Esaaya 24
24
Haala wemmbere e mettorgal ley duuniyaaru
1Inan Joomiraaɗo na fiɗɗa duuniyaaru, na waɗa ndu laatoo winnde.
Imo yinnga leydi, imo sankita jooɗiiɓe e mayri.
2Ko hewtii Almaami'en hewtoto yimɓe ɓolɓe.
Ko hewtii jom wuro, hewtoto maccuɗo muuɗum.
Ko hewtii inna suudu, hewtoto korɗo muuɗum.
Ko hewtii connoowo hewtoto coodoowo,
Ko hewtii nyamlaaɗo hewtoto nyamliiɗo
Ko hewtii kokkuɗo nyamaande hewtoto njoɓoowo ɗum du.
3Leydi fuu halkete de jawdi muuɗum fuu yanee faa laaɓa,
fodde no Joomiraaɗo wi'iri.
4Mbeɗu leydi ɗaylii, yoorii.
Duuniyaaru fuu ɓeeɓii, ndu halkii.
Yimɓe woodunooɓe teddeengal fuu ɗaylii.
5Jooɗiiɓe ley duuniyaaru tuuninii ndu
sabo lunndake jamirooje,
bonkake sariyaaji,
mbonnii amaana duumiiɗo oon.
6Wo saabe ɗuum de kuɗdi na nyaama duuniyaaru.
Jooɗiiɓe e mayru na njoɓa hakkeeji muɓɓen.
Wo saabe ɗuum de jooɗiiɓe dow mbeɗu leydi na mbulee
faa na keddii yimɓe seeɗa tan.
7 Inaboojam kesam ɗaam hoortan.
Leɗɗe inabooje ɗaylan.
Wondunooɓe e seyo fuu uuman.
8Welwelo iido bawɗi accitan.
Olko ilinaali daaƴan.
Daande geegineeru welndu selan naneede.
9Inaboojam accitan yarireede e jimi.
Doro laatanto yarooɓe ɗum ko haaɗi.
10Galluure jirgitiinde ndeen fusaama.
Cuuɗi mayre fuu ommbaama,
ɗi naatataake katin.
11Yimɓe na mboya dow laawi
saabe rafi inaboojam.
Mbelɗum fuu walaa katin.
Seyo dillii ley leydi ndiin.
12Galluure ndeen laatake winnde,
dammbuɗe mayre pusaaɗe ɗeen laatake joorde.
13Noon ɗuum laatortoo ley duuniyaaru, hakkunde lenyi.
Ɗum wa'an hono nde ɓorugol jaytun timmi
de yimɓe na camma ko hedditii e licce ɗuum.
14Ɓe ɓantan daaɗe, ɓe ilinoroo seyo,
ɓe mana teddeengal Joomiraaɗo gilla gorgal.
15Joomiraaɗo teddinte faro lettugal.
Innde Joomiraaɗo, Laamɗo Israa'iila manete ley leyɗe hakkunde maayooji.
16Eɗen nana jimi gilla tatteeji leydi nay ɗiin fuu
na mbi'a: Teddeengal woodana ponnditiiɗo!
Ammaa miin miɗo wi'iitoo:
Mi lallii! Mi lallii!
Kaari, mi bonii!
Jammbuuɓe njammbake.
Jammbu! Jammbuuɓe njammbake.
17Onon jooɗiiɓe ley duuniyaaru,
wo kulol manngol e luggere e tuugol ngoni ngeɗu mooɗon.
18Dogguɗo olko kulol manngol, saaman ley luggere.
Baawɗo wurtii e luggere ndeen du, saaman e tuugol,
sabo kammuuli omtake
tiigorɗe leydi na ndimmboo.
19Leydi seekake ceer, ndi haƴƴii kaw,
ndi dimmborake e semmbe.
20Leydi na luuloo hono no culiiɗo yaarata,
indi yinngoo hono no henndu yinngirta luuduuru.
Hakkeeji mayri nyoƴƴii ndi,
ndi saamii de ndi waawaa ummitaade katin.
21Nyannde ndeen Joomiraaɗo ummanto konunkooɓe kammuuli dow kammu.
O haɓdan e kaanankooɓe ley duuniyaaru du.
22Ɓe kawrondinte hono kasunkooɓe ley luggere,
ɓe ommbete ley suudu kasu
de ɓe kiitee caggal nyalaaɗe ɗuuɗɗe.
23Lewru suuɗoto, naange niɓɓan,
sabo Joomiraaɗo Jom Kammu e Leydi oon wo kaananke dow waamnde Siyona ley Urusaliima
wooɗi du, teddeengal makko ɓangan yeeso ɓe o hokki baawɗe ardaade ɓeen.
Currently Selected:
Esaaya 24: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
