Numera Nuarin-tas alupas 25.
Nuarin-tas alupas 25.
1 Era ago ingeijid im nedo apat a nup Isreel Sitim. 6 Et atgei Simrai im Kosbai a Finehas. 10 Et ati imi yin im ilpu mapon a Atua nauritai u ilpu atimi ahlap irai iji mesese. 16 Et ika a Atua eri atgei nup u Mitian.
1ERIS amen Sitim a nup Isreel, ja eris atupun natimi um ago ingeijid irai ilpu takata Moab.
2Eris imiacaij atimi ara mika eri apan ara u niji itai ahlap vai ilpu atmas ura: eris hag niji itai ahlap ura natimi, um atpuse an nuhup u iji atmasimai ura.
3Eris apol irai Beal-pior hal atimi u nup Isreel: is lep atavaitap a Ihova vai nup Isreel.
4Is ika a Ihova ehele Moses, Namu lucsei niji idjini ilpu atimi iji ig aiek eris apol irai Beal-pior, um alcinwara an nuhup u Ihova, um yetpan u nete u nagesega, va etpu tiih intavaitap alupas u Ihova vai nup Isreel.
5Is ika a Moses ehele ilpu atimi alupas u nup Isreel, Akumu atgei ilpu atimi unyimia eris apol irai Beal-pior aijaua asega, athi um athi ehni.
6Is lep han a nup Isreel is ethi, um imiapan intakata Mitian is ethi ehele ilpu etwan, an nuhup u Moses, im lep an nuhup u nup Isreel asega, eris wat ehtigtaig ara u neucse neom er asjapicnaig o un.
7Is wat almoi a Finehas, inhal u Eliesar, inhal u Eron natimi ahlap, is atidai aien an nuhup u atimi, um leh inmopul an nikman;
8is apitac natimi iyehki aien anliin neom umjeg iran, um ahcai nup Isreel iyehki im intakata iyehki, is tau an nipjinetgarau. Is lep tiih inmas irai up Isreel.
9Eris emesmas natimi is twente for dausant an mas iyehki.
10Is tas a Ihova ehele Moses, um ika,
11Is atipagki intavaitap unyak vai nup Isreel a Finehas inhal u Eliesar, inhal u Eron natimi ahlap, is emda aien vai nyak vai ki jim auahas ehni nup Isreel ainyak an nedemda unyak.
12Va nitai inigki namu asaig aiek mika, etpu amen ehelen intas etipup unyak va nasa nigpa:
13etpu amen ehelen, im ilpu hal o un, im ilpu mapon, intas etipup va nauritai u ilpu atimi ahlap irai iji mesese; is idim emda aien va nedo o Atua o un, um adahpoi nedo has u nup Isreel.
14Nidai nup Isreel iyehki eris atgei yin pan irai intakata Mitian, nan, Simrai, is hal u Selu aien, natimi alupas irai ilpu etwan, ilpu mapoi Simeon.
15Nidai intakata Mitian iyehki eris atgei yin, nan, Kosbai, inhalav atahig u Sur; is atimi alupas aien, im natimi esjilid irai ilpu etwan Mitian.
16Is tas a Ihova ehele Moses, um ika,
17Namu atijai nohocred irai up u Mitian aiek, um auud ra.
18Era imiedohalav caua ara an nedo efaifa ura, eris imiahnag caua iran ara an nedo iyehki vai Pior, im lep an nedo o Kosbai, inhalav atahig u natimi alupas is ethi Mitian, natahig ira ra, eris atgei yin an nopan mas iyehki vai Pior.
Currently Selected:
Numera Nuarin-tas alupas 25.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)