Numera Nuarin-tas alupas 24.
Nuarin-tas alupas 24.
1 Et udei nedo apat o un a Belam, um tup ispun asuptecnaig namen upene u nup Isreel. 10 Et edemda vai yin a Belak, um adcijai yin. 15 Et asan tas upyi asaig aien vai Inmoijeuv u Jekob, Kristo marom, im lep vai nauahas vaig u hal nup urai iji pece.
1Is wat almoi a Belam mika is upene irai Ihova par acis yi alwai nup Isreel, is eti apan aien, is idivaig itu, par ago nedo araces, ja is ahidaig pan yin u namasacen aien.
2Is eas a Belam, um ecetai namen vaig u niji ahaiji up Isreel; is yetpam iran a nesgai Atua.
3Is asan tas inig aien eris ahu iran, um ika, Et mun ika a Belam inhal u Bior, et mun ika a natimi inig er asalgei nesganimtan:
4et mun ika aien is atahaijeg intas o Atua aien, um almoi nitai is ehvaig ehelen a Atua emda acen, um ahuumtidec, jam alum itai:
5Et eklim upene niji eom atga unyimia, ak ilpu mapoi Jekob, im niji imnim unyimia, ak nup Isreel!
6Era apaahni ara et idivaig niji iskanse, um lep idivaig niji okoro an nohmun wai; um lep idivaig niji cai eaig is ahwaig a Ihova, um idivaig niji cai sitar ui wai.
7Erupu atladwi wai ara irai ipjiitai ura; erupu idivaig inwai alupas a ilpu mapora: etpu esjilid natimarid ura irai Ecac, etpu lep esjilid nelcau ura.
8Is iknipagki ra an pece Ijipt a Atua; et idivaig nemda u kurimatau aleg nemda ura: erupu auahas nup urai pece iji ig ara era tak atimi ira ra, um atgei ra, um ahcai ra irai idji efana ura.
9Era eropropse ara, um asjeucse, et idivaig laion, um lep idivaig laion alupas: etpu ahugni ra a di? Et mun ahesmoij a natimi inig et acis yi alwai caua aien, ja etpu erekinman iran aien et ahlaijai caua aien.
10Is atavaitap a Belak vai Belam, um ahpoi nikman: is ika a Belak ehele Belam, Kis imiacaij euc ainyak par ahlaijaig ilpu atimi tak atimi irak, ja na mun eceseij acis yi alwai ra aiek.
11Va nitai inigki namu ahapan aiek an nuarin unyum: kis ika ainyak ki imiaridjai euc ainyak, um ika eri ecen alupas vai euc; ja et mun atapnes euc a Ihova va an jim atimi alupas aiek.
12Is ika a Belam ehele Belak, Kis idim tas ainyak ehele ilpu aheca unyum as abraig pam ra aiek, mu ika,
13El et alupai nyak neom o un a Belak um ohua silver im colt iran, el et ehka vai nyak par imipalea intas o Ihova, um ispuk ago tah nitai upene ka tah nitai has; ja ekpu asaig intas inigki ainyak et asaig a Ihova.
14Ekpu idim apan ainyak ehele ilpu atimi unyak: ja ekpu asuptecnaig ehelum ainyak nitai iji igki erupu ago natimi iji igki vai ilpu atimi unyum an nopan iyehki itu.
15Is asan tas inig eris ahu iran aien, um ika, Et mun ika a Belam inhal u Bior; et mun ika a natimi inig er asalgei nesganimtan:
16et mun ika aien is atahaijeg intas o Atua aien, um ato narapakau o un et esjilid acen Aien, um almoi nitai is ehvaig ehelen a Atua emda acen, um ahuumtidec, jam alum itai:
17Ekmu ecetai ainyak ja an taka opan: ekmu alum itai ainyak ja et eti ubutpotet: etpu ahes irai ilpu mapoi Jekob Inmoijeuv inyi ethi, etpu lep aridjai a Natimarid inyi ethi irai up Isreel, um auud ilpu atimi alupas an pece Moab, um auahas ilpu atimi imipalea asega.
18Etpu ohuun inpece Itom aien, etpu lep ohuun inpece Sier aien, inpece u ilpu atimi tak atimi iran: erupu ago nedo emda a nup Isreel.
19Etpu ahes ehele Jekob tah um atimarid, etpu lep auahas ra sji igki aien era amen irai maliyum ura ara.
20Is almoi nup Amalek aien, um asan tas inig eris ahu iran, um ika. Eris esjilid a nup Amalek irai iji pece; ja uhpu idim auahas ehni ilpu mapora.
21Is lep almoi nup u Kinai aien, um asan tas inig eris ahu iran, um ika, Et ehka nuarin amen unyimia, eka amen an nij aijaua.
22Ja erupu asuol a nup u Kinai, um imihum pan an nopan iyehki erupu lucsei pan caua a nup Asiria an nedoa.
23Is asan tas inig eris ahu iran aien, um ika, Awe, etpu umoh a di etu wit ago nitai inigki a Atua!
24Etpu ahes an pece Kitim niji elcau, um ohrai nup Asiria, im lep ohrai nup u Hibru, ja uhpu lep auahas ehni ra.
25Is atidai a Belam um atga o un, um apan an nuarin pece o un: is lep atga o un a Belak.
Currently Selected:
Numera Nuarin-tas alupas 24.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)