Esaaya 26
26
Jimol galluure semmbiɗinde
1Nyannde ndeen jimol yimete ley leydi Yahuuda wi'ee:
Na en ngoodi galluure semmbiɗinde.
Joomiraaɗo hisinirii en e kokuuji deenirɗi.
2Omtee dammbuɗe
faa lenyol ponnditiingol ngool naata,
lenyol koolniingol ngool naata!
3Yaa Joomiraaɗo, aɗa hokka mo walaa sikki-sakka to maaɗa jam kiɓɓuɗo,
sabo imo watti hoolaare makko e maaɗa.
4Koolee Joomiraaɗo faa abada
sabo Joomiraaɗo woni tefaare duumiinde.
5O liɓii jooɗinooɓe dow nokkuuje toowɗe.
O doƴƴii galluure toownoonde.
O liɓii nde e leydi.
O tallitii nde e mbuɗlarga.
6Koyɗe talkaaɓe njaaɓan nde e leydi,
kam'en e lokkaaɓe fuu.
No yimɓe ngattiri jikke muɓɓen e Joomiraaɗo
7Laawol laaɓuɗo na dartii.
Aan ponnditiiɗo, aɗa moƴƴinana mo balangol dartiingol.
8Yaa Joomiraaɗo, wo aan min koolii fodde laawi jamirooje maaɗa.
Noddugol innde maaɗa woni ko ɓuri welude ɓerɗe amin.
9Ley jemma, miɗo haajaa ma,
miɗo filore e ɓernde am fuu,
sabo nde kiite maaɗa caami ley duuniyaaru fu,
yimɓe adunaaru fuu annditan fonnditaare maaɗa.
10Ammaa si bonɗo waɗanaama moƴƴere fu,
o anndataa ko laatii fonnditaare.
O waɗan ko fonnditaaki ley leydi ngaɗoori ko dartii.
O hakkilantaa manngu Joomiraaɗo.
11Yaa Joomiraaɗo, junngo maaɗa na ɓantii
de yimɓe nji'ataa ngo.
Ammaa ɓe cemtan nde ɓe nji'owi no kiram maaɗa mawnirani yimɓe maaɗa noon.
Noon yiite nyaamirta wayɓe maaɗa.
12Yaa Joomiraaɗo, aɗa hokka min joonde e jam.
Ko min ngaɗata fuu wo aan waɗanta min ɗum.
13Yaa Joomiraaɗo, Laamɗo amin,
joomiraaɓe woɓɓe ndawraniino min,
ammaa wo innde maaɗa aan tan mi noddannoo.
14Maayɓe mbuurataa katin.
Ɓe yonkiiji muɓɓen ndilli, njeccataako.
Noon ummoriɗaa kalkuɗaa ɓe.
Ngaɗuɗaa taa ɓe miccitee katin.
15Yaa Joomiraaɗo, a mawninii lenyol!
A mawninii lenyol, a teddinii innde maaɗa.
A yaajinii keeri leydi ndiin.
16Yaa Joomiraaɗo, wo aan ɓe pilii wakkati ɓillaare,
nde eeltunoɗaa ɓe ndeen.
Iɓe coononoo, iɓe ndu'oroo e innde maaɗa.
17Hono no debbo ŋanwuɗo uumirta naawalla wakkati ɓeyngu noon,
wo noon min ngoori yeeso maaɗa, yaa Joomiraaɗo!
18Minen du, min ndimii, min naawaama,
ammaa ko min ndimi ɗuum wo henndu tan.
Min ngaddanay duuniyaaru kisindam,
min kokkay adunaaru yimɓe heyɓe.
19Onon yimɓe am, maayɓe mooɗon mbuura katin!
Ɓalli maɓɓe ummoo ndaroo!
Ummee de kuuɓon kuuɓaali seyo,
onon fukkiiɓe ley sollaare!
Sabo saawoore maaɗa wo saawoore annoora.
Leydi du wurtinan uwaaɓe e muuɗum.
20Yimɓe am, kootee wuro mooɗon,
ommbon dammbuɗe mooɗon.
Cuuɗoɗon wakkati seeɗa faa nde tikkere Joomiraaɗo ndeen feewowi.
21Sabo inan Joomiraaɗo na wurtoo ley suudu muuɗum
faa hiitoo yimɓe adunaaru fodde lutti muɓɓen.
Leydi hollan ƴiiƴam ndufaaɗam.
Ndi suddataa waraaɓe ɓeen katin.
Currently Selected:
Esaaya 26: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
