Esaaya 38
38
No Esekiya danniraa e nyawu maayde
(2 Kaanankooɓe 20:1-11)
1Ley balɗe ɗeen, Esekiya nyawi nyawu saate. Annabi Esaaya ɓii Amot wari wi'i mo:
— Inan ko Joomiraaɗo wi'i: Segilaa, njoppidaa koreeji maaɗa e konngol sabo nyawu ngu yoppataa ma.
2Ndeen Esekiya waylitii hucciti e maadi suudu de waɗi du'aaw to Joomiraaɗo. 3O wi'i:
— Yaa Joomiraaɗo, miɗo ŋaare miccitoɗaa ko mi wuurdii yeeso maaɗa e hoolnaare e laaɓal. Mi waɗii ko wooɗi yeeso maaɗa. Ndeen o wulli bojji cattuɗi. 4Wakkati oon konngol Joomiraaɗo wari e Esaaya, wi'i:
— 5Yahu mbi'owaa Esekiya: Inan ko miin Joomiraaɗo, Laamɗo bammaa Daawda mbi'umi: Mi nanii du'aaw maaɗa, mi yi'i gonɗi maaɗa du. Ndelle mi ɓeydante duuɓi 15. 6Mi dannete e junngo kaananke Asuura, aan e galluure ndee fuu. Mi reenan galluure ndee. 7Inan maande nde Joomiraaɗo hokkete faa paamaa ko tabintinan ko wi'i ɗuum: 8Mi waɗan ɗoogi soƴƴoroo caggal happa piyanɗe sappo dow jaaɓirɗe ɗe Akas nyiɓunoo.
Ndeen naange yeccorii gaɗa happa jaaɓanɗe sappo ɗe jipporinoo ɗeen.
9Inan ko Esekiya kaananke Yahuuda winndi wakkati nyawunoo de daɗi ndeen:
10Miɗo miilonoo, miɗo wi'a:
Inan miɗo taƴee e duuniyaaru gilla wakkati am waray.
Miɗo feccita dammbuɗe laahara.
Mi ɗalaama duuɓi keddaninooɗi kam ley duuniyaaru.
11Mi wi'iino: Mi yi'ataa Joomiraaɗo ley leydi wuurɓe katin.
Ɓii-Aadama fuu muuynataako kam hakkunde jooɗiiɓe ley adunaaru katin.
12Mbeelu am ɗoofaama woɗɗinaama e am,
hono no hukum duroowo ɗoofirtee sottinee noon.
Miɗo fiilondira yonki am hono fiilde canyoowo.
Yaa Joomiraaɗo, a riiwii kam.
Hakkunde subaka yaade futuro, tawan a halkii yonki am.
13Mi fukkinii hakkillo am faa subaka,
ammaa Joomiraaɗo helii ƴi'e am fuu hono no laddeeru waɗirta noon,
Hakkunde jemma yaade nyalooma, tawan a halkii yonki am.
14Miɗo siiɓa hono ciicaɓalaaru,
miɗo uuma hono wuugaandu.
Mi jurminiiɗo, gite am na ndaara faro kammu, miɗo wi'a:
Joomiraaɗo, mi torraama, wallam!
15Ɗume mbaawumi wi'ude?
O anniyake wooɗi du o waɗan ɗum,
Mi wuurdan e leeƴinkinaare haddi duuɓi am fuu,
saabe mettorgal gonngal e am.
16Yaa Joomiraaɗo, wo saabe moƴƴere maaɗa de yimɓe na mbuuri,
wo saabe mayre de miɗo foofa faa joonin.
A dannan kam, a wartiran yonki am.
17Inan, mettorgal ɓernde am ngaal waylitorake jam.
A hinnake kam, a hisinii kam e saabeere,
a faɗɗii hakkeeji am fuu gaɗa maaɗa.
18Sabo wanaa laahara manete,
wanaa maayde yettete.
Jippiiɓe ley laahara ɓeen ngalaa jikke dow hoolnaare maaɗa katin.
19Wo buurɗo, buurɗo tan woni baawɗo yettude ma
hono no ngaɗammi hannden ni.
Baabiraaɓe anndinan ɓiɓɓe muɓɓen haala hoolnaare maaɗa.
20Joomiraaɗo hisinii kam.
Min piyan munkaruuji amin ley suudu Joomiraaɗo,
haddi balɗe amin fuu.
21Tawi Esaaya wi'iino: Ngaddee tamre ƴibbe joorɗe de mbujon dow ɓuuye ɗeen. Ndeen kaananke daɗi. 22Esekiya ƴamiino wi'i: Maande ndeye hollata kam ko miɗo waawi yaade suudu Joomiraaɗo?
Currently Selected:
Esaaya 38: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
