Esaaya 13
13
No Joomiraaɗo hiitortoo Baabiila
1Annabaaku dow Baabiila fodde jiile Esaaya, ɓii Amot:
2Ndarnee darapo dow waamnde nde walaa faa'e dow muuɗum ndeen,
de peekoroɗon faro maɓɓe, oɗon njiila juuɗe,
faa ɓe naatira dammbuɗe yimɓe tedduɓe.
3Mi hokkii ɓe cuɓiimi de ceninmi ɓeen yamiroore.
Mi noddii sordaasiiɓe am sattuɓe,
huyanooɓe jaalorgal am ɓeen.
4Kettinee riggaango dow baamle
na nanndi e duko jamaare mawnde.
Kettinee olko leyɗe, lenyi kawritinɗi ɗiin!
Joomiraaɗo Jom Kammu e Leydi na hawrondina konunkooɓe muuɗum.
5Ɓe ƴuurii leydi mboɗɗundi,
faa keerol kammu.
Joomiraaɗo e kaɓitirɗe muuɗum kiitorɗe
ngaddanan leydi ndiin fuu naawalla mawɗo.
6Ɓantee daaɗe de mbullon mettorgal.
Sabo nyalaande Joomiraaɗo ndeen na ɓattoo.
Nde waran hono nyannde halkere jom semmbe.
7Saabe ɗuum de ɓalli fuu na mbaata,
mono fuu nesim na taƴa.
8Kulol manngol nanngii ɓe.
Kilemooƴooje e naawuuji ƴeenyii ɓe,
faa na ɓe ɓoyloo hono ŋanwuɗo.
Iɓe ndaarondira e taƴo taƴo,
geese maɓɓe na ɓalinii.
9Inan nyalaande Joomiraaɗo na wara,
nyalaande bone, nde mone e tikkere sattunde.
Nde waɗan leydi laatoo nokkuure yeewniinde.
O halkan waɗooɓe hakkeeji.
10Koode kammu e siyiiji kawrite koode kammu fuu
celan ɗelkinde annoora muɓɓen.
Naange niɓɓan gilla puɗal muuɗum.
Lewru du accitan waɗude leelewal.
11Joomiraaɗo wi'i:
Mi jukkoto adunaaru saabe bonde muuɗum.
Mi jukkoto bonɓe saabe war-hooreeji muɓɓen.
Mi nyifan mawnitaare ɓettiiɓe.
Mi semtinan torrirooɓe yimɓe e manngu becce.
12Mi waɗan yimɓe nde'a faa yi'ude ɓii-Aadama
ɓura kaŋŋe laaɓuɗo tiiɗude,
faa ɓura kaŋŋe Ofir horsude.
13Ɗuum waɗi de mi yeƴan kammu
de leydi dimmboo gilla joƴƴinirɗe muuɗum
saabe mone Joomiraaɗo Jom Kammu e Leydi oon
nyannde jippagol tikkere muuɗum nyaaɗunde ndeen.
14Ndelle ɓe nga'an hono lewla ndiiweteenga,
hono coggal ngal walaa duroowo,
mono fuu weeɗan to lenyol muuɗum.
Mono fuu doggiran leydi muuɗum.
15Tawaaɓe fuu njuwirte kure.
Nanngaaɓe fuu mbardete kaafaaje.
16Ɓikkoy maɓɓe ngarsete yeeso maɓɓe.
Jawdi maɓɓe yanete.
Rewɓe maɓɓe nanngirte doole.
17Mi umminanan ɓe Mediyankooɓe
ɓe killaaka e cardi,
ɓe kaŋŋe waannaay.
18Ɓeen cerkitiran ɓiɓɓe worɓe e kure.
Ɓe njoppataa fay ɓiɓɓe heccuɓe.
Ɓe ngalanaa sukaaɓe yurmeende.
19Noon laatorantoo Baabiila, laamu ɓurngu laamuuji fuu darja,
galluure teddunde nde Kaldiyankooɓe mawnitortoo ndeen
hono ko waɗunoo galluuje Sodoma e Gomora
ɗe Laamɗo halkunoo ɗeen.
20Abada nde waɗataa yimɓe katin.
Nde heddoto nde yeewniinde faa waɗa jamaanuuji.
Fay Laarabuujo darnataa hukum muuɗum toon,
durooɓe du, ƴuwtintaa cogge muɓɓen toon.
21Leeɗi pukkoto toon.
Ngooƴaaje keewan ley cuuɗi.
Ndawuuji ngonan toon.
Damɗi pittan na pijinoo toon.
22Leeɗi mbullan ley cuuɗi laamorɗi.
Baagaaji nootondiran ley galle mawɗe tedduɗe.
Wakkati majjum yottake!
Balɗe majjum ɓooyataa katin.
Currently Selected:
Esaaya 13: FBF
Highlight
Copy
Compare
Share
Want to have your highlights saved across all your devices? Sign up or sign in
© SIM International 2012, 2022
