Esaaya 23
23
Annabaaku dow ko hewtotoo Tiir e Sidon
1Annabaaku dow ko hewtotoo galluure Tiir:
Kuuɓee, onon laanaaji ndiyam Tarsis
saabe galluure ndeen halkaama.
Suudu fuu heddaaki, naarude fuu walaa.
Wo gilla leydi Kittim ɓe paami ɗum.
2Matee kulol, onon jooɗiiɓe daande maayo,
luumtotooɓe leydi Sidon, seekooɓe maayo.
3Ko aawetenoo daande Nil e ko taƴetenoo piilol Sihor na laataninoo Sidon nafaa.
Galluure ndeen na laatinoo luumorde leyɗe.
4Semteende woodane, aan Sidon
sabo inan ko maayo wi'i,
maayo semmbiɗingo haalii wi'i:
Mi maatay naawu ŋatawere, mi rimay.
Mi mawninay jokolɓe.
Mi bammbay surbaaɓe.
5Nde kabaaru ko hewtii Tiir ɗuum yottowii leydi Misira fu diwnan.
6Njehee Tarsis, kuuɓee,
onon jooɗiiɓe dow daande maayo!
7Yalla ɗoon woni galluure mooɗon nde seyo naa?
Galluure hinnde genuure
nde yimɓe muuɗum njahannoo faa to woɗɗi.
8Yalla moy anniyii waɗude Tiir,
galluure hokkannoonde kufuneeje laamu ndeen ko boni?
Galluure nde luumtotooɓe muuɗum laatinoo ɓiɓɓe laamu,
nde sonnooɓe muuɗum laatinoo tedduɓe ley duuniyaaru!
9Wo Joomiraaɗo Jom Kammu e Leydi anniyii ɗum,
faa halka ko laatii mawnitaare, ko fooɗata teddeengal fuu
de leeƴina ndaardaaɓe mawɓe ley duuniyaaru ɓeen.
10Aan Tarsis, surbayel, remu leydi maaɗa,
waɗu hono no Misirankooɓe ngaɗi daande maayo Nil,
sabo luumo Tiir timmii.
11Joomiraaɗo foortii junngo muuɗum dow maayo,
o waɗii laamuuji ndimmbake,
o yamirii galluuje leydi Kanaana cemmbiɗinɗe kalkee.
12O wi'i: Aan surbayel Sidon,
a heddataako aɗa seyoo katin, aan doolɗaaɗo oo!
Umma, njaha faro Kittim,
ammaa fay toon, a heɓataa powtiri.
13Ndaaru leydi Kaldiyankooɓe,
lenyol ngool innde muuɗum lalli.
Yimɓe Asuura ngaɗii leydi ndiin laatake nokku pobbi.
Ɓe ngaɗii masinaaji konu kalkii cuuɗi toowɗi
e deenirɗi cemmbiɗinɗi, faa laatii bille.
14Mboyee, onon laanaaji ndiyam Tarsis,
sabo Tiir, galluure mooɗon semmbiɗinde ndeen halkaama.
15Nyannde ndeen Tiir yeggitirte duuɓi 70, ko hawrata e duuɓi kaananke gooto tan. Caggal duuɓi 70 ɗiin, Tiir laatoto hono woykuuruujo jimanteeɗo na wi'ee:
16Hooƴu geegineeru, piiltoɗaa galluure
aan woykuuruujo jeggitaaɗo oo!
Hoɗu faa happa baawɗe maaɗa!
Yimu jimi ɗuuɗɗi faa micciteɗaa!
17Gaɗa duuɓi 70 ɗiin, Joomiraaɗo accan Tiir yeccoo e njoɓdi muuɗum tuundi ndiin. Nde waɗidan woykuuraaku e laamuuji duuniyaaru dow mbeɗu leydi fuu. 18Ammaa riiba muuɗum e njoɓdi muuɗum fuu cakkante Joomiraaɗo. Ɗum resataake, ɗum hawrondintaake ammaa ɗum laatanto jooɗiiɓe yeeso Joomiraaɗo ɓeen nyaamdu haarnooru e kolte tiiɗɗe coggu.
Currently Selected:
Esaaya 23: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
