Esaaya 47
47
No Baabiila laatortoo winnde
1Jippa, mappoɗaa e sollaare, aan Baabiila surbayel!
Jooɗa e leydi, wanaa dow jooɗorgal laamu,
aan ɓii Kaldiyanke debbo!
A noddirtaake baggo jom ŋari katin.
2Hooƴu niisirde, niisaa conndi,
cudditoɗaa lefol maaɗa,
nyobbaa tonndu saayo maaɗa,
faa hewta buse de peƴƴaa maayooji.
3Ɓanndu maaɗa ɓoldu nduun yi'ete.
Yimɓe fuu nji'an semteende maaɗa.
Mi yoɓtanto hoore am,
mi accataa fay gooto darna kam.
4Dimɗinoowo en oon innde muuɗum wo Joomiraaɗo Jom Kammu e Leydi,
wo Ceniiɗo Israa'iila!
5Jooɗa siw, naataa ley nimre,
aan ɓii Kaldiyanke debbo.
A noddirtaake Kaananke debbo katin.
6Mi tikkaniino lenyol am ngool,
mi huyfiniino ndonngu am nguun
de ngattunoomi ɗum'en e juuɗe maaɗa.
Ammaa a yurmaaki ɓe.
A ronndii nayeeɓe donngal teddungal jim.
7Aɗa wi'annoo: Mi jooɗoto dow jooɗorgal laamu faa abada!
A miiltaaki dow majjum ɗum fuu,
a miilaaki ko waroyta!
8Joonin kaa, hettina haala kaa,
aan debbo keewɗo mbelirka yonki,
jooɗiiɗo e jam,
miilotooɗo ley ɓernde muuɗum na wi'a:
Miin, nannduɗo e am fuu walaa!
Abada mi laatataako maayraaɗo gorum,
abada mi anndataa maayreede ɓiɓɓe!
9Kulle ɗiɗi ɗeen fuu kewtete wakkati gooto, nyalaande wootere:
Maayreede ɓiɓɓe e goriyo fuu.
Ɗum fuu ɗum saaman dow maaɗa
kanjum e torra majjum fuu
fay e taweede aɗa heewi ndaggadaaku
e tiimngal e sukunyaaku.
10A wattiino hoolaare maaɗa e golle bonɗe ɗe ngaɗataa ɗeen.
Aɗa wi'annoo: Fay gooto yi'ataa kam.
Faamu maaɗa e anndal maaɗa ngaal piirtii hoore maaɗa,
faa aɗa wi'annoo ley ɓernde maaɗa:
Miin, nannduɗo e am fuu walaa!
11Masiiba hewtete gilla a faamay isilam muuɗum.
Bone saaman dow maaɗa, tawa a waawaa darnude ɗum.
Torra ukkete wakkati gooto, tawa a waawataa hisude ɗum.
12Ndelle heddoda e ndaggadaaku maaɗa,
ɗuuɗnaa tiimle ɗe tampinirtaa hoore maa gilla cukaaku maaɗa ɗeen.
Na hasii a heɓan nafaa majjum!
Na hasii ɗum waɗan kuleɗaa!
13A tampii e filaade tindinooje!
Ndelle tiimooɓe koode kammu ɓeen ummoo de kisine.
Ɓe taykoo koode kammu kollooje ɓe ko hewtoyte jaango
fodde ko hiisotooɓe lebbi kollata.
14Ɓe laatoto hono huɗo yoorko.
Yiite nyaaman ɓe.
Ɓe mbaawataa daɗude lewngol yiite ngeen.
Wanaa yiite duppirge buuru,
wanaa yiite ƴuulorge.
15Noon laatorantoo ɓe tampannoɗaa e timnude to muɓɓen ɓeen.
Ɓe ngaɗdannoɗaa e muɓɓen cogguuji gilla cukaaku maaɗa ɓeen fuu njay-yaytan,
mono fuu e laawol muuɗum.
Kisindam walanaa ma!
Currently Selected:
Esaaya 47: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
