en.
Noon ɗe fuu ɗe laatorii.
Noon Joomiraaɗo wi'i.
Inan ɓe ngattammi hakkillo am e muɓɓen:
dow talkaajo mo ɓernde suniinde,
diwnoowo si nanii konngol am.
3Kirsuɗo ngaari fu, warii ɓii-Aadama.
Cakkuɗo mbaalu maa mbeewa fu, helii hoƴƴudu ɓoosaaru.
Gaɗoowo sadaka conndi fu, sakkii ƴiiƴam giroowu.
Buluɗo ure faa teddinira fu, ɗowtanake tooruuji.
Ɓe fuu iɓe njokki laawi maɓɓe bonɗi,
iɓe mbeltoroo waɗude ko nyiddinii.
4Ndelle miin du, mi suɓake torrude ɓe.
Mi jippinan dow maɓɓe ko ɓe kulannoo ɗuum.
Sabo mi noddii de fay gooto nootaaki,
mi haalii de ɓe kettinaaki,
ammaa ɓe ngaɗii ko boni yeeso am,
ɓe cuɓake waɗude ko metti kam.
Joomiraaɗo na waaltina ɓerɗe, na saroo
5Kettinee konngol Joomiraaɗo,
onon diwnooɓe nde nani konngol muuɗum ɓeen.
Inan ko sakiraaɓe mooɗon, wayɓe on,
riiwooɓe on, na njalnoroo on saabe innde am, na mbi'a:
Joomiraaɗo holla teddeengal muuɗum faa min nji'a seyo mooɗon!
Ammaa wo kamɓe e ko'e maɓɓe cemtata.
6Duko na ƴuura ley galluure,
nyonaali na nanee ley suudu dewal mawndu.
Wo Joomiraaɗo yoɓata wayɓe muuɗum ko kaandi.
7Siyona hewtii hoore muuɗum gilla ŋatawere muuɗum fuɗɗay.
O rimii ɓiɗɗo gorko gilla reedu makko ŋatay.
8Moy nani hono ɗum abada?
Moy yi'i iri ɗuum abada?
Yalla leydi na waawi rimeede nyannde wootere naa?
Yalla lenyol na waawi rimeede wakkati gooto naa?
Siyona rimii ɓiɓɓe muuɗum ɗo ŋatawere muuɗum fuɗɗi ɗoon.
9Joomiraaɗo wi'i:
Yalla miin, mi waɗan reedu debbo omtoo de mi haɗa ɗum rimude naa?
Miin kokkuɗo ɓeyngu oon,
yalla mi haɗan ɓinngel rimeede naa?
Noon Laamɗo mooɗon oon wi'i.
10Ceyodee e Urusaliima,
ceyoree galluure ndeen,
onon yiɗuɓe ɗum fuu.
Mbeltodee e mayre,
onon woyannooɓe saabe mayre ɓeen fuu,
11faa keɓon musinon de kaaron enɗam mayre baaltinoojam ɓerɗe mooɗon,
de musinon enɗi mayre korsuɗi ɗiin.
12Sabo inan ko Joomiraaɗo wi'i:
Mi jippinan jam dow mayre hono maayo,
teddeengal lenyi du, hono gooruwol bubbiroowol e semmbe.
On musinan, on mbuundete de paleɗon dow koyɗe.
13Hono no inniiwo waaltinirta ɓernde ɓiyum noon,
wo hono noon miin du mbaaltiniranmi ɓerɗe mooɗon.
Hakkillooji mon pukkoto ley Urusaliima.
14On nji'an ɗum de ɓerɗe mon ceyoo.
On njeccoto mbaggiɗon hono huɗo hecco.
Joomiraaɗo hollan maccuɓem baawɗe muuɗum.
O hollan wayɓe makko ɓeen du tikkere makko ndeen.
15Inan Joomiraaɗo na wara ley yiite,
torkooji makko na nga'i hono duluuru mawndu,
faa o rufa tikkere makko nyaaɗunde ndeen,
de o felɓira e maƴƴe yiite.
16Joomiraaɗo hiitorto e yiite,
o sarorto duuniyaaru fuu e kaafaahi.
Joomiraaɗo halkan yimɓe heewɓe.
17Seninɓe ko'e muɓɓen de laaɓini ko'e muɓɓen
faa naata ley guumooje cakkirɗe, na njaara gooto gooto,
na nyaama teewu girooji e kujje nyiddiniiɗe
e doomi ɓeen fuu timmiran de wootere.
Noon Joomiraaɗo wi'i.
Haala kawrital manngal cakitotoongal
18Miɗo anndi golle maɓɓe e miilooji maɓɓe.
Wakkati warii faa mi hawrondina lenyi e ɗemle fuu.
Ɓe ngaran de ɓe nji'a teddeengal am.
19Mi waɗan maande hakkunde maɓɓe. Mi nelan hedditiiɓe hakkunde maɓɓe ley leyɗe Tarsis e Pul e to Ludunkooɓe fiɗooɓe kure ɓeen. Mi yaaran ɗum'en faa leyɗe Tubal e Yawan, ley leyɗe hakkunde ndiyam boɗɗuɗe ɗe nanayno kabaaru dow am, ɗe nji'ayno teddeengal am abada ɗeen. Ɓe ngooynoyto kabaaru teddeengal am hakkunde lenyi gonɗi toon.
20Ɓe ngartiran sakiraaɓe mooɗon wonnooɓe ley leyɗe fuu dow waamnde am seniinde nder Urusaliima hono sadaka Joomiraaɗo. Wo pucci e torkooji konu e torkooji kurraaɗi e araaji baanaaji e geelooɗi ngartirta ɓe dow waamnde seniinde toon. Ɓe ngartidan e dokke maɓɓe hono no Israa'iilankooɓe ngaddirta sadaka muɓɓen ley suudu Joomiraaɗo e ginewol laaɓungol noon. Noon Joomiraaɗo wi'i. 21Mi waɗan woɓɓe maɓɓe laatoo almaami'en e Lewinkooɓe. Noon Joomiraaɗo wi'i.
22Hono no kammu keso e leydi keyri ndi ngaɗammi ndiin tabitirta yeeso am noon,
wo noon ƴuwdi mooɗon e innde mooɗon du tabitirta faa abada.
Noon Joomiraaɗo wi'i.
23Wakkati darorɗe lebbi, e nyalaaɗe powteteeɗe fuu,
yimɓe adunaaru fuu ngaran cujida yeeso am.
Noon Joomiraaɗo wi'i.
24Nde ɓe mburtotoo fu,
ɓe nji'an ɓalli maayɓe muurtannooɓe kam ɓeen na mbaalii.
Sabo gilƴi ɓalli maɓɓe ɗiin mbaatataa,
yiite duppoowe ɓe ngeen du nyifataa.
Ɓe laatoto ko hulɓinii e gite yimɓe fuu.
Currently Selected:
Esaaya 66: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
