Esaaya 39
39
Haala no Esekiya jaɓɓorii nelaaɓe Baabiila
(2 Kaanankooɓe 20:12-19)
1Wakkati oon, Merodak-Baladan ɓii Baladan kaananke Baabiila neldi Esekiya ɓataakiiji jowtiiru e dokkal saabe ko nani o nyawiino de o daɗi ɗuum. 2Esekiya seyii saabe maɓɓe de holli ɓe jawdi ndesaandi ley laamordu muuɗum fuu. Ɗum woni kaŋŋe e cardi e nebbeele lobbe e ure e kaɓitirɗe e ko resaa ley cuuɗi makko fuu. Walaa fuu ko o hollaay ɓe ley laamordu e ley jeyal laamu makko.
3Ndeen annabi Esaaya wari to kaananke Esekiya wi'i ɗum:
— Toy yimɓe ɓee ƴuuri, ɗume ɓe mbi'i ma? Esekiya jaabii wi'i:
— Ɓe ƴuurii to woɗɗi sanne, faa leydi Baabiila, faa ɓe nji'a kam. 4Esaaya ƴami o wi'i:
— Ɗume ɓe nji'i ley suudu maaɗa? Esekiya jaabii wi'i:
— Mi hollii ɓe huunde fuu ko woni ley suudu am. Walaa fuu ko cuuɗumi ɓe ley jawdi am. 5Ndeen Esaaya wi'i mo:
— Hettina ko Joomiraaɗo Jom Kammu e Leydi wi'i: 6Nyalaande finowan nde jawdi ngondi ley suudu maaɗa fuu ɓoɓtetee yaaree Baabiila, gilla ndi maamiraaɓe maaɗa pagginoo faa warde hannden. Fay gootum heddataako. Noon Joomiraaɗo wi'i. 7Ɓiɓɓe maaɗa, ɓiɓɓe wurtiiɓe e reedu maaɗa nanngete njaaree ley laamordu Baabiila. Toon ɓe coortetee de ɓe laatoo gollanooɓe kaananke Baabiila. 8Ndeen Esekiya jaabii Esaaya wi'i:
— Konngol Joomiraaɗo ngool kaaluɗaa ngool na wooɗi. O ɓeydi o wi'i: Sabo jam e ndeenaagu ngaɗan haddi balɗe am fuu.
Currently Selected:
Esaaya 39: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
