Esaaya 5
5
Jimol ngesa inabooje nga Joomiraaɗo
1Accee mi yimana yigoo am,
jimol jiɗaaɗo ngol yimani ngesa muuɗum inabooje.
Yigoo am oon na woodunoo ngesa inabooje
dow leydi lobbiri ndimoori.
2O urgiti leydi magga, o itti kaaƴe.
O tiirii leɗɗe ɓurɗe wooɗude.
O nyiɓi suudu toowndu reenirdu hakkunde magga.
O wasi luggere to inabooje ɗeen ɓoosetee.
Imo heɗinoo nga riman ɓiɓɓe inabooje.
Ammaa nga rimii ɓiɓɓe luuɓuɗe.
3Joonin kaa, onon jooɗiiɓe Urusaliima, onon yimɓe Yahuuda,
caree hakkunde am e ngesa am inabooje ngaan.
4Yalla miɗo waawunoo waɗande ngesa am inabooje ngaan
ɓura ko ngaɗanmi nga ɗuum naa?
Miɗo miilunoo mi heɓan inabooje lobbe,
de ko saabii de nga rimi ɓiɓɓe luuɓuɗe?
5Joonin kaa mi hollan on ko ngaɗanmi ngesa am inabooje ngaan.
Mi ɗoofan kohogol magga faa nga nyaamee.
Mi waɗan jule e kokuwol magga faa nga yaaɓee.
6Mi waɗan nga laatoo winnde.
Nga sarsataake, nga urgitantaake katin.
Tuppe e gi'e mawnan ley magga,
de mi yamira duule taa fay waadere tokkoo dow magga.
7Tawi lee, ngesa inabooje Joomiraaɗo Jom Kammu e Leydi ngaan,
wo suudu Israa'iila.
Leggel ngel o horsinnoo ngeel,
wo yimɓe Yahuuda.
Imo heɗinoo ngel waɗan ko dartii.
Ammaa inan wo war-hoore tan!
Imo miilinoo ngel waɗan ko fonnditii,
de inan wo nyonaali tan.
Haala kuɗdiiji jeegom neldaaɗi dow mawɓe Yahuuda
8On mbonii, onon jokkondirooɓe suudu e suudu,
onon ɓeydooɓe ngesa e ngesa,
faa inan onon tan on nyaamidii njaayri fuu!
Nokkuure fuu walanaa goɗɗo ley leydi ndii katin!
9Inan konngol Joomiraaɗo Jom Kammu e Leydi ngol nanumi:
Sikke walaa cuuɗi maɓɓe ɗuuɗɗi ɗiin kalkete.
Galleeji mawɗi ŋarɗinaaɗi ɗiin fuu jeewnan.
Sabo woodoytaa jooɗotooɗo e majji.
10Fay ngesa inabooje nga ga'i 20 ndemata
ɓurataa liitereeji inaboojam 50.
Wooɗi du aawuɗo kilooje alkamaari 100,
taƴataa ko ɓuri kilooje sappo.
11Bone woodanii hejjooɓe na ummoo gilla subaka faa piloo doro,
e heddotooɓe faa jennga na njiiltoo saabe inaboojam.
12Hoddu e geegineeru, mbaggu e sereendu
e inaboojam na ɗowta yewto maɓɓe.
Ammaa ɓe taykataako ko Joomiraaɗo waɗi.
Ɓe nji'ataa golle juuɗe muuɗum.
13Saabe ɗuum de yimɓe am nanngete njaaree leydi ngondi.
Sabo ɓe ngalaa anndal.
Tedduɓe ɓeen maayan rafo.
Jamaare mawnde ndeen du, yooran ɗomka.
14Ndeen janaale omtan kunnduɗe muɓɓen faa njaaja,
e konoli muɓɓen faa happa
faa tedduɓe e jamaare yimɓe ɓolɓe ɓeen fuu
njippodoo toon e olko e weltaare muɓɓen.
15Ɓii-Aadama leeƴinte.
Tagaaɗo jippinte.
Mawnitiiɓe cemtan.
16Joomiraaɗo Jom Kammu e Leydi oon manete nyannde sariya.
Laamɗo Ceniiɗo oon holliran senaare muuɗum ndeen e fonnditaare.
17Baali nduran nder bille ɗoon hono durduɗe muɓɓen.
Yananɓe njeytan nokkuuje jom'en jawdi.
18Bone woodanii ɓe miilooji muɓɓen fewreeji kaɓɓondiri ɗum'en e hakkeeji,
ɓe lutti piɓondiri e muɓɓen hono callali torkooru,
19de na mbi'a:
O waɗa law!
O waɗa ko o waɗata ɗuum law law faa nji'en!
Ko Ceniiɗo Israa'iila oon fodii waɗude ɗum laatoo faa paamen!
20Bone woodanii wi'ooɓe ko boni na wooɗi,
ko wooɗi du, wo bone,
waɗooɓe nimre annoora muɓɓen,
annoora du nimre muɓɓen.
Waylitooɓe ko haaɗi laatoo ko noosii,
ko noosii du laatoo ko haaɗi.
21Bone woodanii miiliiɓe na caahii,
ndaarduɓe ko'e muɓɓen wo jom'en anndal!
22Bone woodanii mantortooɓe yarude inaboojam
e mantortooɓe waawude jillondirde doro.
23Iɓe njoofa pelniiɗo saabe buuɗi muuɗum
de iɓe ɗala ponnditiiɗo goonga ley sariya fewreejo.
24Saabe ɗuum de hono no ɗemngal yiite nyaamirta huɗo,
hono no nyoomal paɗɗaangal e yiite huɓɓirta noon,
wo hono noon ɗaɗi maɓɓe nyolirta,
pinndi maɓɓe du, wo noon henndu ruuynirta ɗum.
Sabo ɓe paɗɗii sariya Joomiraaɗo Jom Kammu e Leydi,
ɓe mbonkake konngol Ceniiɗo Israa'iila.
25Saabe ɗuum de tikkere Joomiraaɗo huɓɓani yimɓe muuɗum.
O fortii junngo makko, o fiiyi ɓe.
Baamle na ndiwna,
maayɓe na keewi hakkunde laawi hono mbuuwdi.
Ammaa e noon fuu, tikkere ndeen nyifay,
junngo makko ngoon du na heddii dow maɓɓe.
Haala janoowo mo fay gootum waawaa darnude
26Joomiraaɗo darnanii lenyi boɗɗuɗi darapo.
O wuccake lenyol gootol faa keerol leydi,
ngol yottii law, ngol yottodii e har-haro.
27Walaa fuu tampuɗo hakkunde worɓe makko.
Fay gooto fergaaki.
Fay gooto ŋoŋay sakko ɗaanoo.
Fay gooto haɓɓitaay kaɓɓorgol e seega muuɗum.
Fay ɓoggi paɗe kaɓɓitaaka.
28Kure makko ceeɓinaama.
Ɓaaruuji makko cegilaama.
Peɗeeli pucci makko na nga'i hono kaaƴe.
Taare torkooji makko na nanndi e duluuru mawndu.
29Kuuɓaali makko na nanndita e laddeeru.
Imo ubba hono laddeeru jokoldu.
Indu ŋuura, indu nannga ko ndu riiwata ndu yaara nokkuure suuɗiinde
to fay gooto warataa danna ɗum.
30Nyannde ndeen riggaango riggoto dow maɓɓe
hono no maayo riggortoo.
Yimɓe ndaaran leydi ndiin,
tawa wo nimre e kullol manngol.
Jayngol suddirte duule niɓɓuɗe.
Currently Selected:
Esaaya 5: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
