Numera Nuarin-tas alupas 16.
Nuarin-tas alupas 16.
1 Nedo imipalea u Kora, Tedan, Abairam. 23 Et ika a Moses ehele atimi eri udei eom atga u ilpu atimi imipalea. 31 Et atleg Kora nobohtan, et auahas hal atimi et eche incap. 36 Er ikni ipjiitai ura mika yi itap. 41 Era emesmas an nemehe has natimi et fortiin dausant im seven huntret (14,700) vai intas ehti ura vai Moses. 46 Et atapnes inmas iyehki a Eron an nitai auanipin upene o un.
1ERIS lucsei atimi a Kora inhal u Ishar, inhal u Kohad, inhal u Livai, im Tedan im Abairam ohwat hal u Elaiab, im On inhal u Piled, ilpu mapoi Ruben:
2eris tiduari Moses ara, im lep hal irai up Isreel, nikavaig, ilpu atimi alupas is tu huntret im fifte (250), eris ato upene ra natimi, eris lep esjilid ara:
3eris asjapicnaig ara vai Moses im Eron, um ika ehele rau, Et idim ijinies inliinmopomirau aijaurau, era upene natimi asega; et lep amen a Ihova ehele ra: erau a uri aijaurau par ika erau esjilid aijaurau ira atimi u Ihova?
4Is atahaijeg a Moses, um eropse an nesganimtan:
5is tas aien ehele Kora im ilpu atimi ahced yin, um ika, Etpu aniv ilpu atimi o un imraig a Ihova, im ilpu atimi upene; um ika eri apan ubutpotet ehelen ara: etpu idim ika aien eri apan ubutpotet ehelen natimi iji igki etpu aniv ra aien.
6Ago nitai inigki aijaua; Akumu lucsei nipjiitai aijaua, ak Kora, im ilpu atimi ahced euc asega;
7um ati incap iran, um lep ati nitai auanipin upene iran an nuhup u Ihova imraig: ja etpu upene natimi inig etpu aniv yin a Ihova: eka ago nedo ijinies aijaua, ak ilpu mapoi Livai.
8Is tas a Moses ehele Kora, um ika, Ek ugyi caua ainyak, ak ilpu mapoi Livai, mika aki atahaijeg aijaua:
9et takitai iramia, mika is iknipagki caua irai up Isreel a Atua u nup Isreel, um ikni caua ubutpotet pan ehelen, par ago nauritai an neom itap u Ihova, um atidai an nuhup u atimi asega, um auanaheca vai ra, ka oʼo?
10Is ati euc ubutpotet pan ehelen aien, im ilpu etwam asega, ilpu mapoi Livai: na lep merit aiek par ago nauritai u ilpu atimi ahlap, ka oʼo?
11Va nitai inigki eka mun asjapicnaig aijaua asega vai Ihova: di nigki Eron mika aki asan tas has vai yin aijaua?
12Is abrai tah a Moses par ahlaig vai Tedan im Abairam, ohwat hal a Elaiab: ja erus ika arau, Ecru eti apam aijumrau:
13et eti tintin nedo has inigki mika as iknipagki cama aiek an pece is amen alupas nidenided im hune iran, um atgei cama an namasacen, na lep ika aiek na atimarid unyima aiek.
14As lep eti imiapan cama aiek an pece et amen alupas nidenided im hune iran, um eti alupai cama nuari obohtan im nokoro vaine mika ecri ohuun aijama: napu imiahnag natimi iji igki aiek, ka oʼo? ecrupu eti apam aijama.
15Is edemda alupas a Moses, um ika ehele Ihova, Jim aktaktai nitai ahlap ura: kis eti leh tah togke ura ainyak, um eti ago tah nitai has vaig tah ra.
16Is ika a Moses ehele Kora, Namu ehcohos pam an nuhup u Ihova aiek, im ilpu atimi apol iram asega, im lep Eron, imraig:
17erumu apos nipjiitai ura natimi asega, athi um athi ehni, um ati nitai auanipin upene iran, erumu imiapam nipjiitai ura an nuhup u Ihova natimi asega, nipjiitai inyi tu huntret im fifte; arumu lep imiapam nipjiitai unyimirau aijaurau, aiek im Eron.
18Eris lucsei nipjiitai ura natimi asega, um ati incap iran, um atijai nitai auanipin upene iran, um aiji an neucse neom er asjapicnaig o un ehele Moses im Eron.
19Is asjapicnaig atimi asega vai rau a Kora an neucse neom er asjapicnaig o un: is lep ehcohos pan naijorai Ihova ehele atimi asega.
20Is tas a Ihova ehele Moses im Eron, um ika,
21Arumu udei atimi iji igki aijaurau, mika ki auroauro ainyak um auahas ra.
22Erus atpuse arau, um ika, Ak Atua, Atua u nesga atimi asega, napu atavaitap aiek va atimi asega, va nedo has u natimi et ethi ache, ka oʼo?
23Is tas a Ihova ehele Moses, um ika,
24Namu tas ehele atimi aiek, um ika, Akumu udei neom atga u Kora, im Tedan, im Abairam, aijaua.
