Esaaya 65
65
Haala lenyol muurtungol e maccuɓe Laamɗo
1Joomiraaɗo wi'i:
Mi accii ɓe ƴamataano kam fay gootum pilake kam.
Mi accii ɓe pilataakono kam ɓeen njiitii kam.
Mbi'imi lenyol ngol noddataano innde am ngool:
Inani kam! Inani kam!
2Miɗo foortani yimɓe sattuɓe juuɗe am wakkati fuu,
yimɓe jokkuɓe laawol bonngol fodde miilooji muɓɓen oonyiiɗi ɓeen.
3Lenyol ngol yimɓe muuɗum cemtataa,
mettinooɓe ɓernde am wakkati fuu,
waɗooɓe sadakaaji ley guumooje cakkirɗe,
wulooɓe ure dow peraaje,
4jooɗiiɓe hakkunde caabeeje,
waalooɓe ley lohooji kaaƴe,
nyaamooɓe teewu girooji,
wattooɓe nyaamdu harmundu ley paali muɓɓen,
5na mbi'a: Woɗɗa min, taa ɓada min sabo min seniiɓe!
Ɗum fuu na ɗum laatii hono cuurki ley kine am,
hono yiite huɓɓoowe nge nyifataa.
6Ɗuum winndaama yeeso am, mi deƴƴintaako.
Sikke walaa, mi yoɓtoto ɓe faa laaɓa.
7Mi yoɓtoto hakkeeji mooɗon e ɗi maamiraaɓe mooɗon,
wulannooɓe ure dow baamle,
mettinannooɓe ɓernde am dow tile ɓeen.
Mi hiisoto hakkeeji maɓɓe arandeeji,
de mi hiitoo ɓe fodde hakkeeji maɓɓe ɗiin.
Noon Joomiraaɗo wi'i.
8Inan ko Joomiraaɗo wi'i:
Si ndiyam inabooje tawaama e wukuturu inaboohi fu,
na wi'ee: Taa halku ki,
sabo ki waɗan barke.
Mi waɗiran noon saabe maccuɓe am,
taa mi halka huunde fuu.
9Mi wurtinan ƴuwdi e Yaakuuba
de jeyɗo baamle am oon du, ƴuura e Yahuuda.
Ɓe cuɓotoomi ɓeen njeytan leydi ndiin,
maccuɓe am ɓeen du njooɗoto toon.
10Njaayri Saron laatoto durduɗe be'i e baali,
de naɗɗol Akor laatoo to na'i pukkotoo
Noon laatorantoo lenyol am ɗowtantoongol kam ngool.
11Ammaa onon yoppuɓe Joomiraaɗo,
yeggitinɓe waamnde am seniinde,
de na cakkana tooru Gad nyaamduuji,
na kebbinana tooru Meni yardude inaboojam ɓeen kaa,
12mi waɗan kaafaahi weeya dow mooɗon,
on fuu on ndikkinto faa kirseɗon,
sabo mi noddii de on nootaaki.
Mi haalii de on kettinaaki.
Ammaa on ngaɗii ko boni yeeso am
on cuɓake waɗude ko metti ɓernde am.
13Saabe ɗuum de inan ko Laamɗo Joomiraaɗo wi'i:
Maccuɓe am nyaaman, ammaa onon kaa, on njolban.
Ɗowtantooɓe kam ɓeen njaran, ammaa onon kaa, on ɗomɗan.
Ɗowtantooɓe kam ɓeen ceyoto, ammaa onon kaa on cemtan.
14Ɗowtantooɓe kam ɓeen ilinorto seyo, ammaa onon kaa on mbullan
saabe mettorgal ɓerɗe mooɗon.
On nyonoto saabe suno.
15Inɗe mon laatanto suɓaaɓe am ɓeen ko huɗtortee,
na mbi'a: Laamɗo Joomiraaɗo halkire no maani en noon!
Ammaa o noddiran maccuɓe makko ɓeen kaa e innde wonnde.
16Barkinɗo hoore muuɗum ley leydi ndiin fuu,
Laamɗo mo goonga oon barkinan ɗum.
Kunotooɗo ley leydi ndiin fuu,
hunoroo Laamɗo mo goonga oon.
Sabo torraaji paltiiɗi ɗiin njeggitete,
gite am nji'ataa ɗi katin.
Haala kammu keso e leydi keyri
17Inan mi tagan kammu keso e leydi keyri.
Ko wittii miccitataake katin,
ɗum wartataa e hakkillo katin.
18Ammaa ceyee, mbuurdon e welwelo faa abada,
saabe ko tagammi ɗuum.
Sabo inan mi tagan Urusaliima faa laatoo galluure seyo.
Yimɓe muuɗum du, ngondan e weltaare.
19Urusaliima laatoto seyo am.
Yimɓe am ɓeen du laatoto weltaare am.
Bojji e nyonaali nanataake ley muuɗum katin.
20Balɗe suka kecco taƴataake katin.
Nayeejo du maayataa gilla nyalaande muuɗum hewtay.
Sabo ɓurɗo sunɗude maaydan e duuɓi hemre.
Maayuɗo de tawi hewtay duuɓi hemre fuu ndaardete wo kuɗaaɗo.
21Ɓe nyiɓan cuuɗi de ɓe njooɗoo e majji.
Ɓe celoto inabooje de ɓe nyaama ɓiɓɓe muɓɓen.
22Ɓe nyiɓataa cuuɗi de goɗɗo wara jooɗoo e majji katin.
Ɓe aawataa de goɗɗo nyaama barke majjum katin,
sabo duuɓi yimɓe am ɗuuɗiran hono duuɓi leɗɗe noon.
Suɓaaɓe am ɓeen nyaaman barke golle juuɗe muɓɓen.
23Ɓe tampataa ɓolum,
ɓe ndimantaa ɓiɓɓe maɓɓe caabeeje katin.
Sabo ɓe laatoto ƴuwdi ndi Joomiraaɗo barkini,
taaniraaɓe maɓɓe ngondan e maɓɓe.
24Mi jaaboto ɓe gilla ɓe ŋaaraaki kam,
mi nanan haala maɓɓe gilla ɓe timminay haalude.
25Suundu e jawgel ndurdan ley durdude wootere.
Laddeeru nyaaman huɗo hono no ngaari noon.
Mboddi du sollaare laatoto nyaamdu muuɗum.
Ko boni waɗataa, fay gootum halkataa dow waamnde am seniinde ndeen katin.
Noon Joomiraaɗo wi'i.
Currently Selected:
Esaaya 65: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
