Esaaya 48
48
Noddaango, pelooje e aadiiji dow Israa'iila
1Kettindee, onon suudu Yaakuuba,
onon noddirteeɓe innde Israa'iila,
ƴuuruɓe e aawdi leydi Yahuuda,
onon hunortooɓe innde Joomiraaɗo,
du'ortooɓe Laamɗo Israa'iila,
tawee lee, on ngaldaa e goonga e fonnditaare!
2Onon noddirteeɓe yimɓe galluure seniinde,
mantortooɓe heɓude mballa Laamɗo Israa'iila,
bi'eteeɗo Joomiraaɗo Jom Kammu e Leydi oon!
3Mi haalii ko waɗunoo gilla ko ɓooyi.
Ɗum wurtake e hunnduko am.
Mi gooynanii ɓe ɗum.
Wakkati gooto ngaɗumi ɗum,
de ɗum tabiti.
4Miɗo anndi a cattuɗo,
hoore maaɗa na yoori hono sawru njamndi ɓaleeri,
daande maaɗa du hono njamndi mboɗeeri.
5Mi haalaniino on ɗum gilla ko ɓooyi.
Mi hollii on ɗum gilla ɗum waray,
taa mbi'on:
Wo tooru am waɗi ɗum.
Wo natal am maa tooru tafaandu nduun yamiri ɗum.
6A nanii! Ndaar ɗum fuu!
Yalla on mbaawaa hollude ɗum naa?
Gilla joonin miɗo humpita on kulle kese,
kujje cuuɗanooɗe ɗe on anndaano.
7Wo joonin ɗum tagaa,
wanaa gilla ko ɓooyi.
Wo joonin pay ɗum tabiti.
Faa warde hannden a nanayno faa'e sakko mbi'aa:
Miɗo anndunoo ɗum!
8A nanayno faa'e,
a faamayno faa'e
nowru maaɗa nanayno faa'e.
Sabo miɗo anndunoo a jammbotooɗo,
wooɗi du aɗa noddiree muurtuɗo
gilla e reedu inna maaɗa.
9Saabe teddeengal innde am de mi darnan tikkere am.
Saabe manooje ɗe njeyumi teddinireede ɗeen
de nanngitiimi e dukkuru am nduun taa mi halke.
10Inan, mi rimɗinirii ma e yiite,
de wanaa hono no cardi laaɓinirtee noon.
Ammaa wo nder wahilde torraaji ndimɗinirmi ma.
11Si mi waɗirii ɗum noon fu,
wo saabe am ngaɗirmi ɗum.
Noy acciranmi innde am huyfinee?
Mi hokkataa teddeengal am goɗɗo!
12Hettinanam, aan Yaakuuba,
aan Israa'iila mo noddumi!
Wo miin, ayyo miin woni arandeejo,
wo miin woni cakitotooɗo.
13Wo e semmbe juuɗe am njoƴƴinirmi leydi.
Wo e baawɗe am mbeertirmi kammu.
Si mi noddii kujje ɗeen fu,
ɗe fuu ɗe ngaran, ɗe ndaroo yeeso am.
14Onon yimɓe fuu, kawritee de kettinoɗon!
Moy e hakkunde tooruuji maɓɓe waɗi annabaaku dow majjum?
Mo Joomiraaɗo yiɗi oon waɗan Baabiila ko muuyi fuu.
Semmbe muuɗum saaman dow Kaldiyankooɓe.
15Wo miin, ayyo, miin tan wi'i noon.
Mi noddii mo,
mi waddii mo,
golleeji makko du ngaɗan barke.
16Ɓattee kam de kettinoɗon!
Gilla fuɗɗoode mi haaliray e cuncukka.
Gilla fuɗɗoode huunde fuu miɗo tawanoo.
Joonin du, wo Laamɗo Joomiraaɗo neliri kam e Ruuhu muuɗum.
17Inan ko Joomiraaɗo, dimɗinoowo ma, Ceniiɗo Israa'iila oon wi'i:
Miin Joomiraaɗo, Laamɗo maaɗa, mi jannginte ko laatante nafaa.
Mi ɗowete dow laawol ngol ndewataa.
18Aa, si tawiino a kettinantooɗo jamirooje am!
Jam maaɗa laatotono hono maayo.
Fonnditaare maaɗa du, hono bempeƴƴe maayo.
19Ƴuwdi maaɗa ɗuuɗanno hono njaareendi,
taaniraaɓe maaɗa du hono gabbe njaareendi.
Inɗe maɓɓe ittataakeno, ɓe lallataano yeeso am.
20Mburtee Baabiila!
Ndillee hakkunde Kaldiyankooɓe!
Ngooynoree ɗum e ilinaali e seyo!
Ngaɗee kabaaru nduun nanee!
Njaaree haala majjum faa keeri leydi fuu, mbi'on:
Joomiraaɗo rimɗinii Yaakuuba, maccuɗo muuɗum!
21Ɓe ɗomɗayno ley ladde yoornde to o yaarunoo ɓe toon.
O wubbiniino ndiyam e tefaare faa ɓe njara.
O fecciino hayre de ndiyam wubbi e muuɗum.
22Joomiraaɗo wi'i: Jam walanaa bonɓe.
Currently Selected:
Esaaya 48: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