25Is atidai a Moses um apan ehele Tedan im Abairam; eris apitac yin a ilpu atimi alupas u nup Isreel.
26Is tas ehele atimi aien, um ika, Akumu udei niji eom atga u ilpu atimi auatatimi iji igki aijaua, um jim ubli tah nitai ura, va aki jim emesmas aijaua va nedo has ura.
27Eris ahes an neom u Kora, im Tedan, im Abairam, ara um atga ura: erus alau ijo a Tedan im Abairam, um aiji an neucse neom atga urau, im ehgarau, im ilpu hal urau, im ilpu hadi urau.
28Is ika a Moses, Akupu ato aijaua va nitai inigki mika is abrai nyak a Ihova par ago nauritai iji igki asega; kis eti ispuk ago ainyak.
29El et idivaig inmas u atimi asega inmas u natimi iji igki, el et yetpam ira ra itai et idivaig ira atimi asega; el is eti abrai nyak a Ihova.
30Ja el et ago nedo et eche a Ihova, el et asalgei nipjineucsen nobohtan um atleg ra, im niji itai asega ura, el era umumoh ara um asuol anliin nehpanitai; akupu ato aijaua mika eris auahas inliinmopoi Ihova natimi iji igki.
31Is asan tas iji igki asega aien, ja is par ameled nobohtan ithara:
32is asalgei nipjineucsen nobohtan um atleg ra, im niji eom ura, im atimi asega u Kora, im niji itai asega ura.
33Eris asuol anliin nehpanitai ara, im niji itai asega ura, an numumoh vaig ura, is lep ataluopni pam ra nobohtan: eris emesmas ara an nuhup u atimi.
34Eris aha a nup Isreel asega eris amen ehele ra ara va naunyauwaig ura: eris ika ara. Etpu atleg caija nobohtan.
35Is ahes incap ehele Ihova, um atnamud natimi is tu huntret im fifte eris ahlap an nitai auanipin upene ara.
36Is tas a Ihova ehele Moses, um ika,
37Namu asaig aiek ehele Eliesar inhal u Eron natimi ahlap, mika yi leh nipjiitai aien an cap, namu lep imiterimterim incap eahki aiek; et itap nitai iji igki.
38Erumu ago niji itai apalapal alupas ara, irai ipjiitai u natimi iji igki eris ago nedo has vai ra ara, par adahpoi natau iran: eris ikni an nuhup u Ihova ara, va nitai inigki et itap: inyi lep itai asjaaicnaig imi nup Isreel.
39Is leh nipjiitai bras iji ehki a Eliesar natimi ahlap, eris ahlap iran natimi iji ehki eris atnamud ra; eris lep ago niji itai apalapal alupas iran ara par adahpoi natau:
40mika yi itai imiehva imi nup Isreel, vai yi jim yetpam tah natimi et eche, et eti ahes irai Eron aien, um ahlap an nitai auanipin upene an nuhup u Ihova; vai yi jim idivaig Kora aien, im ilpu atimi apol iran: is idivaig is asaig ehelen a Ihova irai Moses.
41Ja is wat lahlah an tak apnyin eris tastas has vai Moses im Eron a nup Isreel asega, um ika, Eka mun atgei atimi u Ihova aijaua.
42Eris wat asjapicnaig natimi asega vai Moses im Eron, eris aes pan neom er asjapicnaig o un ara: is ataluopni pam napat iran, eris lep ecetai naijorai Ihova.
43Eris apan a Moses im Eron an nuhup u neom er asjapicnaig o un.
44Is tas a Ihova ehele Moses, um ika,
45Arumu udei atimi iji igki aijaurau, mika ki auroauro ainyak um auahas ra. Erus eropse an nesganimtarau arau.
46Is tas a Moses ehele Eron, um ika, Leh nipjinitai aiek, um leh incap an natau um ati iran, um ati nitai auanipin upene ijinies iran, um auroauro um apan ehele atimi, um ahlap va nedo has ura; et mun ehlohos nedemda u Ihova: et lep eteuc inmas.
47Is leh a Eron is idivaig is asaig a Moses, um athut pan irai ibla atimi; is idim atupun inmas ira atimi: ja is ati nitai auanipin upene aien, um ahlap va nedo has u atimi.
48Is aiji aien irai iblai ilpu atimi emesmas im ilpu atimi umumoh; um atapnes inmas.
49Eris emesmas natimi is fortiin dausant im seven huntret (14,700) an mas iyehki, im lep ra eris emesmas ara va nedo o Kora.
50Is adumoij pan ehele Moses a Eron an neucse neom er asjapicnaig o un: ja is lep tiih inmas.
Currently Selected:
Numera Nuarin-tas alupas 16.: ABO
Highlight
Copy
Compare
Share
Want to have your highlights saved across all your devices? Sign up or sign in
Aneityum Bible © Bible Society of the South Pacific, 2021
(Genesis to Esther - 1879 • Job to Malachi - 1878
• Matthew to Revelation - 1863)