Esaaya 6
6
No Joomiraaɗo noddiri Esaaya
1Ley hitaande maayde kaananke Ujjiya, nji'umi Joomiraaɗo na njooɗii dow jooɗorgal laamu muuɗum faa to toowi sanne, toni saayo muuɗum na keewi suudu seniindu. 2Maleyka'en jalbooɓe yiite na ngoni dow makko. Gooto maɓɓe fu, na woodi bippeele jeegom, ɗiɗi faa suddira yeeso muuɗum, ɗiɗi faa suddira koyɗe muuɗum, ɗiɗi keddiiɗe ɗeen du faa fiirira. 3Iɓe noddondira, iɓe mbi'a:
Ceniiɗo, Ceniiɗo, Ceniiɗo,
wo Joomiraaɗo Jom Kammu e Leydi!
Adunaaru fuu na heewi teddeengal makko!
4Daaɗe peekotooɗe ɗeen ngaɗi joƴƴinirɗe dammbuɗe suudu nduun ndimmbii de keewi cuurki. 5Ndeen mbi'umi:
Mi bonii, mi lallii!
Sabo wo mi ɓii-Aadama mo toni tuunɗi.
Miɗo wuuri hakkunde yimɓe ɓe toni tuunɗi,
de gite am nji'i Laamiiɗo, Joomiraaɗo Jom Kammu e Leydi!
6Gooto e maleyka'en jalbooɓe ɓeen fiiri weeɗi kam na jilini ƴulmere huɓɓoore nde ittiri e ittirgel ƴulɓe dow sakkirde. 7O meemi hunnduko am de o wi'i kam:
Ɗum meemii toni maaɗa,
junuubaaji maaɗa ittaama,
hakkeeji maaɗa mooytaama.
8Ndeen nanumi Joomiraaɗo na wi'a:
Moy nelammi?
Moy yahanta en?
De njaabiimi mbi'umi:
Inani kam, nelam!
9Ndeen o wi'i:
Yahu mbi'owaa yimɓe ɓee ni:
On kettinto ammaa on paamataa faa'e!
On ndaaran ammaa on nji'ataa faa'e!
10Yoornu ɓerɗe yimɓe ɓeen,
cukkaa noppi maɓɓe
de mbumnaa gite maɓɓe
taa ɓe nji'ira gite maɓɓe,
taa ɓe nanira noppi maɓɓe,
taa ɓerɗe maɓɓe paama,
sakko ɓe tuuba de ɓe kisa.
11Mbi'umi: Faa ndeye, yaa Joomiraaɗo?
O jaabii kam o wi'i:
Faa nde galluuje laatowii bille,
cuuɗi ɓoli ɗi ngalaa fay gooto,
nde leydi halkowaa faa laatii nokku jeewniiɗo.
12Faa wakkati Joomiraaɗo woɗɗinowi yimɓe
de leydi ndiin laatii winnde yoppaande.
13Fay si gooto tan heddii ley yimɓe sappo,
o halkan ɗum.
Ammaa hono no leɗɗe mawɗe coppaaɗe
keddodortoo e dubiile noon,
rubilde ndeen wilitan ƴuwdi ceniindi.
Currently Selected:
Esaaya 6: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
